AMED - Aktivîsta TJAyî Rûken Zerya Işik Yildiz da zanayene ke tecrîdo giran o ke serê Rayberê PKKyî Abdullah Ocalanî de yo wazenê fikrê ey komele ra dûrî bifînê û vat ganî heme hetî duştê tecrîdî de têkoşîn bikerê.

 

Rayberê PKKyî Abdullah Ocalanî ke bi komployê mîyanneteweyî 1999î de ardî Tirkîya û 23 serrî yo Zîndanê Tîpê Fyî yê Asayîşê Berzî yê Îmralî de  binê tecrîdî de yeno tepiştişî. Avûkatî seba ke pêvînayîş muvekîlê xo Abdullah Ocalanî dir bikerê, muracatê mercîyan kenê la hetê selahîyetdaran ra verpersêke pozîtîf yan zî negatîf nîno dayîş.

 

Serra 2011î ra heta 2019î nêverda Abdullah Ocalan avukatanê xo dir pêvînayîş bikero. Hemsereka KCDyî Leyla Guven zîndan de dest bi grev kerdbî û netîceyê nê grevî de 5 pêvînayîşê avûkatan amebî ca. Prosesê tepiştişê xo de yewin rey  27ê Nîsane ya 2020î de heqê pêvînayîşê telefonî ard ca û serê fikaranê derheqê şert û mercan de, weşîye û adayîşê ey de, 25ê Adare ya 2021î de birayê ey Mehmet Ocalanî dir pêvînayîşêke bi telefonî ardbî ca. Serê pêvînayîşê telefonê dimayî ra serrêke derbas bî û tu malûmat ê wextî ra, ci ra nîno girewtiş. Serê nînan de qaxuyî zêdeyêr benê la selahîyetdarî bêvengîya xo pawenê. Sewbîna  ê ke tewr zêdeyêr tecrîdî ra bi tesîr benê zî tepişteyê zîndanan ê Tirkîya û mintiqayî yê.

 

Aktivîsta Hereketê Cinîyanê Azadan (TJA) Rûken Zerya Işik Yildiz, polîtîkayê tecrîdî yê hemverê Abdullah Ocalanî û tepişteyan de yê, erjna.

 

'Wazenê bi tecrîdî fikrê Birêz Abdullah Ocalanî manî bikerê'

 

Rûken Zerya ramojnayîş kerd ke tecrîdo ke hetê AKP-MHPyî ra yeno ca, polîtîkayêka newe nîya û  tecrîdî dir hewl danê ke fikrê Abdullah Ocalanî serê komele ra bibirnê û wina vat: "Fikrê Abdullah Ocalanî seranserê dinya de asasî yeno girewtiş. Tecrîd qerarêke sîyasîyo û hewl danê vernî ro fikrê ey bigîrê û manî bikerê. Sey her tepişteyêke Birêz Ocalan zî wayîrê heqê bîyayeyî yo. La şexsê ey de hemverê heme tepişteyan de tecrîd yeno ca û di çerçewayê heqî û huqûqî de ke înan eşkera kerdo de her heqê înan yeno manîkerdiş. Fînakê nê yo tewr muhîm,  qedexekerdişê pêvînayîşê keyeyî û pawitoxan dir o."

 

'Bi binpaykerdişê heqan caardişê çinîkerdişî kenê'

 

Rûken Zerya dewamîya qiseyanê xo de wina vat: "Polîtîkayê tecrîdî dir hetê îdarekarîya zîndanan ra hemverê tepişteyan de binpaykerdişê heqan yenê ciwîyayîş. Serra 2000î de derbasê zîndananê Tîpê Fyî bîy û nê dir zî xespkerdişê heqan vejîyayî meydan. Nê dir caardişê seke ke tepişteyî nêeşkenê têreyde bê, bêrê têkaleke  tecrîd ard ca.  Vera nê,  no 2-3 serrî dîmayî de her tim binpaykerdişê heqan, xespkerdişê heqan rojeve de yo. Bi xusûsî prosesê pandemîyî de nêweşîye kerdî behane û heme heqê tepişteyan ê neqlkerdişî meydan ra wedaritî. Sewbîna cigêrayîşê giran ê hemverê tepişteyan de çîyêk newe nîyo. La di prosesê peynî de ferzkerdişê  cigêrayîşê viranî, sey hêrişê ke duştê erjê ahlaqî de vejîyeno vernîyê ma."

 

'A rewşe nêbena bêro qebûlkerdiş'

 

Rûken Zerya qal kerd ke, no wexto peyîn de şaristananê mintiqayî û Tirkîya de, zindanê tîpê cîyayî abîyê û dimayê Tîpê Fyî,  Tîpê Syî zêdeyêr bîyê. Rûken Zerya bale ante serê Tîpê Syî û wina îzah kerd: "Qawîşanê tengan ê Tîpê Syî de 3 tenî manenê. Ê qawîşan de mendiş bi rastî zaf zehmet o. Xo ra ê merdimî mîyanê çar dêsan de yê û hewl danê merdiman pêroyin bê pawitiş verdê û komele ra dûrî bifînê.  No nêbeno bêro qebûlkerdiş. No caardiş caardişêke derheqê şiknayîşê îradeyî û komele ra dûrîfînayîşî yo. La pêwa nê heminan pêvînayîşê keyeyan dir moral û îradeyê tepişteyan zaf berz o. Tever de keyeyî û sazgehê sivîlî paştdayîş danê. Ganî wayîr ro nê paştdayîşan bêro vejnayîş."

 

'Tewr zêdeyêr ma cinîyî ciwîyenê'

 

Rûken Zerya dîyar kerd ke tecrîdo serê Rayberê PKKyî Abdullah Ocalanî de yo û serê komele de yo girêdayeyê yewbînanê û wina dewam kerd: "Şexsê Birêz Ocalanî de serê heme Kurdistanî û Tirkîya de tecrîd yeno ca.  Xusûsî wexto peyîn de bi hepsê keyeyî tecrîdî yenê ca. Binê nê caardişan de zî tehdîdo ke 'Eke ti bibê/a muxalîf, ez o keyeyê to bibedelnî zîndan'  esto. Tecrîd tewr zêdeyêr tesîr serê cinîyan de keno. Bi problemê Kurdan û binê nameyê dînî de cinîyan hepsê keyeyî kenê. No zîhnîyet heta mîyamê keyeyan de zî sîrayet kerdo.  Cenî bi nê tewirî tena keye de bi kar û barê zerî û tutan dir yenê sînorkerdiş. Vera nê tewr zêdeyêr ma cinîyî tecrîd ciwîyenê."

 

'Verpersîyarîya ma heminan a'

 

Rûken Zerya peynîyê qiseyanê xo de zî dîyar kerd ke, ganî vernî ro polîtîkayê tecrîdî yê tesîr serê her hetî kerdo bêro padayîş û  wina peynîyê ci ard: "Vera ke tayêk serê nameyê komele de qerar danê, na rewşe ro yewbînan têmîyanêrî bîya. Seba nê zî tecrîdo ke yeno ca, ewro binê verpersîyarîya her kesî de ya. Çareserîya problemî no yo ke pêvînayîşê Birêz Ocalanî dir bêro ca û di çerçewayê heqî û huqûqî de muzekere bêro kerdiş. Ewro waştena her kesî na ya.  Seba nê zî ganî heme hetê komele,  partîyê sîyasî û  rêxistinê komela sivîle  di na babete de hewldanî de bê. No hewldayîş ganî tena vatişan de nêmano. Ganî tever de bêro qedênayîş."