RIHA - "Nobeta Edaletî" ya Emîne û Ferît Şenyaşar ke verê Edlîyeyê Rihayî de roja 369 de dewam keno. Emîne û Ferît wina vat: "Ma do nê bêhuqûqî her ca de qal bikerê."

 

Merdim û pawitoxê parlamenterê AKPyî Îbrahîm Halîl Yildiz 14ê hezîrana serra 2018ine de hêrişê dikanê keyeyê Şenyaşarî yê Pirsûsî kerd. Hêriş de mêrdeyê dadîya Emîne Şenyaşar û di lajê aye ameyî  qetilkerdiş. Lajê ci Ferît Şenyaşar zî qirkerdiş bi birîndarî xelas bi. Seba tepiştiş û muhakemekerdişê kiştoxan û veradayîşê Fadil Şenyaşar, dadîya Emîne Şenyaşar û lajê xo Ferît Şenyaşar 9ê adara 2021 de verê Edliyeyê Rihayî dest bi çalakîya Nobeta Edaletî kerdî. Çalakîya keyeyê roja 369in de dewam kerd.

 

Rojê betlaneyî de berê edliye padaye yo coka zî keyeyê Şenyaşarî çalakîya xo keyeyê xo de kerd û medyaya dîjîtale de zî wina vat: “Serdestê ke welat îdare kenê, nêwazenê ke komel zana bibo, qisey bikero û bikewo mîyanê tevger. Nêweşxane de qirkerdişêk  keyeyê ma rê kerdî. Kerdoxê qirkerdişî hetê îqtîdarî ra yenê pawitiş. Heta ke edalet bi ca yeno, ma do bêveng nêmanê. Ma do nê bêhuqûqî her ca de qal bikerê."