ŞEHBA - Yewîya Êzidîyan a Efrînî seba wesîleya Roşanê Çarşema Sor şahîyêk viraşt. Şahî de ame dîyarkerdiş ke do wayîrê erjê xo vejîyê û hemverê hêrişan zî xo ver bidê.

 

Yewîya Êzidîyan a Efrînî seba wesîleya Roşanê Çarşema Sor bi sloganê, "Bi ruhê şehîdê azadîye ma do roja Roşanê Çarşema Sor biciwîyê û zorê îşxalkerdişî berê"  şahîyêke wareyê dewa Meratî ya qezaya Ehdas a Kantonê Şehbayî, kerd. Heme roniştoxê Efrîn û Şehbayî beşdarê çalakîye bî. Wareyê şahîye bi fotografê pekrewanê azadîye û fotografê Rayberê PKKyî Abdulah Ocalanî amebî xemilnayîş. Şahî bi deqeyêk rêzgirewtiş seba cangoriyê azadîye dest pêkerd.

 

'Ma do zorê dişminî berê û dînî xo bipawê'

 

Îdarekara Yewîya Êzidiyê Efrînî Ayşe Sîdo qisey kerd û Roşanê Çarşema Sor şarê Kurdî û komelê êzidî pîroz kerd û vat: "Ma Roşanê Çarşema Sor Rêber Apo pîroz kenê. Bi 4 serrî yo êzidî Şehba de xo ver danê. Yê ke seba 74 fermanan sereyê xo nêtewênayê. Dîno tewr kan o ke bi hezaran serrî yo roja ke dinya awan bîya û merdimayî dest pêkena, êzidî heta ewro no erjo pîroz pawitê.

 

Ma tu wext nêtersenê, bi rojan o şarê ma serê lingan de yo û xo ver dano. Na roja pîroz de ma Kelha Şêx Berekat, Parse Xatun û Kelha Nebî Horî anê vîr. Şengalo birîndar dimayê hezara serran ê ke heqê xo bi dest kerdê, ewro reyna dişmin înan keno binê ablûqa û hêriş beno serê Şengalî.

 

Ma do zorê dişminî berê û dînî xo bipawê. Tewr peyîn zî ma bi hêvîyê ke na serra newe biba serra aştîye, sewbîna biba serra xelaskerdişê Efrînî."

 

Dima ra qewla dînê hetê Şêx Zehir El Dîn Hesen ra ame wendiş. Sewbîna Koma Tutan û Koma Ciwanê Êzidî hîn qewilê dînî wendî. Dima ra Îdarekarê Komela Demokratîke TEV-Demî ya herêma Efrînî Gulê Cafer roja roşanê çarşema sor şîrove kerd.

 

Şahî bi gêrnayîşê govende peynî bî.