Yara Kendeş - Hêlîn Asmîn

 

KOBANÎ / ŞEHBA - Hemrayê Rojnamegere Nûjîyan Erhane, ê ke aye dir mîyanê xebatan de ca girewtê û bîyê şahidê têkoşînê aye wina vatî: "Nûjîyane vengê cinîyanê Şengalî bî, mîyanê embazan û karê xo de her tim jîyatî bî. Her tim waştê çîyê newe pêbîyardêne. Fînak nameyê xo ciwîya xo de zî moderne bî. Amancê yewin ê Nûjîyane o bî ke rastîye rayaumûmîye rê neql bikero û serê nê asasî de xebatê xo embazanê xo dir kerdê. Bi rihê Nûjîyanan ma zî karê neqlkerdişê azadîye kenê."

 

Nûjîyan Erhane wexto ke qezaya Xanesore ya serê şaristanê Şengalî de xebere teqîb kerdêne, 3yê Adare ya 2017ine de hetê hêzê Partîya Demokrate ya Kurdistanî (PDK) ra rastê hêrişî amî û birîndar bî. Dimayê 9 rojan ke têkoşînê ciwîyayîşî da, yanê şewa 22yê Adare ya girêdayeyê 23yê Adare de ciwîya xo bedilna. Nûjîyan Erhane serra 2005î de, dest bi karê çapemenîye kerd. Ajansê Nûçeyan ê Cinîyan (JINHA) de û Rojnameyê Şûjine ke bi qerarê KHKyî ameyî padayîşî de muxabîrîye kerd. Sewbîna Nûjîyane Çira Tv de zî programêke pêşkêş kerdêne. Nûjîyane ke her wareyî de xo resna cinîyan û bî vengê înan tewr peynî Şengal de xebetîya. Seba duştê zilmê DAÎŞî de têkoşînê cinîyanê Êzîdîyan dinya rê vila bikero uca de ca girewte.

 

Bi wesîleyê 5in serewextê qetilkerdişê Nûjîyan Erhane, ma mîkrofon dergê hemrayanê aye ke ci dir xebetîyayê kerd.

 

'Neqkerdişê cinîye rolê tewr muhîm a ke  şorêşiye de kay kerd'

 

Rojnamegere Cînda Osman despêkerdişê qiseyanê xo de dîyar kerd ke aye destpêke de Nûjîyane koyê Kurdistanî de vînaya û Nûjîyane karê neqlkerdişî kerdê û wina qiseyê xo dewam kerd: "Mi wexto ke Nûjîyane vîna, aye karê neqlkerdişî kerdê. Dimayê aye ez zî kewta mîyanê karê neqlkerdişî. Min û Nûjîyane têreyde karê neqlkerdişî kerdê. Embaza Nûjîyane enerjîyêke dayê derûdora xo. Nûjîyane her tim bi beşerbîyaye bî. Enerjîya aye merdim ver bi xo ra kaş kerdê. Mi senîn a nas kerd, parekerdişêke mabênê min û aye de virazîya. Bi rastî her tim waştê xoza dir mijûl bibo."

 

'Ma têreyde derbasê Şengalî bî'

 

Cînda mîyanê qiseyanê xo de ard ziwan ke Nûjîyane wayîrê kelecanêke pîl e bî û wina ci de şî: "Ma vînayê Nûjîyane bi kelecanêke senîn nizdî bîyê û derûdora xo şa kerdê. Cigêrayîşêke aye serê xozayî de, heywanî, deştî û koyî de bîbî. Dimayê wextêk Şengal de ferman ame ca, embaza Nûjîyane zî waşt derbasê Şengalî bibo. O wext ma têreyde derbasê Şengalî bî, o wext şerr dewam de bî. Ciwîya Şengalî bi rastîye xeylêk çetin bî. Rewşêke şerrî bîbî, şar mîyanê qaxuyî de bî. La pêwa ke Şengalijî mîyanê hende zorî û zehmetîyan de derbas bîyêne zî, xoverdayîşêke bêemsal mojnayêne dinya. Ma zî ê wextî de derbasê Şengalî bî. Ma waşt ma karê neqlkerdişî dewam bikerê. Ma waşt ma karê xo zêdeyêr avêr bifînê û Şengal de rengê cinîye zafêr vejê avêr. Coka nê Nûjîyane zaf waştê şêro Şengal. Dimayê ê şerrî û lejkerdişî Şengal de zêde bî, vera nê yewî embaza Nûjîyane reyêna waşt şêro Şengal."

 

'Ma her tim teqîbkerdoxê rayîrê çirisîyayîşê azadîye yê'

 

Cindîye da zanayene ke Nûjîyane wareyê neqlkerdişî de resaya amancê xo û wina vat: "Her çiqas ke rewşa Şengalî çetin bî zî,  la duştê nê zehmetîyan û manîyîyan  de Nûjîyane seke rojnamegerêke cinî bi ked, xoverdaye, kelecan û bi şewlê xo heme manîyî derbas kerd û resa amancê xo. Bi rastîye zî awankerdişê neqlkerdişî yê Şengalî de bi kedêke zaf pîl ame ca. Destpêkerdiş de wext o ma resayî Şengalî Nûjîyane 2 tutê şiwaneyî vîna û hema serê înan de xebere viraşt. Xeberê aye înan dir dest pêkerd, a bî arêyoxe. Yanê di 2 serran  de Nûjîyane xeylêk umîdê xo ardî ca. Xeylêk metodê aye yê vurîyaye û vurînayeyî bîbî,  karê neqlkerdişî bi rastîye çetin o û di eynî wextî de zî xeylêke weş o. Nûjîyane morê xo zerrîya hemrayanê xo de verda û ma her tim teqîbdarê rayîrê çirisîyayîşê azadîye yê."

 

'Nûjîyane bî veng û rengê cinîyanê Şengalî'

 

Rojnamegere Dilgeş Aryene zî derheqê ciwîye û vîrameyîşê Nûjîyan Erhane de qisey kerd û nê çîyî ardî ziwan: "Seke yeno zanayene hemraya ma Nûjîyane wexto ke Şengal de şerrê Qezaya Xanesore teqîb kerdo bi zanabîyayîşî amî hedefgirewtiş. Serê şehadetê Nûjîyane de 5 serrî derbas bî. Ma seke kerdkarê çapemenîya azadî karê xo danê kerdiş. La ez eşkena nînan vajî ke cayo ke Nûjîyane verdayo apey de nê, aver şîyo. Fînakê nê yê tewr verçiman de zî nika karo ke Şengal de yeno kerdişî yo. Vera ke Şengal de nika bi desan cinîyê Êzîdî xabatê neqlkerdişî danê kerdiş. Bêşik no netîceyê kede ya Nûjîyane yo. Xeylêk merdimî heta nika Şengal de behsê Nûjîyane kenê. Vera ke Nûjîyane wexto şî Şengal waşt biba vengê cinîyanê Şengalî, coka ke cinîyê Sengalî qirkerdiş û fermanî ra derbas bîbî. Ê wextî de hemraya Nûjîyane bi kameraya xo dejê cinîyanê Şengalî rayaumûmî rê neqlkerd. Nûjîyane bî veng û rengê cinîyanê Şengalî. Keda Nûjîyane bandorêke pozîtîf serê rewşe de kerd. Ez reyna  nê semedî ra bi heskerdiş û bi bêrîkerdişêke pîl, bi hîs û bi hurmet hemraya Nûjîyane ana vîr."

 

'Nûjîyane rastîya cinîyan, veng û qîrayîşê tutan bî'

 

Dilgeşe qal kerd ke Nûjîyane bî rastîya cinîyan,  veng û qîrayîşê tutan û wina ci de şî: "Hemra Nûjîyane qelem û kameraya Gûbetelî û embazîya aye girewt û dewam kerd. Ma nika sey teqîbdarê ê embazan nê karî danê kerdiş. Embaza Nûjîyane embazêke beşerîyaye bî. Her tim ciwîye de beşerîyayêne. Wexto mi destpêkerdişî de Nûjîyane vîna hema bala mi ant. Mi ci ra pers kerd, qey nameyê to Beşerîyaye yo? A zî o wext peşerîya û vat, nê. Mi embaza Nûjîyane di ê wextî de nas kerd. Bi vindertişê xo derûdora ci bi tesîr bîne. Aye vatê mi xo duştê dejî û birînê Kurdistanî de kerdo qalxane. Vat ez seke Qalxaneyê Ganî tewirê hereketî bîya. Nûjîyane dimayê wextêke amî xebatê neqlkerdişî û wextêk derg xebatê neqlkerdişî dayî kerdiş. Tewr peynî zî nê rayîrî de şehîd bî. Embaza Nûjîyane serê rayîrê heqîqetî û rastîye de, rayîrê neqlkerdişî ya ke dinya rê kerdê de ciwîya xo bedilna. Ê wextî de bi paştdayîşê AKP û PDKyî hêrişê qezaya Xanesore ya Şengalî ameyî kerdiş. Nûjîyane ê wextî de waştê rastîya hêrişanê PDKyî neqlbikero. Vera ke amancê nê şerrî o bî ke reyna fermanê Şengalî dorkerde bikero. Nûjîyane ciwîye  awan kerdê û hîsê aye yê xusûsî bî. Di nustîş û şîîranê aye de zî no eşkera bî. A rastîya cinîyan,  veng û qîrayîşê tutan bî."

 

'Bi rihê Nûjîyanan ma karê neqlkerdişê azadî danê kerdiş'

 

Dilgeşe peynîyê qiseyanê xo de nê çîyî vatî: "Embaza Nûjîyane yewêka zaf çalake bî. No çalakbîyayîşê aye yê dora aye de zî fînayê mîyanê hereketî. La na nizdîyayî rewşêke wina de nêbî ke ti ci ra adiz bibê. No seba çalakkerdişê derûdorî bî. Enerjîya aye seba embazê aye zêdeyêr bî. Nûjîyane xusûsîyetê xo yê embazîye her tim pawit û xeylêk reyan seba embazê derûdorî ferdakarîye kerdê. Rengê xo dayê eşkerakerdiş. A bi çalakbîyayîşê xo ameyê naskerdiş. Sey şorişgerîke cinî merdim hende behsê embaza Nûjîyane bikero do kemî bo. Ma zî rayîrê hemraya xo teqîb kenê. Bi rihê Nûjîyanan karê neqlkerdişê azadî danê kerdiş."