Rojda Aydin 

 

ŞIRNEX - Dadîya Nûdem Durak, Hatîce Durak vengdayîşê wayîrvejîyayîşî kerd û vat: "Hukmat  Nûdeme û deyîranê ci ra terseno. Seba nê kênaya mi tepişteya û nîna veradayîş. Vengdayîşê mi heme humermendan rê esto, wa seba Nûdeme vengê xo berz bikerê. Ma bibê vengê Nûdeme."

 

Nûdem Durak ke serra 1988ine de bajarokê Dergûle ya Şirnexî de ameye dinya, tutîya xo tîya de derbaz kerd. Nûdeme ke emrê qij de seba eleqeyê xo yê bi mûzîkê kurdî, emrê xo yê ciwantî de dest bi vatişê deyîranê kurdî kerd. Nûdeme yewin rey serra 2012 de seba ke bi kurdî deyîran vat, ameye tepiştiş. Nûdeme dimayê serrêke ameye veradayîş û dimayê demêke kilm bi eynî sebebî ameye tepiştiş û na rey zî 9 mengî zîndan de mende. Nûdeme ke dimayê veradayîşî fek  mûzîkê kurdî vera nêda, dima ra Merkezê Kulturê Mem û Zîn ê girêdayê Şaredarîya Cizîre dest bi mamostetîya erbane kerd. Reyna serra 2015’ine de bi bahaneyê, “bi kurdî deyîran vat” ameye tepiştiş û di dewayê cîya de 19 serrî cezaya zîndanî ci rê ameye dayîş. Nûdema ke 7 serrî yo Zîndanê Girewte yê Tîpê Myê Baybûrtî de tepişte ya, bi xeylêk nêweşîyan kewta. Nûdema ke esteyê ci helênê û problemê çiman ciwîyena, par zî nêweşîya Graves (gutra jehr) kewtw. Nûdeme seba guatrê jehrî emelîyat qebûl nêkena, endîşeya ke vengê ci şêro.

 

Kaykerdox, viraştox û nuştoxê Amerîka John Kusack, kaykerdoxa tîyatro û sînemaya Brîtanya Maxine Peake û lîberal û cupawitoxê Amerîka Mark Ruffalo bi parekerdişê xo yê serê medyaya dîjîtale de paştdayîş dayî Nûdeme.

 

Dadîya Nûdeme, Hatîce Durak şarê dinya û Tirkîya rê vengdayîşê hîsgêrî kerd û vat, heme kesî wayîrê Nûdeme vejîyê.

 

‘7 serrî yo tepişte ya'

 

Hatîce, ard vîr ke kênaya ci 7 serrî yo tepişte ya û wina vat: "Kênaya mi hûnermend bî û Cizîr de perwerdeyê erbane dayîne tutan. Demo ke ameye tepiştiş zî wendekarê ci xeylêk xemgîn bî. Kênaya mi tena hunermend bî. Tu sûcêke aye bîn çinbi. Kênaya mi tim bi kurdî deyîranê xo vatêne. Seba ke bi kurdî deyîran vatêne, kênaya mi ameye tepiştiş. Sewbîna reyan bi bi tirkî zî vatêne. Ziwanê ma sey verê o wext zî qedexe bi û seba nê kênaya mi ameye tepiştiş. Tutanê ma bêsûc û bê sebeb zîndanan de gênê û pûyînenê."

 

‘Şewe erzenê serê qawîşanê înan'

 

Hatîce, wina qal kerd: “Demo ke bi kênaya xo dir mi qisey kerd, vana zulmêko pîl serê înan de yeno kerdiş. Her şewe erzenê serê qawişanê înan û cigêrayîş kenê. Demo ke cigêrayîş kenê, pêro hacetanê înan vila kenê. Kênaya mi vatêne, bi şewe rakewê. Her şewe embazêke înan nobete gêna. Hacetê ke ma ci rê şawenê, nêdanê înan û reyna peyser şawenê. Bi zanebîyayîş serê tutanê ma de zulmêk yeno kerdiş."

 

‘Aye tu çîyêk nêkerdo, tena deyîran vata'

 

Hatîce, bale ant serê nêweşîye ci û vat: “Nika nêweşîya aye ya guatirê bi jehr vejîyaya. Sewbîna esteyê ci helênê. Sewbîna çimê ci zî dejenê. Par wexto ke ma telefon de qisey kerdêne, vengê ci xirab ameyîne, labelê nêvatêne. Dimayê ke rewşa aye giran bî, îdarekarê zîndanî aye berda nêweşxaneyê Erziromî û doktoran vato, nêweşîya guatirê bi jehrî kewta. Doktorî vato, ‘ganî ma to emelîyat bikerê.’ Labelê kênaya mi vato, ‘ez hunermend a’ û nê ser de doktorî vato, o wext emelîyat nêkenê û derman dayê ci. Par ra heta nika seba tedawî di rey berdê nêweşxane. Sewbîna zîndan de bi dermanan tedawîya xo dewam kena. Aye nêbenê nêweşxane nêanê. Hunermendêke seba ke deyîran vata, senîn yena tepiştiş. Aye tu çîyêk nêkerdo, tena deyîran vato."

 

‘Wa hukmat vengê Nûdeme bieşnawo’

 

Hatîce, tewr peyîn wina vat: “Eke hunermendê tirkî bîne, do wayîrê vejîyayîşê pîl ameyîne kerdiş û dewlete bînan de çîyêk wina çin o. Ma wazenê wa hukmat vengê Nûdeme bieşnawo û wa serbest vera bidê. Hunermendê dinya û Tirkîya de seba Nûdeme wayîrvejîyayîşêke esto û ma spasîya înan hemine kenê. Ma wazenê heme kes bibo veng û bibê  awazê Nûdeme. Hukmat Nûdeme û deyîranê ci ra terseno. Seba nê kênaya mi tepiştê û nîna veradayîş. Vengdayîşê mi heme humermendan rê esto, seba Nûdeme vengê xo berz bikerê. Ma heme bibê vengê Nûdeme. Ma destûr nêdê deyîrê ma bêveng bimanê. Tena Nûdeme ney, ez wazena pêro tepişteyê nêweşî bêrê veradayîş."