Gulîstan Şahîn

 

QAMIŞLO - Cefala Abas a ke lajê aye Ehmed di merasîmê pêşwazîkerdişê cenazeyê merdimê di serewedaritişê 12ê Adare ya 2004î de Qamişlo de ameybî qetilkerdiş û dinyaya xo bedilnabî, wina vat: "Lajê mi di rayîrê şerefî de ciwîya xo bedilna û ma di nê rayîrî de poşman nîyê û serkewte yê Şarê Kurdî yê. Ez bi rayîrê lajê xo sereberz a." 

 

12ê Adare ya 2004î de Stadyûmê şaristanê Qamişlo de mabênê Tîmê Cîhadî de û Tîmê Fitiwa ya Dêrazorî de maçêke amî organîzekerdiş. Vernîya ke maç dest pêbikero, Tîmê Fitiwa yê Dêrazorî bi kerra û sîlehan hêrişê hetkarê Tîmê Cîhadî kenê û kontrolê hêzê asayîşê Sûrîyeyî der-dorî ablûka kenê. Dimayê ke xeylêk merdimî hetkarê Tîmê Cîhadî ra birîndar benê, wurdî hetê stadyûmî de şer vejîyeno û Rejîm guleyan bi tewirêke zanabîyaye serê sivîlan de rijneno. Netîceyê nê hêrişî de 3 ciwanê Kurdî dinyaya xo bedilnenê û bi desan merdimî birîndar benê. Dimayê serebûtî, şar dikanan padano û keweno çalakîya serewedaritişî. Dimayê rojêke bi des-hezaran kesî beşdarê oxirkerdişê cenazeyan benê û hewêna hêzê asayîşê Sûrîyeyî hêrişê şarî kenê û netîceyê ê hêrişî de cinî û tutî zî dinyaya xo bedilnenê û birîndar benê. Şarê Kurdî  serewedaritişê 12ê Adare dir şoreşê xo awan kerd û ewro yewîyîya şaran zî awan kerd. 

 

‘12ê Adare de şar serê payan de bi’

 

Cefala Abas wina qalê roja 12ê Adare kena: "Verê şanî bî, welatî ameyî û vatî stadyûm de şer vejîyayo. Haya ma çîyêke ra çin a, la tena ma zanenê tutê ma zî weyra yê. Tutêke mi zî do bişîyêne eskerîye, do şan de bişîyêne. Lajê mi Ehmed zî kar ra amebi, keye de bi. Tutê cîrananê ma zî stadyûm de bî. Lajê mi Cûdî zî mîyanê şerî de bi û birayê ey, ro ci gêreno û vano tîya ra dûrî bikewe û Cûdî bi xo zî kerrayî eştî înan. Şar ereyê şewe zî serê payan de bî. Lajê mi Ehmed kar ra amebi, keye de bi. Ehmed û embazê ey lazim bî bişîyêne xerace, dima ra malûmat ame ke vera serewedaritişî nêbî şêrê xerace. Her ca xerepîya bîbî.  Sewbîna hayîya ma qetilkerdişê ciwananê Kurdan ra çinbî. Dima ra bi serê sibayî, şar vejîya wareyan ke tutanê xo herrî de defin bikero. Babê tutan zî vat her ca şer o, wa kes nêvejîyo tever. Ê wextî de ma nêzanayne ke do tutê ma qetil bikerê, ma tepiştiş û îşkenceyî ra tersayêne." 

 

‘Şehîdê 12 Adare serê kiftanê şarî de bî’

 

Cefale da zanayene ke her hîrê lajê aye zî şîyê oxirkerdişê şehîdan û wina dewam kerd: "Gama ke şar zaf germ bî û cenaze ardbî Camîya Qamişlo ya şaristanê Qamişloyî, her hîrê lajê mi zî dayî têdima û şîyî şehîdan defin bikerê. Ez eşkena vajî ke tu kes keye de nêmend, her kesî verê xo da uca û kombîyayîşêk zaf pîl virazîya. Ma cenazeyî wedaritî û bi rayîrşîyayîşêk zaf pîl ma verê xo da Çerxêreyê Elefya û reyêke de vengê teqîne ame. Şarî veng kerd û vat eke ma bi şeref û namûsî bê, ma do şehîdanê xo wedarê. Lajê mi Ehmed zî cenaze wedaritêne. Mi verê stadyûmî de xo resna lajê xo yê qijî û mi persê birayê ey kerd, vat do bêro. Ez senîn resaya keye mi vîna ke vernîyê keyeyê mi de qerebalixêk esto û mi vîna lajê mi yo bîn û babê ey vaz danê. Dima ra mi vat çîyêk bi tutanê mi ameyo. Senîn ez resaya keye, cîrananê mi vatî lajê to Ehmed birîndar bîyo." 

 

‘Mi cenazeyê lajê xo girewt û mi dewe de defin kerd’

 

Cefale da zanayene ke aye cenazeyê lajê xo girewta û dewa xo de defin kerdo û wina vat: "Mi cinîya hekîmî vîna û senîn çimê aye bi mi kewt, mi ra vat Ehmed merd, merd! Cîrananê ma wesayît ard û ma şîyî Nêweşxaneyê Nûrî. Eskerî vernîyê nêweşxaneyî de vindertîbî û ameyî vernîyê ma. Ê eskeran mi ra vatî tîya ra şêrê û vatişê xirabî kerdî. Ê eskeran mi ra çi vatêne, mi bi adizî û kînêke pîle heme vetişê înan, açarnayne înan rê. Cîranê ke mi dir ameybî, vatî do guleyan ro ma zî birijnê û mi zî vat çi kenê wa bikerê, ez zî seke lajê xo ya. Mi cenazeyê lajê xo girewt û mi dewa xo de defin kerd." 

 

‘Ez bi rayîrê lajê xo sereberz a’

 

Cefale da zanayene ke, aye bi rayîrê lajê xo sereberz a û wina vat: "Ez lehnet ro Rejîmî ana ke, tutê mi qetil kerd. Ez serkewtiş şervananê xo rê wazena. Na roje seba mi rojêke giran a. Kayêke pîl serê Kurdan de kerdî. Rejîmî bi hadrekerdişêke pîlî hêrişê Kurdan kerd. Heta roja ewro zî qirkerdişî serê Şarê Kurdî de yenê kerdiş. Ma do her game de rêça tutanê xo de bê û gonîya înan herd de nêmanena. Ez do her game de serê rêça lajê xo de bî. Lajê mi rayîrê şerefî de dinyaya xo bedilna. Ma di na rayîrî de poşman nîyê û serkewte yê Şarê Kurdî yê. Sereyê ma bi tutanê ma sereberz o."