Melîke Aydin

 

ÎZMÎR - Dadîya Denîz Poyraz, Fehîme Poyraz, dîyar kerd ke Newroze roja xoverdayîşê şaran o û vat: "Hêvîya ma oyo ke aştî bi ca bêro. Ez veng dana her kesî ke tewrê pîrozbayîyê Newroze bibê." Fehîme vengdayîşê tewrbîyayîşê  Newroze heme şaran kerd."

 

17ê Hezîrana 2021ê de hemverê Partîya Demokratîke ya Şaran (HDP) yê Îzmîrî hêriş ame kerdiş û xebatkara HDPyî Denîz Poyraz ameye qetilkerdiş. Dadîya Denîze, Fehîme Poyraz pîrozbayîyê Newroze yê Kadîfekaleyî erjna. Fehîme dîyar kerd ke Rahşan Demîrel seba azadîya Şarê Kurdî bîya meşale û vengdayîşê tewrbîyayîşê Newroze kerd.

 

‘Ma Kadîfekale de kurdbîyayîş danê ciwîyayîş'

 

Fehîme vat, 40 serrî verê Mêrdîn ra ameyê Kadîfekaleyê Îzmîrî û taxa Ballikuyu de bi ca bîya û vat: "Ewil vistewreyê mi Kadîfekaleyî de bî. Amebî surgunkerdiş. Cîranê ma heme kurd bî, Mêrdîn de bî. Kela berz bî. Seba nê kurdî şîne uca. Kam dewe ra biameyîne şîne uca. Hetê ci yê Yeşîldere ewnîyenê zî weş bi û hetê behrî ewnîyayîne zî weş a. Tenûre bî û nan ameyîne pewjnayîş. Turîstî ameyîne. Cîrantiya ci zaf bî. Şar seba seyranî ameyîne uca. Her kes bi kurdî qisey kerdêne. Ciwîyayîş bi kurdî bi. Uca zaf cîya bi. Bê xebate wareyê Newroze pirr bi. Newroza yewin xora kela de bi."

 

‘Meydanê Gundogdu dimayê demêk derg ame padayîş'

 

Fehîme wina vat: “Dimayê keyeyî ameyî rijnayîş, nifûs kêm bi. Şarê Kadîfekale taxê cîya vila bî. Bi amancê Şarê Kurdî vila bibo, polîtîkayê taybetî ameyî kerdiş. Hetê  polîtîk de her kesî yewbînan nas kerdêne. Reyke tutêke nêweş kewtibi, bê xebera dadîya ci berdibî nêweşxane. Nika merdimî keyeyê xo de mirenê xebera kesî çin a. Krîz esto, nêweşî esta. Roja ke ez ameya kela, Newroze esta. Şar zaf zêde bi ca nêmendêne. La tewr peyîn destûr dayî Meydanê Gundogdu.”

 

‘Şar seba Denîze zî seba Rahşane zî wuştî serê lingan'

 

Fehîme vat, Rahşan Demîrel 1992 de hemverê qedexekerdişê Newroze û tedayê serê kurdan roja Newroze çalakî kerda û vat: "Ez wextê Berîvane de digane bîya. Rahşane merdimê keyeyê vistewreya min a. Wexto ke xo veşna, ez nêweşxane de bîya. Senîn ke ma eşnawit, ma şî kela.  Her ca însanî bî. Dimayê ke Rahşane xo veşna, roşnayî da dinya. Şar senîn seba Denîze wuşt serê lingan, seba Rahşanî zî wuştî. Rahşane kênaya ma hemine bî."

 

‘Newrozan de destê xo hene kerdêne'

 

Fehîme qalê kênaya xo Denîze kerd û vat: "Her Newroze de wezîfe girewtêne. Denîze Newrozan de bi coş bî. Bi embazanê xo dir şîne Newroze. Cilanê weşik dayîne xo ra, destê xo hene kerdêne. Ala girewtêne."

 

'Roşanê ma yo'

 

Fehîme wina qalê vîrardişê xo kerd: "Ma şîne Newroze. Ma fotografî antî. Xeylêk weşik bîbî. Telefona aye amebi diznayîş. Denîze her Newroze serê sibayî rew wuştêne û şîne meydan."

 

Fehîme peynîya qiseykerdişê xo de Newroza heme şaran pîroz kerd û vat, hêvîya înan aya ke aştî bêro. Fehîme vengdayîşê tewrbîyayîşê Newroze heme şaran rê kerd.