Şehrîban Aslan 

 

AMED - Avûkate Gulcan Çelîk, mutalayê ke serdozgerîya Daniştayî derheqê Pêkerdişê Stenbolî de da ercna û vat: "Roja ewil ra sey ma vato, qerarê antişê  Pêkerdişê Stenbolî qanûnan de hukmê ci çin o. Mutalayê ke Serdozgerîya Komare ya Daniştayî pêşkêş kerdo zî rewşe ramojneno.”

 

Pêkerdişê Stenbolî 20ê Adara 2021 de bi qerarnameyê serekomarî ame antiş û 1ê Temmuze de zî bi hawayêke fermî ame fehskerdiş.  Derheqê pêkerdişî de Merkezê Heqê Cinîyan ê Baroyê Amedî, Daniştayî doza betalkerdişî akerd. Serdozgerîya Daniştayî derheqê dewa de rojê vîyarte de mutala da û vat, ancîyayîşê pêkerdişî hemverê huqûqî yo. Avûkata Merkezê Heqê Cinîyan ê Baroyê Amedî Gulcan Çelîk derheqê mutalayê ameyo dayîş de ercnayîş kerd.

 

‘Mutalayê ameyo dayîş her çî mojneno ra’

 

Gulcane bale ant serê mutalayê ke Serdozgerîya Komare ya Dandgeha Berzî daya û wina vat: “Ma Merkezê Heqê Cinîyan ê Baroyê Amedî hemverê nê bêhuqûqî muracat kerdibi. Netîceyê nê serdayîş de Serdozgerîya Komara ya Dandgeha Berzî mutala da û mutala hetê dewleta huqûqî de xeylêk bi hêvî yo. Roja ewil de ma vat ke qerarê antişî Pêkerdişê Stenbolî qanûnan de hukmê ci çin o. Dandgeha Berzî zî mutalayê ke dayo de no bi eşkera dayo werte.”

 

‘Ganî meclîs dewre de bo’

 

Gulcane dewam de wina vat: “Qanûnê hûmara 6251 yê ‘ca de yo’ 29ê teşrîna peyêne 2011 de caardiş de yo hema zî caardiş de yo. Destûrê bingehîn de, bi hîrayî derheqê pêkerdişê mîyanneteweyî de ke senîn bi ca bêrê sererastkerdiş estê. Derheqê ke mesajê senîn yenê vurnayîş, senîn bi peynî beno yan zî caardiş ra yeno wedaritiş de metod çin ê. Sewbîna hetê wedaritiş, vurnayîş û peynîkerdişê pêkerdişî de ganî metodê rayî û usulî bêro taqîbkerdiş. Seba nê zî seba ke pêkerdişêk mîyanneteweyî caardiş ra bêro wedaritiş ganîe bi kar û barê TBMMyî bêro kerdiş.”

 

‘Kontrolê qanûnî bi pêroyî sîyasî yo’

 

Gulcane vat: “Pêkerdişê mîyanneteweyî bi prensîb serê qanûnan dir ê. La nê kontrolê qanûnî bi pêroyî siyasî yê û taqîbkerdişê ci babetêka komelî ya. Hemverê antişê Pêkerdişê Stenbolî xeylêk baro û sazgehê cinîyan seba  betalkerdişê qerarî muracatê Dadgeha Berzî kerdî. Pêwa ke xeylêk muracat amebî redkerdiş zî qerarê ke nika Dadgeha Berzî ya Serdozgerîya Komare ya Amedî daya xeylêk bi hêvî yo. Nînan ra yew zî muracatê Komeleya Cinîyan a Rosa bi.”

 

‘Hemverê huqûqî yo’

 

Gulcane bale ant serê qerarê Dadgeha Berzî û vat, serdozgerîya Komare ya Dadgeha Berzî muracatê Merkezê Heqê Cinîyan ê Baroyê Amedî de mutala da û dîyar kerd ke qerarê antişê Pêkerdişê Stnebolî hemverê huqûqî yo.

 

Ma do têkoşînê xo dewam bikerê 

 

Gulcane wina qedêna: “Antişê Pêkerdişê Stenbolî hemverê destûrê bingehîn o. Ma do watîrê Pêkerdişê Stenbolî vejênê. Seba pêkerdişê mîyanneteweyî bê kêmî bi ca bêrê û bikewê cuye, ma do taqîbkerdoxê babete bê. Ma do têkoşînê xo dewam bikerê.”