Sema Çaglak 

 

AMED - Cinîyê Bazarê Taxe yê Jiyanî de reaksîyon vera bicakerdişê camêrdan ê bazarê ke seba înan ameyo visnayîş mojnayî û dîyar kerdî ke yeno waştiş, cinîyan bazar û heme wareyê îstîhdamî ra dûr bifînê. Sewbîna cinîyan dîyar kerd ke heta waştişê înan bi ca bîyarê ê do seba nê têkoşîn bikerê.

 

Şaredarîya Bajarê Girdî ya Partîya Aştî û Demokrasî (BDP) 2013ine de seba cinîyê ke şîdet înan rê ameyo kerdiş û nêeşkenê debara xo bikerê projeyê Bazarê Taxe ya Jiyanî akerdî. Xêrê projeyî ra seba 258 cinîyan wareyê îstîhdamî ame akerdiş. Bazarê ke 9 serrî yo hetê cinîyan ra yeno îdarekerdiş, dem bi dem waştî ke camêrdan bi ca bikerê û netîceyê têkoşînê cinîyan de no waştiş ame peyserantiş. La dimayê Şaredarîya Rezanî ya destê HDPyî de bi rayîrê tayînkerdişê qeyûm ci ra ame girewtiş, Huseyîn Beyoglu sey qeyûm tayînî şaredarî ame tayînkerdiş. Dimayê nê, kombîyayîşê ke binê serekîya Huseyîn Beyoglu de ame kerdiş, qerar ame girewtiş ke 400 camêrdî zî  Bazarê Taxe ya Jiyanî de bêrê bicakerdiş. Cinîyê ke bazar de reaksîyon vera na rewşe dayî, vatî ke ê camêrdan wareyê ke seba înan ameyo visnayîş nêwazenê. La bicakerdişê camêrdan ê hetê şaredarî yê bazarî dewam keno û hemverênê cinî zî têkoşînê xo dewam kenê.

 

‘Ma nêwazenê camêrdan bazar de verê ma de bi ca bibê'

 

Cinîya bazarwan Guler Eker ke 9 serrî bazar de xebityenê dîyar kerd ke wareyêke aîdê înan nêwazenê camêrdî kîşte înan de bê û vat: "Bi 8 serrî yo qedîya la şerê ma yê bi şaredarîya Rezane dir nêqedîya. Her serre bi bahaneyêk cîya serê ma de yenê. Camêrdan rê soz danê û înan bazarê ke seba ma ameyo visnayîş, bi ca kenê. Bi no hawayî ma û camêrdan anê hemverê yewbînan. No bazar seba cinîyan amebi viraştiş. Ma reyke bîn vanê, ma camêrdan nê wareyî de nêwazenê. Ma do hemverê înan xo ver bidê û têkoşîn bikerê. Wa tu embazê ma yê cinî na rewşe qebûl nêkerê û wa heqê xo bipawê. Do şerê ma yê hemverê şaredarî bi têkoşînê ma bi ser bikewo. Heta ke belgeyêk fermî yê seba ke camêrdî nêkewê bazarê ma, ma do cayê xo de nêvinderê. Seba nê waştişê xo ma do şêrê verê berê şaredarî ke heta heqê xo bi dest bikerê."

 

‘Wazenê cinîyan bazar de dûr bifînê'

 

Muslume Keleçer ke awankerdişê bazarê jiyanî xebityenê dîyar kerdî ke wazenê cinîyan wareyê ekonomî û îstîhdamî de dûr bifînê û vat: "Gama ke camêrdan derûdorê ma de bi ca bikerê, ma qet nêeşkenê karê xo bikerê. Înan bajarê tewir bi tewir anê û înan zî tîya xebata ma asteng kenê. Ma nê qebûl nêkenê. Bazar de bêtêduştîyêk pîl esto. No  bazar seba cinîyan visnabî. Nika çi ma ra wazenê. Bi nê nêzdîbîyayîşî wazenê demî dir bikerê cayê camêrdan û cinîyan bazar ra dûr bifînê."

 

'Ma pey waştişê xo yê'

 

Muruvet Demîr zî wina vat: “Bi 10 serrî yo seba ke camêrdî nêkewê nê  bazarî ma têkoşîn kenê û hema zî têkoşînê ma dewam keno. Ma nê wareyî de nêwazenê camêrdî bixebityê. Şaredarî nê warî de cewabêke pozîtîf nêdano ma û hetgirê camêrdan keno. Eke nê bazar de ca bidê camêrdan do cinî êdî nêeşkê bixebityê û do agêrê keyeyê xo. Şaredarîya Rezanî zî seba nê xebityena û hewl dano ke cinîyan ware ra dûr bifînê. Ma nê nêheqî qebûl nêkenê û heta ke destê ma ra bêro ma do têkoşîn bidê çalakî bikerê."

 

‘Ma do nêverdê ke camêrdî wareyê ma îşxal bikerê'

 

Reyhan Okuz zî wina vat: “Bazarê ma roşenê û bazar de xîyanet kenê. Camêrdî zî wazenê tîya bixebityê, la seba xebata înan xeylêk ca esto, çira bi israr wazenê bi israr bixebityê? Camêrdî eşkenê her ca de bixebityê. Ma înan wazenê û qebûl nêkenê."