COLEMÊRG - Hemsereka qezaya merkezî ya Colemêrgî Sînem Seven reaksîyon hemverê polîtîkayê tecrîdî yê serê Rayberê PKKyî Abdullah Ocalanî û tepişteyan da û vat, seba tecrîd peynî bibo, do heta peynî têkoşîn bikerê.

 

Tecrîdê giran yê serê Rayberê PKKyî Abdullah Ocalanî dewam keno. Muracatê avûkat û keyeyan yeno redkerdiş. Heto bîn ra zî polîtîkayê tecrîdî tesîr serê heme zîndanan kerdo. Binpaykerdişê heqan ê serê tepişteyê nêweşan zî dewam kenê û waştişê înan bê cewab manenê.

 

Hemsereka qezaya merkezî ya Colemêrgî Sînem Seven derheqê tecrîdê serê Rayberê PKKyî Abdullah Ocalan û tepişteyan de ercnayîş kerd.

 

‘Bi pandemî dir binpaykerdişî zêde bî’

 

Sînem Seven dîyar kerd ke binpaykerdişê heqan roj bi roje zêde benê û tepişteyê nêweşî bi hawayêke baş nînê dermankerdiş, pandemî bahane kenê û heqê dermankerdişê tepişteyan asteng kenê. Sîneme wina vat: “Tepişteyê ke benê nêweşxane bi kelepçe derman kenê. Tepişteyî hemverê nê vejênê, qebûl nêkenê û peyser yenê zîndan. Demo ke nêweşxane ra agêrenê 20-25 rojan kenê koxuşanê karantîna. Binpaykerdişê heqan bi pandemî dir zêde bî. Pandemî de pêvînayîşê keye û avûkatan ame  astengkerdiş. Tepişteyan surgunê cayê durî ke keyeyê înan ra dûrî yo kenê.”

 

‘Tepişteyî terkê mergî yenê kerdiş’

 

Sîneme var, serranê 90î ra heta nika teda û zilmê zîndanan dewam keno û verê ra heta ewro dewam kerdo û vat: “Zîndana de binpaykerdişê heqan roj bi roje pîl beno. Her aşme zîndanan de merg yeno ciwîyayîş. Xeylêk  merdişan binê nameyê krîzê qelbî ramojnenp. Netîceyê otopsî zî rastiyan nîşan nêdano. Demê peyîn de otopsîyê ke yenê redkerdiş yan zî raporê seba tepişteyê nêweşan yenê dayîş,  bi sebebê siyasî yenê dayîş. Bi talîmatê îqtîdarî raporê eşkenê tepişteyî bimanê danê tepişteyanê nêweşan. Tepişteyan terkê mergî kenê. Tepişteyê ke dinyaya xo bedilnenê zî wesayît û tabut nêdanê. Seba înan tena Kurdbîyayîşê ma qîmê her çî keno. Merdan rê îşkence kenê. Hêrişê goran kenê.”

 

‘Bi serekî dir şarê Kurdî zî binê tecrîdî de yo’

 

Sîneme bale ant serê tecrîdê Rêberê PKKyî Abdullah Ocalanî û wina qedêna: “Tecrîd serê heme zîndanan û şarê kurdî de bi ca yeno. Îqtîdar baş zano ke  tesîrê Birêz Ocalanî serê Kurdî de pîl o. Na rewşe de tecrîdkerdişê Birêz Ocalanî yeno manaya tecrîdkerdişê şarê Kurdî. No serrêke zêde yo tu xebere Birêz Ocalanî ra nîna girewtiş. Pêvînayîşî ameyê qedexekerdiş.  AKP-MHP baş zanê ke Kurdî yew vatişê serekê ra xo ra ewnîyenê. Seba nê pêvînayîşan asteng kenê. Bi wedaritişê tecrîdê serê serekî do  tecrîdê zîndanan ê serê şarê Kurdî zî wurzo.”

 

Sîneme sewbîna ard ziwan ke seba tecrîd peynî bibo do heta peynî têkoşîn bikerê.