XARPÊT - Xarpêt de rixmê qedexeyê Newroze şarî verê banê HDPyî de govende girewte. Gulîstane Kiliç Koçyigita ke tîya qisey kerd vat: “Şima kamê ke ma rê Newroze qedexe kenê? Eke şima vanê qey pê qedexeyan eşqê ma çîn kenê, şima zaf xelitîyenê.”

 

Rêxistina Partîya Demokratîke ya Şaran (HDP) ya Xarpêtî waşt Meydanê Îstasyonî de Newroze pîroz bikero la walîtîye destûr nêda. Naye ser o partîyijan verê banê xo de eşkerayîye daye. Parlementera  HDPyî ya Mûşî Gulîstan Kiliç Koçyigite zî tewrê eşkerayîye bîye.

 

Hemserekê HDPyî yê Bajarî Ali Yidirimî vera qedexeyê hêrsê xo ard ziwan û vat: “Ma do sey kawayan xover bidê. Ma nê qedexeyî qebûl nêkenê. Ma do tim têkoşîn bikerê.”

Gulîstan Kiliç Koçyigite zî vat: “Şima kamê ke ma rê Newroze qedexe kenê? Waştişê walîtîye çîyo? Çîyo ke zorê walî bêrehet keno çîyo? Ewro Kurdîstan û Rojhilatê Mîyanênî de semedê sereweratişê mazlûman adirê Newroze yeno tavistene. Eke şima vanê qey pê astenkerdişan û qedexeyan eşqê ma çîn kenê, şima zaf xelitîyenê. Şima şarê ma qetil kerd la nêeşkayî nasname, roşan û kulturanê ci ra raqilnê. Ewro bi mîlyonan ma kuçeyan de yê.”

 

Badê qiseykerdişan bi tîlîlî û çepikan govende ameye girewtene.