STENBOL - Cenazeya Mehmet Sevînçî zîndan de bi hawayêke bi guman dinyaya xo bedilnaye, pêwa astengîyê polîsan bi sloganê, "Şehîdî nêmirenê" û "Biciwîyo xoverdayîşê zîndanan" ame definkerdiş.

 

Tepişteyo sîyasî Mehmet Sevînç (63) ke Zîndanê Tîpê T yê Akhîsarî  Manîsa de ameyîne tepiştiş, 3yê nîsane de bi hawayêke guman gonîya rijîya serê mezgê ey û ey wedarnayî nêweşxane. Mehmet, nêweşxane de dinyaya xo bedilna. Cenazeya Mehmetî ewro Goristanê Balçikî yê qezaya Gebze ya Kocaeliyî de ame definkerdiş. Merasîmê cenazeya Mehmetî de rêxistinê Partîya Demokratîke ya Şaran (HDP) yê qezayanê Darica, Gebze, Tuzla, Çayirova, Kartal û Pendîkî, endam û îdarekarê Komeleya Paştdayîşê bi Keyeyê Tepişteyan û Hikûmwerdoxan ê Marmarayî (MA TUHAY-DER), Federasyonê Komeleyan ê Huqûq û Paştdayîşê bi Keyeyê Tepişteyan û Hikûmwerdoxan ê Medî (MED TUHAD-FED) û xeylêk welatî amade bî. 

 

Bahaneyê astengî 

 

Vernîya definkerdişê cenazeya Mehmetî, polîsan xeylêk astengî vet. Polîsan nêverdayî ke cenazeya Mehmetî Goristanê Nene Hatun ê Daricayî de bêro definkerdiş. Polîsan îdia kerd ke do ziyan bireso daranê goristanî û waştî ke cenaze Goristanê Balçikî de bêro definkerdiş. Pêwa heme hewldayîşan keyeyî zî cenaze berd Goristanê Balçikî. 

 

Nêverdayî rojnamegerî bikewê goristan 

 

Vernîya cenazeya Mehmetî, polîsan goristan kerd binê ablûqa, nêverdayî rojnamegerî bikewê goristan û dîmenan biancê. 

 

Pêwa astengkerdişan zî cenazeya Mehmetî, bi girseyî û bi slogananê "Şehîdî nêmirenê" û "Biciwîyo xoverdayîşê zîndanan" ame definkerdiş. 

 

Keyeyê Sevînçî şînê xo Taxa Pîrî Reîs de dayî ro.