Yara Kendeş

 

KOBANÊ - Îdarekara Heyetê Ekolojîye ê Kantonê Kobanî Emîne Wêso dîyar kerd ke Rojawan bi ameyîşê wisarî dir xemilya û welatî zî dest bi ramitişî kenê û vat: "Xozaya hende weşe yena talankerdiş û texrîpkerdiş, ganî Rêxistinê Pawitişê Xozaya Dinya rayîr nêdo talankerdişî."

 

Bi ameyîşê wisarî dir xoza xo newe kena û newebîyayîşê xoza tesîr serê cuya merdiman kena. Pêwa hêrişê ke yenê kerdiş zî welatî bi ameyîşê wisarî dir dest bi ramitişî kenê. Xebatê ke hetê Heyetê Ekolojî yê Kantonê Kobanî ra yenê kerdiş, girîng ê. Çarçewaya xebatan de 4ê Nîsane de nêzdîyê 10 hezar darî ameyî vilakerdiş.

 

Emîne Wêso, îdarekarîya Heyetê Ekolojî ê Kantonê Kobanî de ca gêna û bale ante ameyîşê wisarî û xebatê ke yenê kerdiş.

Xususîya adar û nîsane... 

 

Emîneya ke serra 2019 de tewrê xebatanê Heyetê Ekolojî yê Kantonê Kobanî bîye, destpêkê qiseykerdişê xo de wina bale ant serê seba kurdan wisar yeno çi mana: "Nika mewsîmê wisarî yo. Her ca zergûn o, her ca bi zergûn xemilya yo û merdimî kêfweş keno. Sewbîna menga adare de Newroze, menga nîsane de rojbîyayîşê Rayber Apo yo. Seba şarê Kurdî wisar her wext  taybet o û sewbîna kurdî xozaya xo de her wext girêdayê herra xo yê."

 

10 hezar darî ameyî ramitiş

 

Emîne, dîyar kerd ke Desteyê Ekolojî dest bi hemleyêke newe kerd û vat: "Ma 4ê Nîsane de xeylêk şitlê daran vila kerd û dayî sazgeh û dezgehan. Xeylêk cayan de ma gulan ramit. Bi temamî merdim eşkeno vajo nêzdîyê 10 hezarî darî ameyî vilakerdiş. Helbet mewsîmê wisarî xozaya xo xemilnena la cinî zî  bi destê derûdorê xo xemilnena."

'Efrîn cenetê Kurdistanî yo'

 

Emîne, dewam de wina vat: "Cinî hetê ramitişî de bi rastî zaf kede dana. Rojawan bi xozaya xo yeno naskerdiş, bi xususî zî herêma Efrînî. Herêma Efrînî cenetê Kurdistanî ya. Efrîn demê wisarî de tewr zêde weş beno. Vilî abenê, koyê ci bi temamî kesk benê. Sewbîna dadîyê emrê pîlî zî o wext dest bi komkerdişê vaşan kenê. Bi nê vaşan wisarî de dermanan viraznenê. Efrîn bi dermangeh yeno naskerdiş. Bi darê xo yê meywe û zeytun, îcîran yeno naskerdiş."

 

‘Xoza yena talankerdiş û texrîpkerdiş' 

 

Emîne, vat ke nika xoza bi xususî yena talankerdiş û texribkerdiş û wina vat: "Dewleta Tirkî û çeteyê girêdayê ci hêrişê xozaya Herêma Efrînî kenê. Pêwa birnayîşê daran nika zî hewl danê daran kok ra vejê. Bi metodê cîya xoza texrîp kenê. Ê darê zeytunî yê ke 100 serrî birnenê û roşenê. Çîyê ke yenê kerdiş hemverê exlaq û merdimayî û xoza yo."

 

'Ma do pawitişê welatê xo bikerê'

 

Emîne tewr peyîn veng da Rêxistinê Heqê Merdiman, Rêxistinê Pawitişê Xozaya Dinya û vat: "Ganî rayîr vera talankerdiş û xirabkerdişê xoza bêro padayîş. Ma do heta peynî zî pawitişê herre û welatê xo bikerê."