ÎZMÎR - Cinîyê ke  ma persê  'kam karker o, kam patron o' ci ra persa dîyar kerdî ke dewlete zî hukm û polîsî zî xo sey patronî vînenê û vera nê zî heqê qiseykerdişî yê karkeran çin ê. Cinîyan  îzahat kerdî ke ganî cinî duştê probleman de xo organîze bikerê û veng kerd ke 1ê Gulane de meydanan de bê. 

 

Keda cinî hetê zîhnîyetê serdestîya mêrdeyî ra hedef yenê girewtiş û keye de, cayê karî de, serê herdî de, her wareyê ciwîyayîşî de keda înan yena binpaykerdiş. Cinî bi nizdîbîyayîşê 1ê Gulane Roja Kede û Hetkarîyî xo hadre kenê ke vejîyê meydanan. 

 

Cinîyî bi problemê seke mobîngî, nêseyywebînîya cînsîyî, hêzê kar o ercanî dir yenê rî bi rî, persê ma yo 'kam karker o, kam patron o' verpersna. 

 

'Eke mobîng  bêro caardişî zî xebetênê' 

 

Teknîkere ya kompîtorî Sevînç Çelîkman: Merdim ewneno fekê patronan ra,  heqê qiseykerdişê karkeran çin o. Sey koleyî merdimî yenê xebetnayîş. Karkerî koleyê kesê ke pereyê înan estê patronê. Patron zî padîşayo. Vatişê ey beno, la vatişê karkeran derbas nêbeno. Seba merdim bikewo kar ganî merdim, merdimê  AKPyî bo. Wexto hinî meaş zêde beno mobîngî anê ca. Rayîr mojnenê ra. Herinda ê merdiman de kesê bi pereyê kemî xebetênê gênê kar. Bi nê tewirî kar mojnenê mi. Xo ra meaşo asgarî qîm nêkeno. Patron yan zî kesê bînî yê cayê karî de çiqas zî mobîngî bikerê, ê bêçareyê bixebetîyê. Coka debara keyeyî kenê; wexto ke yew rastê neheqîye zî bêro veng nêvejeno. Coka ke do o/a  zî betal bimano/a; bêedaletî resena sewîyeyê corî. 

 

'Wayîrê şîrketê 'Home Offîce' zî karkerê' 

 

Kubra Özçelike ke serê înternetî de wayîrê şîrketê bazirganîyî ya: Ez karê xo kena. Ez seba şîrketê cîyayî rotişî kena. Rey-rey komîsyonan gêna. Heman wextî de ez karkera. Şîrketê ke ez rotişî înan nêkena zî estê la patronê mi zî estê. Ez bacê xo, fatûrayê xo, SGKyê xo dana. Ez sey Home Office xebetêna. 

 

'Her kesê wayîrê kede xebatkar ê' 

 

Wendekare Tuana Yildirim: Wendekarî kafeyan de xebetênê. Stajan kenê ke seba kar bimûsê çîyêke baş o. La beranberê keda xo nêgînê. Tewr zêde ê kar kenê. Karkerî çinîbê patronî nêeşkenê kar bikerê. Ez seyyewbînîye pawena. Seba karkeran meaşêke kemî yeno dayîş. Her kesê wayîrê kede xebatkar ê. 

 

'Ganî cinî xo organîze bikerê ' 

 

Karkera keyî Gulnîhal Çolak: Karkerê keyî şertê zametî de ciwîyenê. Wexto şinê kar qe nêbo rojanê dîyarkerde de kar kenê, la karê keyî nêqedêno. Seke ke ma keye de tal ronişenê asayeno. Tu heqê înan ê komelkî çinî yo. Cinîyê keyî karkerê û  ê ke pere anê zî patron ê. Wirdî zî xebetênê. La karê keyî zaf zamet o. Ganî seba cinîyan measêke bêro dayîş, sîgorta bêro kerdiş. Wexto merdimî girêdayeyê mêrdeyî bê, merdimî xo kemî vînenê. Ganî cinî xo organîze bikerê. 

 

'Patronî ya mêrdeyê yan zî cinîyê  ke sey mêrdeyan hereket kenê' 

 

Kedkare ya keyî Berîl Dokmecîbaşi: Cinîyê keyî karkerê.  Garsonî zî, xebatkarê bankayî zî karkerê. Patronî zî yê ke beranberê kede nêdanê û seba xo binpay kenê. Cinî û mêrde eynî pereyî nêgînê. Cinîyî zêdeyêrî yenê binpaykerdişî. Ganî her kes seyyewbînî bo. Organîzebîyayîşê cinîyan muhîm o, la Tirkîya de qîm nêkeno. Nameyê cinî çinî yo. Serê cinîyan de zêdeyêrî mobîngî yenê ca. Patrone cinî bo zî sey mêrdeyî hereket kena. 

 

Karkere Elçîn Gonder: Çîyêke tewr qij bêro berardişî uca de karker esto. Ma zaf zorî ancenê. Betalîyî zaf zêdeyêrî ya. Doneyê TUÎKî rastî nêmojnenê ra. Hema zî vatişê betalîyî qedexeyê. Welat de grev esto. Heqê xo wazenê. 1ê Gulane nizdî bena. Ma do heme meydanan de bê. Rolê dewlete pêvînayîşê meaşê asgarî de vejîya meydan. Waştişê sendîkayan nînê qebûlkerdiş.  Ê ke qasayê xo pirr kenê patronê. Fînak, xeylêk karî danê Cengîz Holdîngî. La karkerî qezayê karî de zî nînê pawitiş.