Rojda Aydin

 

ŞIRNEX - Cinîyê Botanî bale antî serê rojbîyayîşê Rayberê PKKyî Abdullah Ocalanî û vatî: "Bi girankerdişê tecrîdî dir problemê kurdî nîno çareserkerdiş. Problem bi azadiya serekî do safî bibo.  Azadîya serekî zî bi yewîye mimkin a." 

 

Amadekarîyê seba pîrozbîyayîşê rojbîyayîşê Rayberê PKKyî Abdullah Ocalanî dewam kena. 73in rojbîyayîşê Abdullah Ocalanî de welatî do reyke bîn verê xo bidê dewa Amaraya qezaya Xelfetî ya Rihayî. Cinîyê Botanî bi minasebetê 4ê Nîsane ajansê ma rê qisey kerdî.

 

‘Ma do her wext azadî bîyarê ziwan’

 

Endama Meclîsa Dadîyanê Aştîye ya Silopî Zeynep Begenîr vat ke ê wazenê cuyêka têduşt biciwîyê û vat: “Kesê ke vanê ma merdim ê seba tepişteyan û Îmraliyî vengê xo berz bikerê. 4ê Nîsane nêzdî beno û zerrîya ma xemgîn a. No demêk derg o serekê ma mîyanê çar dêsan de yeno tepiştiş û tecrît serê ci de yeno kerdiş. Ewro tena serek binê tecrîdî de nîyo. Heme tepişteyê ke mîyanê çar dêsan de yenê tepiştiş binê tecrîdî de yê. Xeylêk tepişteyê nêweşî zî mîyanê çar dêsan de nînê veradayîş. Ewro no tecrît serê înan de yeno kerdiş. Tepişteyê ma verê mergî de yê.”

 

‘Seba safîkerdişî ganî tecrîd wurzo’ 

 

Zeynebe dewam de vat: "Demêko derg o tecrîdêk giran yeno kerdiş. Ma tu xebere nêgînê û ma rewşa ci ra endîşeyîn ê. Destûrê nêdanê ke keye û avûkatê ci şêrê pêvînayîş. Wa dewletê mîyanneteweyî çimanê xo hemverê babete de nêgîrê û wa bêveng nêbê. Seba safîkerdişî problemê kurdî zî ganî tecrît bêro wedaritiş û serek azad bibo. Encax serek eşkeno nê problemî safî bikero. Hêvîya ma aya ke serek no rojbîyayîşê xo yê emsarî de azad bo.”

 

‘Azadî û aştî zî bi serekî mimkun a’

 

Endama Meclîsê Dadîyanê Aştîye ya Silopî Besna Ozturk zî rojbîyayîşê Abdullah Ocalanî pîroz kerd û wina vat: “Zîndanan de tecrîdêk pîl esto. Bi girankerdişê tecrîdî dir problemê kurdî zî kûr beno. Wazenê îrade û nasnameyê kurdan çin bikerê. Seba nê zî şer zêde kenê. Eke serek azad bibo, do problemê kurdî zî safî bibo. Seba nê zî mifteyê safîkerdişî Îmrali de yo. Ma wazenê berê Îmrali abibo. Waştişê ma yê emsar oyo ke  serek azad bo û mîyanê şarê xo de bo. Hêvîya ma aya ke nê 4ê Nîsane de azadî û aştî awan bibo û no zulm peynî bibo. Xêrcê azadî û aştî tu waştişêke ma çin o.  Azadî û aştî zî bi Serekî mimkin a.”

 

‘Hemverê tecrîdî vengê xo bikerê yew’

 

Dadîya bi nameyê Behiye Bîlîr zî 4ê Nîsane pîroz kerd û vat: "Ez veng dana wareyê mîyanneteweyî ke wa veng bidê, vengê kurdan. Hêviya ma aya ke 4ê Nîsane biba wesîleya rojanê weşan. Nika hemverê şarê Kurdî û tepilteyan de tecrîdêk esto. Bi girankerdişê tecrîdî dir rewşa tepişteyan zî tehluke de ya. Ma zî sey heme şarê dinya serekê xo wazenê. Ma zî waştişê ziwan, nasname û kulturê xo kenê. Ma nêwazenê êdî zerrîya dadîyan biveşo. Vengdayîşê ma çar parçeyê Kurdistanî ra oyo ke hemverê bindestî vengê xo berz bikerê. Ma 4ê Nîsana emsar bi zerrîyêka xemgîn pêşwazî kenê. La seba şiknayîşê tecrîdî wa vengê xo bikerê yew û wurzê serê lingan. Ganî ma tecrîd bişikinê û serekê xo azad bikerê.”