Melîke Aydin

 

ÎZMÎR - Vernîya 3in roniştişê dewaya qatil Onur Gencer ke Denîz Poyraz qetil kerdibi, rêxistinê cinîyan vengdayîşê wayîrvejîyayîşê dewa kerdî û sewbîna dîyar kerdî ke qatil tena yew kes nîyo û hêzê pey ganî vejîyê werte.

 

17ê hezîrana 2021 de hemverê Partîya Demokratîke ya Şaran (HDP) ya  Îzmîr de hêrişê çekdarî ame kerdiş û hêriş de xebatkara partîye Denîz Poyraze ameye qetilkerdiş. Dewaya Onur Gencer ke Denîze qetil kerdibi û roniştişê 3ine do 29ê nîsane de 6in Dadgeha Cezaya Giran ya Îzmîrî bêro vînayîş. Rêxistinê cinîyan vernîya dewa vengdayîşê wayîrvejîyayîşî kerdî.

 

‘Ganî cinî wayîrê na dewa vejîyê'

 

Aktîvîsta Tevgerê Cinîyan ê Azadan (TJA) Hayat Îzgî dîyar kerd ke dewlete hem hemverê cinîyan, hem hemverê kurdan de de helwestêk dişminî de ya û no dişminî zî bi qetilkerdişê Denîz Poyraze vejîyayo werte. Hayate wina vat: "Ganî hemverê nê binpaykerdişê heqan heme kesî bêrê têhet. Hewl dayî ke dewa berê cayê ke n tu eleqeyê ci çin o. La no bi ca nêame. Qirkerdiş tîya bi ca ame û ganî dewa zî tîya bêro vînayîş. Waştişê ma cinîyan oyo ke wayîrê dewa vejîyê û tewrê dewa bibê."

 

'Wayîrvejîyayîşê dewa parçeyek têkoşînê femînîstî yo'

 

Torra Pawitişê Cinîyan Gîzem Coşkun zî dîyar kerd ke do taqîbkerdişê dewa dewam bikerê û vat: "Roniştişê yewin de ma xeylêk çîyê nasî dî. Tevgerê rehetî yê qatilî, heqaretê qatilî yê hemverê keyeyê Denîz Poyraze, ameyî vînayîş. No nîşan dano ke dewlete senîn paştdayîş dana camêrdan ke cinîyan qetil kena. Her roj her ca de cinî yenê qetilkerdiş. Îqtîdar heto bîn ra zî nîjadperestî û faşîzm rêxistin keno. Hêrişê hemverê Denîze hêrişêk faşîst o. Ma cinî hemverê faşîzmî têkoşîn kenê. Seba nê têkoşînêk femînîstî yo. Ma wayîrê dewaya Denîz Poyraz vejênê."

 

'Tewrbîyayîş girîng o’

 

Vervatoxa Pêroyî ya Meclîsê Cinîyan ê  Sosyalîst (SKM) Ebru Yîgît zî wina vat: “Pêwa gumanbar dadgehe hemverê Denîze, kurd û kesê azadîye wazenê, îfadeyê sûcdar xebitna zî tu averşîyayîş nêvirazya. Seba dadgehe bi edelet netîce bibo, seba hetê sîyasî zî bêrê muhakemekerdiş, ganî muxalefetê komelî û cinî wayîrê dewa vejîyê. Ma tena seba Denîze ney, seba heme cinîyan edalet waşt. Seba ke Denîz û cinîyê bînan rê edalet bi ca bêro, no destê ma de yo. Ganî ma wayîr vejîyê."

 

'Hemverê tevgerê cinîyan de hewldayîşêk taybet yê dişminî'

 

Paştdayîşê Morî ra Denîz Uslu zî wina bale ant ser: "Hem qetilkerdişê cinîyan o hem zî qetilkerdişê nîjadperestî yo. Heme  hewldayîşê darbeyê hemverê sîyasetê demokratîk, AKP û MHPyî wayîrê zîhnîyetê serdestî yê camêrdan hemverê cinîyan de hewldayîşêk xususî yê dişminî kenê. Na dewa xeylêk girîng a. Bi taybetî roniştişê diyîn de hewldayîşê cinîyan ê tewrbîyayîşê dewa û mekanîzmayê hukmî ke waştiş red kerdî, bî. Hukm bi  mekanîzmayê xoser nêkeno. Rayîrê ke îqtîdar xêz kerdo de şino. Ma do seba her kesê ke engişta înan nê qetilkerdişî de esto bêrê muhakemekerdiş têkoşîn bikerê."