Rojda Aydin 

 

ŞIRNEX - Mîhrîban Şengîl 21ê nîsane de ameye qetilkerdiş, waya ci Taybet Uren o wext verê waya xo de bî û bî şahîdê qetilkerdişê ci. Taybeta ke waştişê cezakerdişê kiştoxî kerd û vat: "Waya pêwa emrê xo yê ciwan ameye qetilkerdiş û mîyanê gonîye de mi ra vat, 'Mi bixelisnê...''

 

Mîhrîban Akturk (31) ke qezaya Qilebanê Şirnexî de ciwîyayîne, hetê Metîn Şengîlî ra ke fek yewbînan ra vera dabî, bi hêrişê çekdarî dir rî bi rî mende. Dayîka di tutan Mîhrîbane bi giranî birîndar bî û aye wedaritî nêweşxane. Dimayê ke rewşa Mîhrîbane giran bî sewqê nêweşxaneyêke bîn ameye kerdiş, Mîhrîbane tîya de dinyaya xo bedilnaye. Vizêr cenazeya Mîhrîbane hetê bi desan cinîyan ra ameye definkerdiş.

 

Metîn Şengîl ke dimayê hêrişî, rema û hema zî nêameyo tepiştiş. Waya Mîhrîbane Taybet Uren bî şahidê merdişê aye. Derheqê serebûtî de ajansê ma rê qisey kerd.

'Wexto ke diganîya 28 rojî bî şîdet destpêkerd'

 

Taybete, dîyar kerd ke înan keye de Mîhrîbane ra vatêne Bêrîvane û wina qalê waya xo kerd: "Bêrîvane 9 serrî verê cu bi Metîn Şengîlî dir zewcya. Berîvane wexto ke diganeya 28 rojî bî, bi şîdetî dir rî bi rî mende. Şîdetê heta roja merdişê aye dewam kerd. Waya mi seba şîdetî xeylêk rey hewl da ke peynîya cuya xo bîyara. Rojêke mi rê mesaj şawit û vat, ‘Ez o peynîya cuya xo bîyarî.' Ez  lêz û bez şîya keye û mi nêverda ke xo bikişo. Metîn Şengîlî xeylêk rey bi kardî hêrişê ci kerd û aye birîndar kerd. Seba birîndariya xo xeylêk rey şî nêweşxane. Raporê aye zî estê. Di serrî verê reyna bi çek hêriş kerdibi û aye birîndar kerdibi. Seba nê sebebî waya mi  stargehê cinîyan de ameye bi cakerdiş. Zerrîya ma nêwaşt uca de bimano û ma aye ard keyeyê xo."

 

‘Her tim bi kiştiş ameyîne tehdîtkerdiş' 

 

Taybete, vat demo ke waya ci ameya keye tehdîtê Metînî dewam kerdê û vat: "O kes her roje bi dîmen waya mi gêrayîne û kardî dayîne verê qirika tutanê ci û vatêne, 'Yan ti do şansêke bidê mi, yan zî ez o tutanê to bikişî.' Rojêke ame keyeyê ma û birayê mi û waya mi ra ozrê xo waşt. Vatêne, 'Ez o xo bivurnî û rîpelêk newe abikerî.' Waya mi seba tutanê xo mecbûr mende şêro. Senîn ke waya mi şî keye, paskilêk dabi paşta aye ro û şîdet ci rê kerdibi. Reyna şîdet cayê ke mendibi dewam kerd. 9 mengî verê nika waya mi reyna bi kardî ameye birîndarkerdiş. Waya mi demo ke nêweşxane de bî, telefon akerd û zanayîş da ma. Ma zî telefon emnîyetî rê akerd û ma gerre kerd. Dozgerî seba di mengan qerrarê dûrvistişî da ci û key xelas bi ma reyna waştiş kerd. Dozgerî 6 mengî bîn zî da. Pêwa qerarê dûrvistişî zî waya mi ameye tehdîtkerdiş. Seba şîdetî waya mi qerar da bivisyo û dewa akerd. 28ê nîsane de zî dewaya înana cîyabîyayîşî biameyîne vînayîş. Waya mi hîrê rey qerarê dûrvistişî girewte û reyke zî stargehê cinîyan de mende."

 

‘Mîyanê gonî de vat, ez nêeşkena nê dejî wedarnî'

 

Taybete, wina qalê serebûtî kerd: "Bêrîvane waşt ke lajê xo rê çîyêk bigîro û ma pîya şî sûke. Mabêne keyeyê mi û birayê mi de 20 gamî estbî û ma rayîra şîne. Texsîyêke sipî ameye vernîya ma de vinderte. Waya mi reyke de vat, ‘Meto’. Lajê xo girewte verika xo û xo pey paşta mi de nimina. Mi waşt ke ez biba asteng. La serê çekî girewt û kerd cêr. Mi tehn da ez gênaya erd ro. Waya mi, lajê ci vazdayî. Waya mi girewte û 3 gule rijna serê ci. Aye mîyanê gonî de mende. Tutê aye 7 serre zî birîndar bi. Waya mi mîyanê gonî de tewr peyîn mi ra vat, 'Mi bixelisnê, mi bikerê hewn. Ez nêeşkena nê dejî biancî.' Wexto ke waya mi wedarnayî nêweşxane, sere de vatî baş a û dima ra ameyî vatî, dinyaya xo bedilnaya. Waya mi pêwa emrê xo yê ciwan xelas nêbî."

 

'Şima dewlete û dadgehe meşgul kenê'

 

Taybete, vat hema zî Metîn Şengîl nêameyo tepiştiş û vat: "No kes heta nika ganî biameyîne tepiştiş. Ma key bişîne dozgerîye, o kes ameyîne pawitiş. Ma ra vatêne, 'Şima dewlete û dadgehe meşgul kenê. Verê zî to şîdet dîne, to çira fek ci ra vera nêdayîne.' Waya mi seba pîlanê keyeyî mecbûr mendêne şîne verê ey kesî."

 

‘Wa tutî bê dayîke nêmanê'

 

Taybete, tewr peyîn wina vat: "Dinyaya ma xira bî. Êdî kiştişê cinîyan rê bes o. Wa cinî nêrê kiştiş û tutî bê dayîke nêmanê. Waya mi pêwa emrê xo yê ciwanî ameye qetilkerdiş. Ma wazenê no kes cezaya tewr giran bigîro."