RIHA - Çalakîya 'Nobeta Edaletî' ya Keyeyê Şenyaşarî 382 rojî yo domnena û keyeyî ewro no mesaj pare kerd: "Di seserra 21ine de ma zî sey Dîyojenî mîyanê roje de verê edlîyeyî de, ro edalet gêrenê." 

 

14ê Hezîrane ya 2018ine  de merdim û pawitoxê Parlementerê AKPyî Îbrahîm Halîl Yildiz hêrişê dikanê Keyeyê Şenyaşarî yo ke Pirsûsî de yo kerd. Hêrişî de mêrde û 2 lajê  Emîne Şenyaşare ameyî qetilkerdiş û lajê aye Ferît Şenyaşarî zî  bi birîndarî xelesîya. Seba muhakemekerdişê qatilan    û veradayîşê Fadil Şenyaşarî; Emîne Şenyaşare û lajê aye Ferît Şenyaşar  9ê Adare ya serra 2021î de verê Edlîyeyê Rihayî de dest bi çalakîya 'Nobeta Edaletî' kerdbî. Çalakîya  keyeyê roja 382ine de dewam de ya.  Dadîya Emîne Şenyaşar vera ke nêweşe bî nêeşka tewirê nobete bibo, coka  Ferît Şenyaşar nobete bi tenî domna. 

 

Keyeyî serê hesabê xo yê Medyaya Komelkî de nê mesajî pare kerdî: "Di seserra 21ine de ma zî fena Dîyojenî mîyanê roje de verê edlîyeyî de, ro edalet gêrenê. Heta ke edalet bêro ca ma do duştê zîhnîyeto ke qanûnan dano hetê ke û hukmê serdestan fîneno vîyartbarîye,  têkoşîna xo bidomnê."