COLEMÊRG - Gever de bi îlankerdişê îdarekarîyê xoserî dir 79 rojan qedexeyê tevervejîyayîşê  kuçeyan dewam kerd û prosesê qedexeyî de şarî xover da. Şarê Geverî wextê ê rojan vîr anê, bale ancenê serê têkoşînê azadî ke ewro zî dewam keno. 

 

Mabênê 2015î û 2016î de tarîxê cîyayî de Sûrê Amedî, Nisêbînê Mêrdînî, Cizîr û Silopî yê Şirnexî û sewbîna Geverê Colemêrgî de îdarekarîya xoser ameyî îlankerdiş. Îlankerdişî de qezayan de di tarîxê cîyayî de bi desan reyî qedexeyê tevervejîyayîşê kuçeyan ameyî îlankerdiş û nê prosesan de lejkerdişê xedarî ameyî ciwîyayîş. 

 

Dewan ra ver bi qezayan rayrayîş 

 

Yew cayî ra ke lejkerdişo xedar ci de ame ciwîyayîş Gever bi. Gever de 13ê Tebaxe ya 2015î de îdarekarîya xoserî amî îlankerdiş. Dimayê na, Yewîyîya Pawitişê Sivîlî (YPS), 1ê Sibate ya 2016î de awankerdişê xo îlan kerd. Dimayê nê, qedexeyê tevervejîyayîşê kuçeyan ameyî îlankerdiş û her ke şî wextê ci ameyî dergkerdiş. Qeza de bi pêroyî 5 reyan qedexeyî ameyî îlankerdiş û a tewr derge mabênê 13ê Adare û  29ê Gulane ya 2016î de amî ca. Qedexeyî dir xeylêk dewan ra welatijî vejîyayî meydanan û verbi qezayî rayrayîş kerd. JOH û POHî serê şarî de guleyî rijnayî û  xeylêke merdimî birîndar bî. 

 

Serê dêsan de nuşteyê nîjadperestî 

 

Wextê qedexeyê tevervejîyayîşê kuçeyan ê 79 rojî dewam kerd de lejkerdişê xedarî ameyî ciwîyayîş û semtê Cumhûriyetî, Gungorî, Ormanî, Kişlayî, Goristanî û Dîzeyî de zêdeyêr bi tesîr bî. Hema hema heme dekewtiş û vejîyayîşê qezayî ameyî padayîş û zafêrî dewî zî qedexe û lejkerdiş ra tesîr bî. Semtan de xeylêk banî ameyî rijnayîş û serê dêsanê banan de nuşteyê nîjadperestî ameyî nuştiş û fotoxrafê înan ameyî parekerdiş. 

 

Dîbîstanî seke qereqolan ameyî xebetnayîş 

 

Qeza de xeylêk semtî nê prosesî de ameyî wêrankerdiş û tena xirbeyî mendî. Tayê semtan de welatijan banê xo tamîr kerdî, la tayêke zî nizdê ê banan nêbî. Semta Ormanî de zî dîbîstanêke ame girewtiş û seke qereqole ame xebetnayîş. 

 

Seba cenazeyan manîyî 

 

Lejkerdiş de 90 kesê ke endamê YPSyî bî ciwîya xo bedilnayî. Cenazeyê ke bi rojan kuçeyan de erd de mendî hetê JOH û POHî ra fotoxrafê înan ameyî antiş û serê çapemenîya komele de ameyî parekerdiş. Dima ra zî qismêke cenazeyî Goristanê Bêkesanê yê Erzîromî de ameyî definkerdiş. Nasnameyê merdimê ke ameyî definkerdiş zî têmîyanêr bî. Tay cenazeyî netîceyê muracatê keyeyan de ameyî dayîş. La nêverdayî keyeyî cenazeyanê xo biberê Gever. Seba merasîmê cenazeyan zî manîyî ameyî vejîyayîş. Tena seba 5 cenazeyan destûrê tewirbîyayîşî ame dayîş. Sewbîna nêverda ke wecîbeyê dînî zî bêro ca. 

 

Aqûbetê xeylêk cenazeyan nîno zanayene 

 

Heto bîn ra zî xeylêk cenazeyî ke nasnameyê înan nêameyî tesbîtkerdiş û hûmara înan nîna zanayîş estê. Pêwa serê serebûte ra 6 serrî derbas bîyo zî banê welatijan ê hetê TOKÎ ra newe ra ameyî viraştiş, sey kîrayî dayê welatijan. TOKÎyî 6 serrî pey ra ameyî teslîmkerdiş, la bi kîra ameyî teslîmkerdiş. 

 

Xoverdayîş dewam de yo 

 

Verê xoverdayîşê îdarekarîyê xoserî de 7 serrî  derbas bî. La hema zî rêça xoverdayîşî  yê kuçeyan û semtan de ya dewam kena. Pêwa çîyê ke ameyî ciwîyayîş, keyeyê ke tutê xo vindî kerdî hema zî dest têkoşîn, xoverdayîş û hewldanê aştîye ra vera nêdayê.