Medya Uren

 

AMED - Mewlûde Çinaklî ke bi karê pesdewarî û ramitişî debara xo kena wina vat: "Ez karê xo û Hevsel ra hez kena. Labelê her ke şino Hevsel de zî, girîngîyê karê ramitişî û pesdewarî yeno vurnayîş. Cayê ke ma  debara xo bikerê, ma zirar vînenê. Krîzê ekonomî kûr beno, kes feqîran nêvîneno û no zî karkerê sey ma çin keno."

 

Bi destpêkerdişê wisarî dir bax û baxçeyê Hevselo ke hetê UNESCOyî ra sey mîrasê dinya ameyo ramojnayîş, rengê cinîyan dîyar beno. Karê ramitişî û pesdewarî de tewr zêde cinî xebityenê û hevsel zergûn kenê. Hemverê krîzê ekonomî ke Tirkîya û herême ver bi qedênayîşî de beno, tewr zêde cinî têkoşîn kenê û her ware de zî girîngîyê bîyayîşê xo ramojnenê.

 

Mewlûde Çinaklî ke Berê Qesrî yê Amedî de ciwîyena, sereyê wisarî dir yena bajar, Hevsel de heywanan ewnîyena û eke rewşa ekonomîye dest bido zî ramitiş kena. Mewlûde zî sey xeylêk roniştixê uca 6 mengê xo dewe de derbas kena û hewl dana bi xebata kerda, debara xo bikera.

 

Mewlûde tena xebityena

 

Mêrdeyê Mewlûde çend serrî verê dinyaya xo bedilnayo û kênaya ci ke mekteb wanena verê ci de manena. Aye cayêk ra meaş nêgîna û vana ke tena çimeyê aye ya debare xoza ya. Mewlûde bi qasê 10 serran o serrê herra Hevselî de karê ramitiş û heywanî kena. Mewlûde ke karê xo ra hes kena, tena gerreyê çinbîyayîş û krîzê ekonomî kena. 

 

Bi karê ramitişî û pesdewarî debara xo kena

 

Mewlûde saetê serê sibayî de yena Berê Qesrî yê Hevselî. Bi roje dir yena mangayanê xo vejena. Êmê mengan dana înan û dima ra  doşena, şitê xo gêna û dorê saete 10ine agêrana keye. Reyke bîn zî saete 1î de yena, na rey zî cayê înan pak kena, êmê înan dana û înan vejena. Mewlûde ma rê wina qalê karê xo kena: "Karê ma bi no hawa derbaz beno. Dimayê mengêke dima zî ma do dest bi ramitiş bikerê. Seba karê ramitişî zî ma do şêrê dewan û 6 mengan uca de bimanê. Uca de ma ramitiş kenê, heywanan wey kenê. Karê dayîş û girewtişî zî kenê. Ma bi nê rengî hewl danê ke debara xo bikerê."

 

'Hevsel û girîngîyê karê ma yeno vurnayîş'

 

Mewlûde vana verê ez mêrdeyê xo dir ameyîne kar labelê ez bi tena mendêne û barê mi giran bîne. Mewlûde wina dewam kerd: "Kênaya mi verê mi de mekteb wanena. Hewl dana aye bidî wendiş. Seba nê nêeşkena mi dir bibo hetkar. Bêguman karê xo ra hez kena. Heywanan ra hez kena û boya Hevselî ra hes kena. Labelê no kar zehmet o. Her ke şino zî Hevsel yeno vurnayîş û bi krîzî dir zî girîngîyê karê ke ma kenê yeno vurnayîş. No zî beno sebebê nêweşî."

 

'Demo ke yena tîya boya mi hîra bena'

 

Mewlûde heskerdişê xo yê xoza qal kerd. Demo ke şiwanî kena, heywanan agêrena bi nameyê înan veng dana. Mewlû de estore xo ra vana Nazli, mangaya xo ra zî vana Nazlican. Mewlûde wina vana: "Ez mûsaya înan û demo ke yena tîya boya mi hîra bena. Teberê debare dir têkilîyêk ma yê cîya zî aver şino."

 

'Kes feqîran nas nêkeno'

 

Mewlûde vat ke Tayîp Erdogan meaş nêdeno û welatijan rê hetkarî nêkeno. Mewlûde wina dewam kerd: "Coka welatijî binê feqîrîyêk pîl de yê. Her kes bêkar o. Ma zî bêkar ê û nêeşkenê karêk bivînê. Ma debara xo bi no hawa kenê. Eke şit bibo ma roşenê. Çinbo zî ma heme mesrefan cêbê xo ra danê. Cayê ke ma feyde bigîrê, ma zirar vînenê. Dewlete ra tu hetkarî nîna. Kes feqîran nas nêkeno. Krîz her ke şino kûr beno û rewşa ma zî xirab bena. Hêvî kena ke ganî safî bibo."