Rojda Aydin

 

ŞIRNEX - Cinîyê ke Cizîr de ciwîyenê, reaksîyon vera  PDKyî ramojnayî û vatî: “Hemverê xîyanetî ganî kurdî tifaqê xo awan bikerê û hemverê hêrişan wurzê serê lingan.”

 

Reaksîyon û nêrazîbîyayîşê hemverê hêrişê Arteşa Tirkî ya ke bi hemkarîyê Partîya Demokrate ya Kurdistanî (PDK) ra hemverê Wareyê Pawitişê Medyaya ya Herêma Federal a Kurdistanî yenê kerdiş, dewam kenê. Cizîra Şirnexî de zî cinîyan hemverê hêrişê ke yenê kerdiş, fikrê xo ajansê ma rê pare kerdî.

 

‘Başûr de gonî rijyena’

 

Fatma Acar, xîyanetê PDKyî şermezar kerd û wina vat: “Wexto ke vanê şer, şerê Cizire ke ma ciwîyayî yeno vîrê mi. Ma cuyêka bi hizûr û azad wazenê. Ma nêwazenê êdî kurdî bêrê kiştiş. Kurdî bi serran ê yenê kiştiş. Kurdî ewro bîyê dişminê kurdan. Waştişê ma oyo ke peynîya nê şerî bêro. Ma nêwazenê ke  tu kurdêk bêro qetilkerdiş. Ê heme musluman ê. Çira ewro yewbînan kişenê. Vanê ma musluman ê, ewro  Başûr de gonî rijnenê. Ma êdî nêwazenê gonî birijyo.”

 

‘Ma tu wext sere nêtewênenê’

 

Hediye Bilir zî hemkarîya PDKyî ya bi Dewleta Tirkî dir şermezar kerd û vat: "Ewro bira, birayê xo kişeno. Ma nêwazenê kurdî yewbînan bikişê. Ma cuyêka bi aştî wazenê. Ma hertim hemverê şerî û zilmî de vejîyayî û ma do tim zî bivejîyê. Seba ke şer vindero, ganî kurdî tifaqê xo awan bikerê. Ma Barzanî şermezar kenê. O şarê xo ra çi wazeno. Tu cayêk de nêameyo vînayîş, bira birayê xo kişeno. Barzanî hemkarîya Dewleta Tirkî keno. Rayîr dewleta tirkî rê akerd û ewro koyê Kurdistanî yenê bombavarankerdiş. Hemverê nê hêrişan ganî Şarê Kurdî wurzê serê lingan. Ma sereyê xo vera dişminî nêtewêna û ma do tu wext sere nêtewênê. Ma nêwazenê êdî dayîkî bibermê.”

 

‘Hemverê şerî de ganî kurdî bi tifaq bê’

 

Aysel Dogan zî wina qal kerd: "Kurdî se serre yo yenê kiştiş û rastê zilmî yenê. Seba şerî her tim zerrîya ma veşana. Wazenê cuye ma rê teng bikerê. Kurdî ewro xîyanet birayê xo rê kenê. Barzanî zî hemkariya Dewleta Tirkî keno. Eke ma xo rast nêkerê, no şer tim dewam bikero. Eke xîyanet nêbîne do ewro cuyêka azad, têduşt û aştiyane bibayîne. Hemverê nê xîyanetî û şerî ganî ma kurdî wayîrê qerarêk xûrt bê. Hemverê nê hêrişan sere metewênê. Seba ke no şer peynî bibo, ganî ma kurdî tifaq û yewîya xo awan bikerê.”

 

‘Azadî do bi tifaqbîyayîş bi ca bêro’ 

 

Sultan Soygun zî wina vat: "Ma sey kurdî tu wext nê xîyanetî qebûl nêkenê û bêveng nêmanenê. Ma zî merdim ê û wazenê ke azad biciwîyê. Bi şer û kiştişî wazenê ma kurdan çin bikerê. Barzanî wayîrê nasnameyêk kurdan o, la neyarê Şarê Kurdî yo. Ganî şarê Kurdî wurzo serê lingan. Wextê Saddamî de Vakur wayîrê keyeyê Barzanî vejîyabi, la ewro ê ma rê xîyanet kenê. Eke kurdî bibê yew do kes bi ma nêeşko. Azadî do bi tifaqbîyayîş bi ca bêro.”

 

‘Ganî Barzanî bêro serê rayîrê rastî’

 

Bêrîvan Guçlu zî wina vat: "Ma wazenê Barzanî bêro serê rayîrê rastî. Ganî ma kurdî bibê yew û destê yewbînan bigîrê. Eke ma heme rast bibayîne do ewro rewşa ma wina nêbîne. Seba ke no şer vindero, ganî şar bibo yew. Ma bi yewbîyayîş azadîya xo awan bikerê.”

 

‘Roj roja wayîrvejîyayîşî ya’ 

 

Behîce Kiliç wina qal kerd: "Bi serran o ma kurdî yenê kiştiş. Ma vanê êdî bes o. Kurdan ra çi wazenê. Hemverê nê şerî ganî Kurdî wurzê serê lingan û wayîrê Başûr vejîyê. Ma Cizîr de xeylêk şer û kiştiş dî. Coka ma nêwazenê cayêk bîn de kiştiş bibo. Eke aqilê înan bibayîne, do birayê xo nêkiştine. Bajaranê Başûrî de şar wuşt serê lingan û ganî tîya zî şar wurzo serê lingan. Roj roja wayîrvejîyayîşî ya. Heta peynî ma do waştişê xo azadî bîyarê ziwan.”