ANQARA - Vervatoxa HDPyî Ebru Gunaye bale ante operasyonê vera Başûrî ser û vat: ''No şer derbêka pîke dana îtîfaqê kurdan û statuyê Başûrî ro. Ganî şarê Başûrî û partî û dezgehê Başûrî vera şerî têbigêrê.''

 

Vervatoxa Partîya Demokratîke ya Şaran (HDP) Ebru Gunaye merkezê partîya xo de kombîyayîşê çapemenîye kerd û babetê rojdemî ercnayî.

 

Ebrûye bale ant serê tehlukeyê başûrê kurdistanî ke rî bi rî yo û vat: “Îqtîdarê AKP-MHPyî vera Herêma Kurdîstanî operasyonêko newe da destpêkerdene. No operasyon pêvînayîşê Erdogan û Mesrûr Barzanîyî ra dima qewimîya. Başûr bi zelalî yeno îşxalkerdene la îdareyê Başûrî yê PDKyî vera îşxalî tênêgêreno.  Tewirê PDKyî verê îşxalî akeno. Ma venga şar, dezgeh, partîyan û îdareyê Başûrî danê ke vera îşxalî vengê xo berz bikerê. Hukmatê Erdogan û Baahçelîyî mîyanê krîzî de yo. Seba ke na rewşe binimno hêrişê kurdan keno. Dewlete nêwazena kurdî bibê wayîrê statuyêkî.”

 

Şarê başûrî ganî vengê xo berz bikerê

 

Ebrûye qiseykerdişê xo de daye zanayene ke nê hêrişî derbêka pîle danê statuyê Başûrî ro û wina domnaye: “Ganî îdareyê Başûrî tehlukeyî bivîno. Îqtîdarê AKP-MHPyî seba pêro kurdan tehlukeyêko pîl o.  No şer derbêka pîke dana îtîfaqê kurdan û statuyê Başûrî ro. Eke şima ewro paştî bidê nê operasyonî siba do şerm bikerê.”

 

Mesela pê dîyalogan çareser bena

 

Ebrûye dîyar kerde ke Tirkîya de meseleya tewr pîle meseleya kurdan a û na mesele pê gonîye nê pê dîyalogan çareser bena û vat: “Muxalefetê Tirkîya zî dormeyê kayanê îqtîdarî de kom beno. Partîyê muxalefetî dişmenîya kurdan ser o yew benê. Ma venga pêro şarê kurdî, partîyan, rêxistinanê komelê sivîlî, roşnvîr û selahîyetdaranê Kurdîstanî danê ke vera nê şerî tewirê xo yê hemparî bimojnê. Ganî kurdî wayîrê destkewteyanê xo vejîyê. Ma tewirê PDKyî qebul nêkenê û ganî pêro kurdî nê tewirî qebul mekerê. Başûr binê îşxalê Iraq, Îran û Tirkîya de yo.  Ganî şarê Tirkîya zî vera ney vengê xo vejê. Çunke no operasyon vera haştîya Tirkîya yo.”