Şîrîn Çinar 

 

ÊLIH - Dewaya derheqê Onur Gencer ke Denîz Poyraz qetil kerd, 29ê Nîsane de do bêro vînayîş û cinîyan seba nê veng dayî: “Ma do heta peynî wayîrê dewaya Denîze vejîyê.”

 

17ê hezîrana 2021ê de hemverê HDPyî yê Îzmîrî de hêrişê çekdarî ame kerdiş û gumanbar Onur Gencer xebatkara partîye Denîz Poyraz qetil kerdibi. Yewin roniştişê gumanbarî 29ê Kanûna 2021 de hetê heyetê 6in Dadgeha Cezaya Giran ya Bayrakliyî de salona 13in Dadgeha Cezaya Giran de amebi vînayîş. Her çar hetê Tirkîya ra bi amancê paştdayîşê keyeyî, avûkatî, cinî, temsîlkarê sazgehê komelê sivîl û bi hezaran kesî tewrê roniştişê dewa bibî. Roniştişê yewin de averşîyayîşêk nêvirazya û yê diyîn taloqê 24ê Çelî amebi kerdiş.

 

2yîn roniştişê dewa Edliyayê Bayrakliyî yê Îzmîr de ame vînayîş. Bahaneyê kapasîteyê salone xeylêk kes ke zafê ci cinî û temsîlkarê sazgehê komelê sivîl bî, nêgirewtî zere. Roniştişê ame vînayîş de qerarê dewamkerdişê tepiştişê Onur Gencer ame dayîş û roniştişê taloqê 29ê Nîsane amebi kerdiş.

 

Endamanê Tevgerê Cinîyan ê Azadan (TJA) derheqê roniştişê dewaya versûcê kiştişê Denîz Poyraz ke 29ê Nîsane de do bêro vînayîş de vengdayîşê paştdayîşî kerdî.

 

‘Qirkerdiş derheqê têkoşînê cinîyan de bi’ 

 

Cinîya bi nameyê Fatma Ablay vat, gumanbar Onur Gencer qirkerdişêk pîl plan kerdibi û no zî hetê her kesî ra yeno zanayîş. Fatma wina dewam kerd: “Nê roniştişî de têkoşînê sazgehê cinîyan û komeleyê cinîyan şexsê Denîz Poyraz de vejîya werte. La pêwa nê polîtîkayê dişminê cinî yê îqtîdarî zî vejîya werte. Heto bîn ra zî hemverê nêzdîbîyayîşî û vindertişê gumanbarî yê hemverê keyeyî ke ssba tehrîkkerdiş ame kerdiş, dadgehe tu mudaxale nêkerd. Vera nê ganî edelet bi ca bîyarê, tu refleksêk mudaxalekerdişî nîşan nêdayî.”

 

‘Ganî ma ê roniştişî de bê’

 

Fatma dewam de wina vat: “Bi qetilkerdişê Denîze dir xeylêk cinî hedef ameyî girewtiş. Hemverê polîtîkayê dişminîyê cinî, ganî pêro cinî tewrê roniştişî bibê. Seba Onur Gencer cezaya ke heq keno bigîro ganî ma salona roniştişî de bê. Seba edalet bi ca bêro ganî partîyê siyasî, komele û platformî twer bibê. Îqtîdar çi beno wa bibo, ma do vengê xo berz bikerê.”

 

‘Ma do wayîrê Denîze û dewaya ci vejîyê’ 

Sabîha Ekîncî zî wina vat: “Qetilkerdişê Denîze yeno manaya qetilkerdişê heme cinîyan. Qetilkerdiş bi zanebîyayîş ame kerdiş. Denîze vernîya ke bêra qetilkerdiş, her tim ameya taqîbkerdiş. Qetilkerdişê Denîze çîyêk rêze ra nîyo. Ma zanê ke no qetilkerdiş bi destê dewlete ameyo kerdiş. Pêwa Denîze bi hezaran cinî yenê qetilkerdiş û kes hesabê nê nêdano. Eke kes paştî ey de nêbîne, wina rehet qetil nêkerdêne. Bi çimanê terorîst HDPyî û endamanê ci ewnîyenê. Denîzêke şî bi hezaran Denîzî ameyî. Bi tehdîd û qetilkerdiş nêeşkenê ma biqedênê. Ma do wayîrê Denîze û dewaya ci vejîyê. Ma do 29ê Nîsane de roniştiş de bê. Ma fek têkoşîn ra vera nêdanê.”