Derya Ren

 

AMED - Cinîyê sendîkayîjî dîyar kerdî ke kedkar her ca de probleman ciwîyenê û cinî wareyê xebate de rastê mobîngî yenê û vatî do 1ê Gulane de wareyan de bê.

 

1ê Gulane Roja Paştdayîş û Kede emsar binê veresîya şer, feqîrî, tecrîd û krîzan de yena pêşwazîkerdiş. Kedkarî dem bi dem bikewê grevan zî selahîyetdaran de derheqê nê de tu game nêeştî.

Îdarekarê sendîkayan derheqê problemê ke ciwîyenê û amadekarîyê 1ê Gulane de qisey kerdî.

 

‘Cinî rastê mobîngî yenê’

 

Endama SESyî ya Amedî Gulhan Tekîn dîyar kerd ke bi pandemî dir, barê xebatkaranê weşîye zêde bîyo û wina vat: “Welat de şertê xebatan zaf xirab ê. Seba na na rewşe şî grev. Keda xebatkaranê weşîye bi tu hawayî nîna vînayîş. La ma hewl danê vengê xo bidê eşnawitiş. Komelî de serê cinîyan de mobîng esto û wareyê karî de no vejêno di qat. Pêwa nê embazê ma yê hêriş înan rê yeno kerdiş, estê. La ma vînenê ke tu caardişêk serê înan de çin o. Bê tedbîr xebatkarê weşîye yenê xebitnayîş. Heta şertê xebate sererast nêbê ma do têkoşîn bikerê. Ma bi na wesîle şinê 1ê Gulane.”

‘Bi hawayêke bêhuqûqî kar ra yenê vetiş’

 

Sekretera Hûmara Yewin ê Egîtîm Senî ya Amedî Emîne Akşahîn dîyar kerd ke kedkarê perwerdeyî bi xeylêk probleman dir yenê rî bi rî û no demê AKP-MHPyî vejîyayo sewîyeya tewr cor û vat: “Hetê meslegî de hewl yeno dayîş ke bê îtîbar bêro verdayîş. Ma vînenê ke her roje meaşê ma helênê. Ma bi meaşê xo nêeşkenê peynîya menge bîyarê. Xeylêk embazê ma mamosteyê bi pêameyîşî yê. Endîşeyê kadroyî ciwîyenê. Pêwa nê xeylêk mamoste binê meaşê asgarî de meaş gênê. Keda embazanê ma yena îhlalkerdiş. Seba 1ê Gulane ma xebate kerd. Ma do têkoşînê xo pîl bikerê. Ma do hemverê hêrişan xo bi rêxistin bikerê. Ma heme şarê xo dawetê meydanan kenê.”

‘Ma 1ê Gulane bi asanî bi dest nêkerd’

 

Hemsereka Şubeyê Hûmara 2yîn ê DÎSKî ya Amedî Hanîfe Kardaş zî bale ant serê rewşa cinîyanê karkeran û vat: “Sazgehen de cinî û camêrdan têduşt nêvînenê. Cayê xebata erjê cinîyan vînenê parq û baxçe yo. Dimayê qeyûman xeylêk cinî parq û baxçeyan xebityenê. Mahkûmê uca kerdê. Serê cinîyan de mobîng esto. Mintiqa de seba cinîbîyayîş û kurdbîyayîşî di rey teda cinîyan rê yeno kerdiş. Pêwa hêrîş û polîtîkayê qeyûmî ma do 1ê Gulane bi coş pîroz bikerê.”