Marta Somek

 

Sîyasetmedara kurde Aysel Tugluk ke zîndanê Tîpê Fyê Hûmara 1in ê  Kandirayî Kocaeliyî de manena teşhîsê demansî amebi ronayîş û şert û mercê zîndanî de rewşa aye her ke şina giran bena. Aysel Tugluke bi tena sereyê xo nêeşkena cuya xo dewam bikera, êdî rayrayîş de zehmetîyan ancena û xeylêk çî kena xo vîr ra. Aysele ke bi raporê ATKyî nîno tehliyekerdiş, her cayê dinya de bi amancê paştdayîşî têkoşîn kenê.

 

Platformê ‘Seba Aysel Tugluk 1000 cinî’ rojê vîyarte de derheqê kampanya de eşkerayî da û vengdayîşê edaletî kerd.

 

‘Sîyasetê demokratîk de fîgurêk girîng’

 

Akademîsyene femînîste Dîlek Hattatoglu ke bi KHKyî ame îxrackerdiş, dîyar kerd ke raporê dimayê nêweşîya Aysele vejîya werte, ameyê dayîş raporê sîyasî yê û wina vat: “Tena derheqê Aysele de ney, derheqê heme tepişteyê sîyasî de wina yo. Aysel Tugluk tena sîyasetê kurdî de, sîyasetê demokratîke ya Tirkîya de cinîyêk siyasetmedar a girîng a, fîgurêk girîng a. Xeylêk tepişteyê nêweşî estê. Yê ke dinyaya xo bedilnayî estê. Qerarê nê etîk yê şexsê Aysele de seba xeylêk tepişteyê bînan rê zî derbasdar o.”

 

‘Her deqeyê Aysele girîng o’

 

Dîleke wina vat: “Ganî Aysele bêra veradayîş. Hêvîdar a tepişteyê nêweşî lezabez bêrê dermankerdiş. Her deqeyê cuya Aysele girîng a. Seba nê zî ganî bêro dermankerdiş. Ganî ma seba Aysele û tepişteyê sîyasî bikewê mîyanê tevger û heqê înan bipawê."

 

'Aysele her tim aştî pawit'

 

Ayşe Uygunel ke îmza eştibi kampanya wina erjnayîş kerd: "Sîyasetmedarêke kurdî yê cinîyan ke sîyasetê demokratîke nika tepişte ya û nêeşkena aktîvîteyê cuya rojane bîyara ca. Ez vernîya her çî sey cuyêka empatî kena. Şexsê Aysele de vernîya sîyasetê demokratîke padayî. Wijdanê mi rehet nêkeno. Ez wazena destê ci bigîrî, uca de vejîyî. Aysele sîyasetê demokratîke de heta nika tena aştî waşta."

 

 

‘Ganî rewşa ci hetê heyetê xoser ra bêro ercnayîş'

 

Sereka Odaya Tabîban a Stenbolî (ÎTO) Prof. Dr. Pinar Saîp zî wina vat: “Ewro zîndanan de seba odayê meslegî derheqê xeylêk probleman de gerre yenê kerdiş. Seba nê binpaykerdişan, bi ca nêrê hewcedarîyêk pîl vejîyo, ganî odayê meslegî nê cayan kontrol bikerê. Ganî heyetê referansêke xoser rewşa Aysel Tugluk biercnê û çîyê hewce bikerê."

 

‘Aysele embaza ma ya'

 

Sereka EMEPyî ya Stenbolî Sema Barbaros derheqê kampanya de wina vat: "Ma seba Aysele edalet wazenê. Ma hezar cinî îmza eşt. Çîyê zîndanan de yenê kerdiş, merdimayî nîyê. Ma çîyê Aysele rê ameyê kerdiş, qebûl nêkenê.  Aysele embaza ma ya têkoşînî yê. Ma xeylêk têkoşînan de têhet bê. Rewşa ke Aysele ci de ya, nêeşkena bêro qebûlkerdiş."

 

‘Bîyayîşê aye ma xurt keno’

 

Kaykerdoxe Denîz Turkalî ke aye zî îmza eştbî, derheqê kampanyaya Aysele de wina veng da: “Aysele ti tena nîya, ma her tim verê to de yê. Ma pîya xurt ê, bîyayîşê to ma tewr zêde xurt keno. Ez to ko kena, embaza mi."