Sema Çaglak

 

AMED - Cinîyê Amedî dîyar kerdî ke do emsar Newroze bibo wesîleyê aştî û azadîye û veng kerdî ke her kes derdorê adirê Newroze de kom bibo û adir gurr bikero. 

 

Ameyîşê menga Adare dir coşa Şarê Kurdî zêdeyêrî bena. Destpêkerdişê menge de cinîyan dest bi kar û xebatê 8ê Adare kerdî û bi girseyî 8ê Adare meydanan de ameyî pêşwazîkerdiş. Cinîyan bi nê coşê xo, na reyî zî dest bi xebatê 21ê Adare Roşanê Newroze ke seba Şarê Kurdî xeylêke muhîm a û sembolê serewedaritişê hemverê zilmî ya. Pêwa xebatê Newroze ke bi coş û kelecanêke pîl û bi sloganê  'Wext wextê serkewtişî yo' dewam kena. Cinîyê Amedî zî derheqê na roja muhime ya 21ê Adare de hîs û fehmê xo ardî ziwan. 

 

‘Newroze seba mi azadî ya’

 

Esnafe Hûrîye Sapkan: Wexto vanê Newroz, azadî yena vîrê mi. Xeylêk merdimî seba coşî û kelecanî şinê meydanê Newroze. La seba mi şîyayîşê Newroze azadî ya. Mîyanê şaran de xeylêk cîyayîyî yenê kerdiş. Ma wazenê êdî ê cîyayî zî bêrê wedaritiş. Ez her serre şina Newroze. Gama ez tute bîya zî şîyêne Newroze la rayîr de vindî bîyêne. Ê Newrozî zî qet vîrê mi ra nêşinê. Sewbîna Newroza serra 2013î xeylêk weşbî. 

 

‘Seba Newroza Amedî ez Mêrsîn ra ameya’

 

Zehra Yilmaz:Newroz bîyayîşê Şarê Kurdî ya. Mi tim Newroze Mêrsîn de pîroz kerdêne la emsar seba pîrozîya Newroza Amedî ameya. Coka Newroza ke Amed de yena pîrozkerdiş xeylêk bi name û bi veng a. Umîd kena ke Newroze bi girseyî bêro pîrozkerdiş.

 

‘Ma cil û belgê xo hadre kenê’ 

 

Wendekare Alev Sungur: Wexto Newroze dest pê kena ma perên û fistanê xo yê Kurdî hadre kenê. Sewbîna seba înan solan zî herênenê. Nê hadreyîyan dir coşa ma zêdeyêrî bena. Newroze her serre bi coşêke pîl û weş derbas bena. La bi mi Newroza 2017î weşêr bî. 

 

‘Ma xo bi rengê zergûn, sûr û zerd xemilnenê’

 

Kedkarey keyî Sevda Ugrak: Ma Newroze ra  zaf hes kenê. Gama ke Newroze bena nizdî ma bê sebir benê û yeqîn nêkenê ke bêro. Ma bi kelecanêke pîl pabeyî de manenê.  Ma vernîyê Newroze de hadreyîyê xo kenê, keye de şîranî û werdê xo hadre kenê. Dima ra ma şinê meydanê Newroze de govende gênê û Newroza xo pîroz kenê. Ma xo bi renganê zergûn, sûr û zerdî xemilnenê. Newroze her daîm seba ma rojêka weş a. 

 

‘Newroze vileşqa wisarî ya’

 

Kedkara keyî Sebahat Altûn: 21ê Adare gulevîne ya wusarî ya. Ma do şêrê meydan û Newroze geş bikerê. Ma bi çar çiman pabeyî de  yê. Wexto ke a roje bêro, ma do cil û belgê xo yê Kurdî bikerê xo ra û şêrê. Newroze de her kes beno yew. Newroze eynî wextî de seba Kurdan yewîyî ya. Ma pabeyê nê de yê ke, merdimê ma yê ke dewe de yê, bêrê û ma têreyde şêrê meydanê Newroze.

 

Wendekare Seçîl Şîn: Newroze ameyîşê wusarî ya û seba ma Roşanê Kurdan a. Newroze vilikêka serê herdê Kurdistanî de tewr weşik a. Kurdî Newroze de bi her tewirî hêzê xo mojnenê ra. 

 

Kedkara  keyî Nesrîn Erdogan: Newroze her serre bi coşêke pîl yena pîrozkerdiş. No çend serrî yo vera Janê Koronayî Newroze bi girseyî nêamebî pîrozkerdiş. La emsar ez bawer a ke ma do bi coşî û kelecanêke pîl Newroza xo bi girseyî pîroz bikerê. 

 

‘Do Newroza emsarî biba wesîleyê aştîye’

 

Sayîme Atli: Newroze yena manaya aştî û kelecanî. Emsar Newroze do bibo wesîleyê aştîye. Vera ke rewşa welatî xeylêk xiraba, lazimî ya welatî bi aştîyêke mendeyî esta. 

 

Gulbîne: Newroze seba ma pîroza û roşanê ma ya verî ya ke ma şêrê meydan, ma xo rê tewir bi tewir werd keye de virazenê. La emsar vera krîzê ekonomî ma nê wareyî de zehmetîyan ancenê. 

 

‘Newroze yewîye Kurdan a’

 

Nûray Ruzgar: Newroze şayîya wusarî ya. Newroze sey sembolêke aştîye ya ke di zerra şarî de bi ca bîya. Ma seba Newroze bi keyeyî xo hadre kenê. Newrozê serranê 90î de xeylêk bi kelecan û coşî bîy. Ma bi pîrozîya Newroze yê, ê serran xeylêk bi tesîr bîy. Gama ke heme kesî ameyêne verê yewbînan, sîyasetmedaran zî pêwa înan ca girewtêne. O zî kêfweşîyêke dayêne. Merdim meydanê Newroze de heme hîs û fikrê xo yê zerrîya xo de ramojnayêne. Newroze yewîyîya Kurdan a. Newroza her serre xo Newroza verî ra ameyêne ca weyî kena. Verî zî di Newrozan de xeylêk manîyî û qedexekerdişî virazîyabî. La belê pêwa ê tehda û qedexekerdişan reyna zî şar herikîyayêne meydanan. Nika rewşe tayêke cîyayêr a. La reyna zî a coşe û kelecane seba Newroze, sey adirê aye tu reyî nêtefîya ya. Gama ke vanê menga Adare Newroze yena vîrê ma. Umîd û waştişê mi no yo ke ciwîyayîşêk seyyewbînî û aştî bêro ca. Do Şarê Kurdî hewêna Newroze de bibê yew.