STENBOL- Muracatê pêvînayîşî yê avûkatanê Buroyê Huqûqî yê Asrinî bi bahaneya cezaya dîsîplînî ya 3 mengan dîyaya Rayberê PKKyî Abdullah Ocalanî ame redkerdene.

 

Avûkatanê Buroyê Huqûqî yê Asrinî seba ke Rayberê PKKyî Abdullah Ocalanî, omer Hayrî Konar, Hamîlî Yildirim û Veysî Aktaşî de “cade” pêvînayîş bikerê 22ê teşrîna peyêne ya 2021î de muracatê Hakîmîya Înfazî ya Bursa kerdbi.

 

Eynî roje cewab dîya avûkatan û eşkera bi ke Ocalanî rê di qedexeyê pêvînayîşî dîyayo. Hakîmîya Înfazî qedexeyê pêvînayîşî yê 6 mengan sey bahane mojnabi. Hakîmîya Înfazî seba astengkerdişê keyeyan zî cezaya dîsîplînî ya ke 18ê tebaxe de dîyabî mojnaye.

 

Rixmo ke qedexeyê pêvînayîşê keyeyan 18ê teşrîna peyêne ya 2021î de qedîyabi seba ke cewab nêdîya muracatanê keyeyan, avûkatan 28ê adare de reyna muracatê Hakîmîya Înfazî ya Bursa kerd. Hakîmîya Înfazî 29ê adare de cewab da û muracat red kerd. Hakîmîye sebebê redî de vato ke derheqê Abdullah Ocalanî de cezayêka dîsîplînî est a. Hakîmîye vat: “Hetê Serekîya Heyetê Dîsîplînî ya Îmraliyî ra 3ê sibata 2022yî de cezaya dîsîplînî ya 3 mengan dîyaye û na ceza 21ê sibate de ameye qetîkerdene.”

 

2018 ra nata 10 reyî cezaya dîsîplînî dîyaye Abdullah Ocalanî. Avûkatan dima ceza rê îtîraz kerd.