Sema Çaglak - Şîrîn Çinar

 

 AMED - Cinîyê ke beşdarê Newroza Amedî bî bale antî tecrîdê serê Rayberê PKKyî Abdullah Ocalanî û dîyar kerdî ke heta Abdullah Ocalan azad nêbo do şarê kurdî nêvender.

 

Newroza emsar bi sloganê "Dem demê serkewtişî yo" ame pîrozkerdiş. Meydanê Newroze ke hetê bi mîlyonan kesan ame pirkerdiş, mesajê şikinayîşê tecrîd û azadîya Rayberê PKKyî Abdullah Ocalanî yê fîzîkî bi. Cinîyê ke beşdarê Newroza Amedî bî dîyar kerdî ke aştî û azadî bi azadîya Abdullah Ocalanî mimkun a.

 

'Heta ke Abdullah Ocalan azad nêbo ma do kuçeyan de bê'

 

Behîye Sevîm vat, heta Abdullah Ocalan azad nêbo ê do têkoşînê xo nêvindarnê û vat: "Heta ke serekê ma azad nêkerê, berê zindanan anêkenê û do şarê kurdî nêvindero.  Heta ke dilopêke gonî canê ma de bibo zî ma do bi têkoşîn serekê xo azad bikerê. Ma do kuçeyan de bê û dewaya heqê xo bikerê. Ma aştîyêk mende û merdimayî wazenêç. Ma vanê ke bi kuştin û tepiştiş kurdî nêqedênê. Heta ke ma sax bê ma do pey dewaya xo de şêrê. Waştişê ma aştîye yo. Ma wina vanê la ê hêrişê ma kenê. Ma dadîyê kurdan merg nêwazenê."

 

'Wa tecrîd wedarnê û berê Îmraliyî abikerê'

 

Hamdiye Tekîn zî vat, aştî bi azadkerdişê Abdullah Ocalanî mumkin a û wina vat: "Ma aştîye wazenê. Heme kes zî zaneno ke aştî û demokrasî bi azadkerdişê Serekî mumkin a. Wa tecrîd wedarnê û berê Îmraliyî abikerê. Sewbîna wa tepişteyê sîyasî azad bibê û teda û zordestî serê şarî ra bêro şikinayîş."

 

'Şarê kurdî hemverê înan de sere nêtewêneno'

 

Mensûre Gorkî zî wina vat: "Çîyê ke na newroze de kerdî zilm û heqaret o. Bi bahaneyê tewir tewir ma asteng kerdî. Xeylêk rey ma rê cigêrayîş ferz kerdî. No muamele nîno qebûlkerdiş. Bi seyan welatijî bi nê nêzdîbîyayîşî ameyî tacîzkerdiş. La ê çiqas hêriş bikerê zî wa baş bizanê şarî kurdî hemverê înan de sere nêtewêneno! Tepişteyê ma xora binê tecrîdêk giran de yê. La ma bi xo zî tecrîd ciwîyenê. Zilmo ke Newroze de ame kerdiş, tecrîdo tewr pîl bi. Heta êa do wina dewam bikero? Bi zanebîyayîş no ame kerdiş."

 

'Na Newroze do biba wesîleya azadîya Abdullah Ocalanî'

 

Tewr peyîn zî Sudiye Toprak qisey kerd û vat: "Bi 23 serrî yo Abdullah Ocalan binê tecrîdêk giran de yo. Ma derheqê rewşa ey de tu xebere nêeşkenê bigîrê. Keye û avûkatê ci zî nêeşkenê tu xebere bigîrê. Şarê  kurdî wazeno Serekê xo ra zanayîş bigîro. Na Newroze do biba wesîleya azadîya Abdullah Ocalanî. Çira nê zilm û heqaretî bi ma kenê?  Bes o êdî ke nê zilmî bi ma kenê. Wa Selehattîn Demîrtaş zî bvera bidê. Bê sûc û bê sebeb heme sîyasetmedaranê ma tepiştî."