COLEMÊRG - Dadîya, Nadîr Guneç (Bawer Pîr) ke xoverdayîşê ke 79 rojan Gever de dewam kerd dinyaya xo bedilna, Kewê Guneş dîyar kerd ke aye bi lajê xo serberz a û wina vat: "Bi têkoşînê ke lajê mi dayo, sereyê ma her wext berz o. Waştişê ey o bi ke bi heybet bêro definkerdiş. Seba mi waştişê ci ard ca zerrîya mi zaf rehet a."

 

Qezaya Geverî ya Colemêrgî 13ê Tebaxa 2015ine de hetê Meclîsê Komela Demokratîke ra îdarekarîya xoser ame îlankerdiş. Dimayê nê 13ê Adara 2016ine de qeza de qedexeyê tebervejîyayîşê kuçeyan ê teberî 79 rojan dest pêkerd.  Qedexeyê heta 30ê Gulana 2016ine dewam kerd û yew kesê ke xoverdayîşî de dinyaya xo bedilna  Nadîr Guneç (Bawer Pîr) bi.

 

Dadîya ey Kewê Guneç, derheqê prosesê xoverdayîşê Geverî de ajansê ma rê qisey kerd.

 

'Ganî êyê ke têkoşîn kerdê nêrê xovîrrakerdiş'

 

Kewê wina qal kerd: “Ma prosesêke zor û zehmetî ra derbas bî. Mîyanê demî de birînî kewênayî. Lajê mi hemverê zulmo ke DAIŞî cinîyan rê kerdêne, nêvindert û vat, ez o şêrî. Her reyê ke mi vat, meşo vat; 'ewro înan rê yeno kerdiş, siba zî do ma rê bêro kerdiş.' Dima ra mi êdî çîyêk nêvat. Dimayê ke qedexeyî ameyî îlankerdiş, ma eşnawit ke ameyo  Gever. Mimkin nîyo ke ma ciwananê xo yê ke têkoşîn kerdî, xo vîr ra bikerê. Bawer tena şehîdê min nîyo, yê pêro kurdistanî yo. Ez tena seba Bawerî nêvena. Heme kesê ke têkoşîn kerdê tutê min ê. Ma tu wext têkoşînê înan xo vîr ra nêkenê."

 

‘Mi hemverê înan hesrêke nêvarna'

 

Kewê vat, keyepelê înternetî ra haydar bîya ke lajê ci dinyaya xo bedilnayo û nê ser de şîyê Sazgehê Tipê Edlî yê Erziromî nimûneyê DNAyî dayê. Kewê wina vat: Ma cenaze girewt. Pîyê ci zî deqê serê milê yê Fermandar Egît nas kerd. Polîsan seba deqê serê milê lajê mi problem vetî. Vatî, ‘nêeşkeno bêro definkerdiş.' La ma têkoşînê xo dewam kerd û cenazeya xo girewt. Ma cenazeya xo şût, kefen kerd û polîsan dorê ma pada. Ma kerd binê ablûqa. Ma xeylêk nêrehet bî. Nêşîne. Heta ke ma cenaze defin kerd, serê ma de vindertî. Hemverê înan de mi yew hesrêke nêvarna."

 

‘Mi waştişê ci bi ca ard'

 

Kewê vat, yewin waştişê lajê aye o bi ke bi heybet bêro definkerdiş û vat: “Lajê mi waştêne ke bi heybet bêro definkerdiş. Coka ma nêard Gever. Eke ma biardêne do destûr nêdayîne. Ma Wan de goreyê zerrîya ey bi sloganan, bi alaya kesk, sûr û zer defin kerd. Seba ke waştişê ey peyîn bi ca ame zerrîya mi zaf rehet a."

 

‘Sereyê ma her tim berz o'

 

Kewê tewr peyîn wina vat: “Ma her tim bi têkoşinê lajê xo serberz ê. Seba lajê min o wina têkoşîn kerdo esto, ez serberz a. Ez o her tim rayîrê ey de bî. 7 serrî ney 70 serrî zî derbas bibo ez o rayîrê ey de bî.  Bawer tena ney, heme kesê ke uca de şehîd kewtî tutê min ê. Ez bi hemine serberz a. Ez veng dana keyeyê ke cenazeyê xo nêgirewtê. Wa seba girewtişê cenazeyanê xo têkoşîn bikerê."