STENBOL - Merdimê tepişteyan ke hemverê îhlalkerdişê heqan û merdişê zîndanan peynî bibê, Nobeta Edelatî dewam kenê û dîyar kenê ke tutê înan tehdîdê mergî gênê û seba nê ganî her kes wayîrê tepişteyan û "Nobeta Edeletî" vejîyê.

 

Îhlalkerdişê heqan ê zîndanan dewam kenê û keyeyê tepişteyan bi amancê nê îhlalkerdişî peynî bibê Amed, Wan, Îzmîr û Stenbol de Nobetê Edeletî dayî destpêkerdiş û dewam kenê. Stenbol de keyeyê tepişteyan vatî, ‘Ma merdişê zîndanan nêwazenê, cuye pawenê' ÎHD û bi sloganê, ‘ma destûr nêdanê merdişan' verê ATKyî de çalakîya nobeta ya mengêke kerdî. Dimayê çalakîya xo verê Edliyeyê Stenbolî yê Çaglayan dewam kerdî. Hewteyê diyîn ê çalakîye de qeymeqamtîyê Kagithaneyî de çalakîya keyeyan 15 rojan qedexe kerd. Dimayê nê verê Edliyeyê Bakirkoyî de dewam kerdî û nê zî Qeymeqamtîyê Bakirkoyî de mengêke qedexe ard.

 

Merdimê tepişteyan dîyar kerd ke do her ca de nobeta xo ya edaletî dewam bikerê.

 

‘Wazenê hemverê merdişan de bêveng bimanê'

 

Dayîka Yakup Akman ke zîndanê tîpê Fyê Hûmara 3ine Sîlîvrî de tepişte yo, Fînce Akman dîyar kerd ke amancê bale biancê serê rewşa tutanê xo verê Edlîyeya Bakirkoyî de nobetêk kerdî la her hewte rastê astengîyan ameyê û vat, polîsê camêrdan înan destbend kerdo û vat: "Seba cenazeyê ke vejênê ê kurdan ê her kes bêveng o. Ma nêwazenê tabutî zîndanan ra vejîyê. La ê ma zî destbend kenê."

 

Seba keyeyan vengdayîş

 

Fînce veng da heme dayîkê tepişteyanê edlî zî û wina vat: "Bêrê ma pîya têkoşîn bikerê. Wa tabutê tutanê ma zîndanan ra nêvejîyê. Tutê ma baş kewenê zîndanan û tabutan danê ma. Dewlete îşkence tutanê ma rê kena, înan kişena û vana veng mekerê. Ma tu wext fek tutanê xo ra vera nêdanê. Lajê mi vano, ê her hewte mergî dir rî bi rî yê. Tutê ma bêwayîr nîyê. Ma destbendkerdişan ra nêtersenê Dewletêka merdimayî nêzana verê ma de ya."

 

‘Tutê ma tehdîdê mergî gênê'

 

Dayîka tepişteya bi nameyê Xemgîn Karataş ke surgunê zîndanê Tîpê Tyê Afyonî ameya kerdiş û koxuşê yew kesî de manena. Cemîle Karataş zî dîyar kerd ke ê hemverê caardişê zîndanan de têkoşîn kenê û vat: "Ma nêwazenê zîndanî bibê keyeyê mergî. Tutê ma bêsuc ameyê tepiştiş. Lajê mi surgunê Afyonî kerdê. Seba krîzî ez nêeşkena her wext şêrî. Ez bi mengan bi hewteyan nêeşkena xebere lajê xo bigîrî. Wexto Nobeta Edeletî bî, lajê mi gêra û vat, tehdîdê mergî girewto. Lajê mi vat, 'Eke hewteyê bêro şima nêgêrî, şima bizanê ke problemêk esto. Asayîşê ganê ma çin o. Canê ma tehluke de yo. Wa êdî şar wurzo serê lingan.' Wa êdî no zulm peynî bibo, her kes vengê xo berz bikero."

 

‘Ganî ma dest bidê yewbînan û vengê xo berz bikerê'

 

Cemîle tewr peyîn wina vat: "Siyasî yan zî edlî ferq nêkeno. Ganî wayîrê tepişteyan bêro vetiş. Ganî pêro dayîkî bêrê têhet. Tutê ma seba ma têkoşîn kerdî. Ganî ma zî seba înan têkoşîn bikerê. Ganî ma dest bidê yewbînan û vengê xo pîya berz bikerê. Çi beno wa bibo ma do nobetanê xo dewam bikerê. Ma do hemverê qedexeyan kuçeyan de nobeta xo dewam bikerê."

 

‘Seba tutê ma nêrê qetilkerdiş ma do nobete bigîrê'

 

Waya tepişteya bi nameyê Erdal Ozel ke zîndanê Tîpê Fyê Hûmara 2yîn Tekîrdagî maneno, Kumrî Akgul zî dîyar kerd ke bi di mengî û nîm o seba Nobeta Edeletî bi ca bîyarê têkoşîn kenê û vat: "Seba Nobetanê Edeletî ma şî ma ameyî tepiştiş. Dimayê serebûtê Sîlîvrî, ma tutanê xo ra xebere nêgînê. Ma nêzanê tîya çi ame ciwîyayîş. Tutanê ma kerdê zîndanan. Şima çira kişenê? Zîndanan de hewteyêk de hîrê cenazeyî vejîyayî. Ma nêwazenê cenaze zîndanan ra vejîyê. Ma seba nê têkoşîn kenê. Ma heta biciwîyê do seba tutanê xo biciwîyê û wayîrê tutanê xo, têkoşînê înan biciwîyê."

 

‘Heta ma biciwîyê do têkoşîn zî dewam bikero'

 

Waya tepişteya bi nameyê Selîm Çîftçî ke zîndanê Tîpê L yê Umranî de maneno, Cemîle Çîftçî zî reaksîyon vera qedexekerdişê nobetanê edeletî da û wina vat: "Tutê ma nêweş ê, cenaze zîndanan ra vejênê. Ma zî seba nê nobetanê edeletî dewam kenê. La vanê qedexe yo. Ma do zî têkoşînê xo her tim dewam bikerê. Ma fek tutanê xo ra vera nêdanê. Birayê mi 26 serrî yo tepişte yo, gelo guna nîyo? Ganî heme dayîkî wurzê serê lingan û dest bidê yewbînan."