MERKEZÊ XEBERAN - Kombîyayîşê Hemserekanê Cinîyan ê Bajaran de Hemsereka Pêroyî ya HDPyî Pervîn Buldan qisey kerd û vat: "Ma paştîya xo danê hêzê xo. Cinîyî do sibayanê roşnîyan awan bikerê."

 

Hemserekê Cinîyî yê HDPyî yê Bajaran, Anqara de kom bîyî. Kombîyayîş de verî Pervîn Buldan qisey kerd.

 

Pervîne destpêk de wina vat: "Tay embazê ma nika tepişte yê, tay embazê ma zî surgunkerde yê. Ma nînan selam kenê."

 

Pervîne bale ant serê nêweşîya Aysele û vat: "Ma Aysele Tugluk rê zî heskerdişê xo şawenê. Heta ke Aysele Tugluk û tepişteyê nêweşî yê bînî bêrê veradayene, ma do têkoşînê xo rê dewam bikerê. Bêguman têkoşînê ma yê cinîyan polîtîkayanê zulmî do birijnê."

 

Pervîne dîyar kerd ke îqtîdar têdûştî nêverdayo û vat: " Îqtîdaro nikayên bingeyê bêdûştîye de ronîyayo. Ma her ca de têkoşînê xo, tewrbîyayîşê xo û temsîlîya têdûşte xo rê kenê krîterê verênî. Ma sîstemê xo yê hemserekîye, temsîlîya têdûşte nê krîteran reyde anê ca. No sîstem, netîceya têkoşînê cinîyan de ame destvistene."

 

Perwîne dewam de bale ant serê rewşa cinîyan û vat: "Cinîyî nika prosesê zor û zehmetî de yê. Ma hê vera pederşahîye, sîstemê serdestîya camêrdan, çetebîyayîşî, xizanîye, talan û dizdîye têkoşînêkê pîlî kenê. No karêko asan nîyo. La belê têkoşînê ma heqdar û meşrû yo. Ma do sibayanê roşnîyan awan bikerê."

 

Pervîne tewr peyîn wina vat: "Sey HDPyî bi taybetî sey Meclîsê Cinîyan ma taxan, kuçeyan ûsn de kombîyayîşî, kargehî kerdî. Nê prosesî de meclîsanê ma yê cinîyan, hemserekanê ma yê cinîyan kedêka pîle daye. Ez pê bawer a ke no têkoşînê HDPyî do pîl bibo. Ma paştîya xo danê hêz xo, şarê xo, cinî û ciwanan."

 

Dimayê qiseykerdişê Pervîne, kombîyayîş çapemenî rê padaye ame dewamkerdiş.