STENBOL - Zîndanê Tîpê Fyê Hûmara 2yîn Tekîrdagî de 13 tepişteyê ke hemverê binpaykerdişê heqan û tecrîdî de dest bi grevê vêşanîye kerdibî û grev roja 52yîn de yo. Avûkata OHDyî Eda Onal derheqê babete de vengdayîşê wezîfeyê sazgehî de yê kerd.

 

Zîndanê Tîpê F yê Hûmara 2yîn Tekîrdagî de 13 tepişteyan bi waştişê binpaykerdişê heqan peynî bibê kewtî grevê vêşanîye. 19ê Kanûna 2021 de tepişteyo bi nameyê Vedat Çem Erkemen koxuşê ke tena mendêne  bi guman dinyaya xo bedilna û 17ê çeleyî de 5 tepişteyan dest bi grevî kerdibi. 13 tepişteyan ra 11 hebî grevê vêşanîye yê bêdem û bidor de yê û 2 heb zî kewtî  grevê bi dem. Çalakîya grevê vêşanîye kewt roja 52yîn.

 

Problemê weşîye rî dayî

 

Ame zanayîş ke tepişteyan dir problemê cidî yê weşîye rî dayê, qirike înan ra gonî yena û xeylêk kîlo vînî kerdê. Hewteyê vîyarte de merdimê tepişteyan bajaranê cîya ra ameyî û verê zîndanî de eşkerayîyêke dayî û veng dayî îdarekarîyê zîndanî ke waştişê tepişteyan bi ca bêrê û berpirsîyarîyê xo bi ca bêrê.

 

‘Heqî yenê binpaykerdiş’ 

 

Endama Komeleya Huqûqnasê seba Azadîye (OHD) ya Stenbolî avûkate Eda Onal bale ant serê grevê hemverê tecrîdî û binpaykerdişê heqan ke ameyê  destpêkerdiş û wina vat: “Sere de heqê cuye û heme heqê ke pêkerdişê mîyanneteweyî de binê asayîşî de yê yenê binpaykerdiş.”

 

‘Asayîşê ganî çin o’

 

Eda vat, eynî zîndan de tepişte Vedat Çem Erkmen bi guman dinyaya xo bedilna û vat: “Dimayê Vedat Erkmenî, tepişteyo bi nameyê Yasîn Eneç hetê gardiyanan ra îşkence dî û sewbîna seba tedayê fîzîkî û psîkolojîk yê serê tepişteyan zêde bîyo, tepişteyî hetê asayîşê ganê xo de endîşeyîn ê. Pêvînayîşêk de muvekîlê mi vat, ‘Wexto ke ma yenê pêvînayîşê to zî ma asayîşê ganê xo rê kewenê endîşe.’ Rewşa tepişteyan baş nîya, asayîşê ganê înan çin o.”

 

Waştişê tepişteyan

 

Eda dewam de vat: “Waştişê tepişteyan oyo ke, tedayê fîzîkî û psîkolojîk, îşkence û caardişê xirab, caardişê qefesê têlan ê hucreyî û hewadankê peynî bibo. Sewbîna cigêrayîşê viran, cigêrayîşê kêfî peynî bibê, goreyê waştişan odayî bêrê vurnayîş û teberê waştişî nêrê vurnayîş. Reyna muvekîlê ma wazenê ke goreyê waştişê înan tewrê aktîvîteyê sey spor û komelî bibê, hacetê neqlkerdişî yê sey; kitab, mektub, kargo, kovar û rojname her tim bêrê dayîş. Sewbîna binpêkerdişê heqan ê bi OHALî dir giran bîyê zî peynî bê.”

 

Îşkence kerdî la cipersayîş zî nêame akerdiş

 

Eda bale ant serê caardişan û vat: “Dewlete û heme yewîneyî nê ra berpirsariyar ê. Ganî waştişê seba heqê înan bi ca bêro. Nê caardişan ra Mudûrîyê Pêroyî yê Keyeyê Tevkîf û Cezaya îdarî ya Zîndananê Tîpê F yê Hûmara 2yîn Tekîrdagî û Wezaretê Dade berpirsîyar ê. Tepişteyo bi nameyê Yasîn Eneş hetê di memurê înfazî ra yeno derbkerdiş. Derheqê derbkerdişî de muracatê Serdozgarîya Komare amebi kerdiş. Memurê înfazî îfadeyanê xo de îdia kenê ke Yasîn Enes serê xo dayo dêsan ro, embazanê xo dir dayo pêro û înan Yasîn Eneç derb nêkerdo. Muvekîlê ma zî vatibi, gardiyanan ey derb kerdo. La cipersayîşêk zî anêkerdî.”

 

‘Ganî bala yê teberî zere de bo’

 

Eda tewr peyîn wina vat: “Hemşaredara verê ya Amedî ke qeyûm ame vera ci Gultan Kişanak vatibî, ‘wa bala kesê teberî zere de bo.’ Pêvînayîş de muvekîla ma vat, yê tepişteyî tena bi bedenê xo eşkenê veng bidê teber. Ma veng danê pêro sazgehan ke berpirsyarîyê xo bi ca bîyarê, waştişê tepişteyan ê mevzutê netewî û mîyanneteweyî de yê bi ca bîyarê û rayaumumî bi hîsgêr bo.”