Sîdra Mamo

 

ŞEHBA - Dayîkê gerîla yê Efrînî derheqê hemkarîyê PDKyî bi dewleta tirkî dir û hêrişê serê Başûrê Kurdistanî de qisey kerd. Dayîkan vat: "Bi 41 serrî yo dewleta tirkî ya îşxalkerdoxe, tutanê ma dir şer kena. La her wext dişmin hemverê îrade û hêzê gerîlayanê ma de bin kewto. Vengdayîşê ma heme dayîkê gerîla yê Başûrê Kurdistanî de manenê ra esto ke xo bikerê yew û hemverê hêrişê dişminî de sere nêtewênenê. Gerîla tutê ma yê, ma bi tutanê xo bawer ê do serbikewê."

 

Hetêk mabêne Şengal û Rojawan de hetê Hukmatê Iraqî ra dêsê şermî yeno ronayîş, sewbîna Hukmatê Iraqî hêrişê Şengalî keno. Heto bîn ra zî hemkarîya PDKyî 17ê Nîsane ra dewleta tirkî dest bi hêrişê serê herêma Başûrê Kurdistanî kerd. Dewleta tirkî bi heme hêzê xo yê ekonomî û teknîkî hêrişê herêma Zap, Avaşîn, Metîna û koyê azadî keno. Derheqê babeta dayîkê gerîla yê Efrînî yê nika Şehbayî de manenê, helwest û waştişê xo ajansê ma rê pare kerdî.

 

'Hemkarîya Berzanî ya bi Tirkîya dir xîyanet o'

 

Dayîka pakrewan Şîlan, Ayşe Şêxo hêrişê serê Başûrê Kurdistanî şermezar kerd û wina vat: "Bi 41 serrî yo dewleta tirkî ya îşxalkerdoxe vera tutanê ma şer kena. La tim dişmin hemverê îrade û hêzê gerîlayanê ma vînî kerdo. Ewro zî dewleta tirkî ya îşxalkerdoxe bi hemkarîya Partîya Demokratîke ya Kurdistanî (PDK) hêrişê xo serê koyanê azadî hemverê tutanê ma dewam kena. Ma bi şîdet hêrişê dewleta tirkî ya îşxalkerdoxe yê serê  herêmê Avaşîn, Metîna, Zapî şermezar kenê. Sewbîna dêsê şermî ke dewleta tirkî dana ro, ma tu wext qebûl nêkenê, dişmin reyna plananê newe seba qirkerdişê derheqê ma de keno. Dewleta tirkî bi heme hêzê xo bi hemkarîya  PDKyî hêrîşê gerîlayanê ma kena, la reyna zî nêeşkenê îradeyê ma bişiknê. Seba ke gerîla tutê na herre yê û seba heq û erjî şer kenê."

 

'Ma sey dayîkê gerîla heta nefesê peynî pey tutanê xo de yê'

 

Ayşe tewr peyîn wina vat: "Ma sey dayîkê gerîla heta nefesê peynî, pey tutanê xo de yê. Seba gerîla erj û vengê nê şarî yê. Seba nê zî wa Keyeyê Berzanî baş bizano ke şerê nika hemverê şarê kurdî keno, do vînî bikero. Keyeyê Berzanî ke bi nameyê kurdbîyayîş veng dano, eke tena boya kurdî ci ra biameyîne do o wext şerê biratî nêkerdêne. Hende Keyeyê Berzanî xîyanetê şarê kurdî keno, bi dişmin dir her tim seba berjewendîyê xo beno hemkar. Seba nê wa tu wext serê nameyê kurdan qisey nêkero. Ma xîyanetê Keyeyê Berzanî bi şîdet şermezar kenê, wa agêrê serê hişê xo."

 

'Gerîlayê ma koyanê azad de seba şar û heqê xo şer kenê'

 

Dayîka pakrewan Gul Çiya, Emîne Xilo serê xiyanetê Keyeyê Berzanî û hemkarîya bi dewleta tirkî dir qisey kerd û vat: "Mesûd Berzanî tena pere zano. Keyeyê Berzanî heme pere û kapîtalîzmê xo kerdo banqeyanê Ewropa, nê zî heme bi îspat iê. Keyeyê Berzanî vano, ma kurd ê la şerê gerîla keno. Qey gerîla tutê ma nîyê, tutê şarê kurdî yê. Gerîlayê ma koyanê azad de  seba şar û heqê xo şer kenê, seba pawitişê herra xo şer kenê. Ma erdê kesî îşxal nêkerdo û ne zî ma hêrişê yewî kerdo. Ma tena heqê xo oawenê. Ewro verê çimanê heme dinya de tanqê dewleta tirkî yê îşxalkerdoxan mîyanê leşkerê Berzanî de tê gêrenê. Keyeyê Berzanî bêveng o, seba ke hemkarîya dişminî keno."

 

'Gerîla tutê ma yê, do serbikewê'

 

Emîne tewr peyîn wina vat: "Ma tu wext rayîr nêdanê dişmin ke ma çin bikerê û gonîya pakrewananê veng şêro. Heta peynî ma paştdayîşê gerîlayanê xo kenê. Vengdayîşê ma heme gerîlayê ke Başûrê Kurdistanî manenê esto ke xo bikerê yew û hemverê hêrişê dişmin sere nêtewênê. Gerîla tutê ma yê, ma bi tutanê xo bawer ê do serbikewê."