Hîkmet Tunç

 

WAN - Avûkata OHDyî Mehtap Işik derheqê rapora ATKyî ya derheqê rewşa Aysel Tugluk de ameyê dayîş ser o qisey kerd û vat: "ATK bi qerarê tibî ney bi sîyasî qeraran dano. Seba nê zî tehlîye nêkenê. Ganî ATK qeraranê tibî bido û qet nêbo înfazê înan bêro taloqkerdiş û bêrê veradayîş.”

 

Rewşa sîyasetmedara kurde Aysel Tugluk ke Zîndanê Tîpê F yê Kandirayî yê Kocaeli de manena û  teşhîsê demansî ci rê ameyo kerdiş, her ke şino giran beno û ATK reya dîyin raporê ‘eşkena tepişte bimano' dayo. Seba Aysel Tugluk û heme tepişteyê nêweşan Nobedê Edaletî dewam kenê û her bajarî de na çarçewaya de bername û çalakî yenê kerdiş. Endama Komeleya Huqûqnasê Seba Azadîye (OHD) ya Wanî avûkate Mehtap Işik derheqê  rewşa Aysel û tepişteyê nêweşan de erjnayîş kerd.

 

‘Bi sebebê sîyasî nîna veradayîş'

 

Mehtabe derheqê raporê ATKyî de qisey kerd û vat: "Aysele nika seba bahaneyê sîyasî yena tepiştiş. No bêhuqûqî pîl o. Aysele nêweş a û nêweşîya aye demans a. Xeylêk çî nînê vîrê aye. Bi tena sereyê xo nêeşkena çîyêk bikero. Sewbîna embazêke aye zî verê aye de çin a."

 

'Hemverê huqûqî ya'

 

Mehtabe dewam de wina vat: “No qerar hemverê huqûqî yo û mîyanneteweyî yo. Demo ke ma ewnîyenê huqûqê Tirkîya û yê mîyanneteweyî ewnîyenê, tarîxê sucî ra demo ke merdim qanûnê înfazê tepişteyan ewnîyenê, ganî rewşa aye ya zîndanî verê çiman de bêro girewtiş. Seba nê zî ma eşkenê vajê ke ATK raporê xo de bi pêroyî goreyê sîyasî têgêrenê. Oyo ke ATK kerdo, erjêkê sîyasî yo."

 

'Ganî prosesê nêweşîye bierjnê'

 

Mehtabe bale ant serê rewşa Aysele û vat: “Ganî rewşa Aysele, nêweşîya ci, eşkena lazimîyê xo bi ca bîyara yan ney, no verê çiman de biameyîne girewtiş. La rapor de ca dayê tarîxê ehliyetê cezayî. Xeylê tepişteyê nêweşî bi sebebê sîyasî nînê veradayîş. Rewşa tepişteyan xeylê xo giran a. Nînê veradayîş. Înfaz nîno taloqkerdiş. ATK bi hawayêke bêhuqûqî tahlîyekerdişan asteng keno.”

 

‘Ganî bi daneyê tibî têbigeyrê'

 

Mehtabe tewr peyîn wina vat: “Nê prosesê ke sîyaset tewrê huqûqî bîyo de bi hezaran tepişteyê nêweş estê. Raporê ATKyî zî netîceyê pozîtîf nêvejênê. Raporê ‘eşkenê tepişte bimanê' danê. La heme nêweşê giran ê. Ganî ATK qerarê tibî bido û ganî tahliye bikerê."