Sema Çaglak

 

ŞIRNEX - Şarê wareyê sînorê Xabûrî de pawitişê îrade û erjê xo kerd. Vindertişê xo yê hemverê şerî û pawitişê herra xo sînorê Xabûrî de diyar kerd. Na rojêka wayîrê taybetmendiyek girîng bî, xerîteya rayîrî rê cewabêke xurt bî.

 

Ma ewro reyke bîn zî dî Şarê Kurdî yewîya xo awan kerdo. Ame vînayîş ke yewbîyayîşê Neteweyî bi Barzanî û PDKyî dir girêdaye nîyo. Şar wareyê sînorê Xabûrî de pawitişê îrade û erjê xo kerd û hemverê hêrişê dewleta tirkî yê serê başûr û rojawanê Kurdistanî de sere wedarna. Vakur ra heta Başûr vengê xoverdayîşî berz bi. Hemverê  şerî, polîtîkayê înkarkerdişî, seba pawitişê destkewtişê statûyê Rojawanî, seba pawitişê herra Kurdîstanî şarê Kurdî bi qerar û hêrsêk pîl ware de bî. Şar baş zanayîne ke no şer şerê mendiş û nêmendişî yo û nê helwestê xo nîşan da û cewab û mesajê xo îşxalkerdişan rê neql kerd.

 

Xêta xîyanet û xoverdayîşî...

 

Têkoşînê Şarê Kurdî de her çiqas kerra serê yewbînan ameyê komkerdiş, hîn beşî zî komê kerran yew bi yew ameyê vetiş. Tarîx ra heta roja ewro xêta xîyanet û xoverdayîşî pîya ameya munayîş. Her wext hemverê xîyanetî xoverdayîş û têkoşîn ameyo kerdiş. Seba nê polîtîkaya “Di cay bike, parçe bike û rayîra bere" bîyo sebeb ke kurdî bi serran bi hêriş û polîtîkayê qirkerdişî dir rî bi rî bimanê. Labelê hemverê nê hêriş û  polîtîkayê çinkerdişê Şarê Kurdî pawitişê xo tim bi tewir bi tewir metodan kerdo. Mîyanê parçebîyayîşî fîzîkî de yewbîyayîşêk zerrî ra bi hişmendîyêk xurt ameyo awankerdiş.

 

Bi hezaran kesî serê sînorî de cewabê tarîxî dayî

 

Şarê Kurdî ewro cewabê tarîxî da. Seba ke tarîx nîno reynakerdiş bi yew zerrî bi yew vengî waştişê azadîye berz bi. Bi rojan o şar vera hêrişê Tirkîya ke bi hemkarîya PDKyî hemverê herêmê Avaşîn, Metîna û Zapî yê başûrê Kurdistanî de 17ê Nîsane ra keno, reaksîyon û nêrazîbîyayîşê xo ramojneno. Hêrişî her roja ke pey xo de verdenê zêdeyêr benê û hemverê nê zî hêrsê Şarê Kurdî her ke şino zêde beno. Ewro zî hêrs û rihê xoverdayox reyke bîn ame ramojnayîş. Amed ra heta Mêrdîn, Êlîh ra heta Riha, Sêrt ra heta Dîlok cinî,  ciwan û dadîyan hemverê hêrişê AKP-MHPyî yê bi hemkarîya PDKyî Silopiyayî ver bi sînor de rayîra şî. Bi hezaran kesê ke xeylêk cayê vakurê Kurdistanî ameyî bajarokê Tilqebîn ê Silopî de ameyî têhet.

 

Xoverdayoxan astengî nas nêkerd

 

Girseyê ke ame, pêwa varanî xeleka xo tewr hîra keno. Nê wextî de dayîkî hîsê xo yê hemverê şerî pare kerdî. Yewbînan rê qalê xo yê aştîye û reaksîyonê xo yê hemverê xîyanetî reyke bîn ardêne ziwan. Bêguman wareyê têkoşîn û xoverdayîşî hêriş û astengî kêm nêbenê. Senîn ke girse kom bi û seba ke ver bi sînorî de rayîra şêro kewt rayîr, hêzê leşkerî, cendirme û polîsan zî bi barîkatanê xo dorê girseî padayî. La ma baş zanê ke Şarê Kurdî sînorê astengîyî nas nêkeno û hêzê xo yê seba xoverdayîşî vera astengkerdiş û hêrişan zêdeyêr keno. Girse bi sloganê, “ Bimiro xîyanet, biciwîyo Kurdîstan” , “ Biciwîyo xoverdayîşê  gerîlla” , “ Biciwîyo xoverdayîşê Zapî” aver şîne û mesajê xo yê bingeyîn hemverê şerê AKP-MHPyî bi hemkarîya PDKyî dayîne. Hetêk pey barîkatan de hêrişê leşkerê tirkî hetêk ra zî hêz û xoverdayîşê şarî pîya rayîra şîne û xoverdayîş serkewte bîne.

 

Şarî seknê xo yê hemverê şerî dîyar kerd

 

Hîn dayîkan bi kilam û awazê xo reaksîyonê xo yê hemverê şerî ardêne ziwan, hîn dayîkan bi qîrayîş û slogananê xo, hîn ciwanî zî bi flameyê kesk û sûr û zerdî de hemverê şer û leşkeran de xover dayî. Na roje seknê Şarê Kurdî diyar kerd. Şarî bêters wayîrê dewa xo û erjê xo vejîya. Şarî seknê xo yê hemverê şer û pawitişê herra xo sînorê Xabûrî dîyar kerd. Na roja ke wayîrê taybetmendîyêk girîng bî, jxerîteya rayîrî yê prosesî rê cewabêke xurt bî."