Rojda Aydin

 

ŞIRNEX - Lajê Cemîle Orûç Mehmet Salîh Orûç 6 serrî yo tepişteyo. Cemîle dîyar kerd ke heqê tepişteyan yeno binpaykerdiş û vat: "Tepişteyî duştê zilmî de xover danê û sere verê zilmî de nêtewênenê. Ganî Şarê Kurdî zî wayîr ro tepişteyan vejîyê!"

 

Tecrîdê hemverê Rayberê PKKyî Abdullah Ocalanî de tesîr ro pêroyê wareyan kerdo, yew zî ê wareyan ra zîndan ê. Zîndanan de tecrîdêke giran yenê rayrayîş. Keyeyê tepişteyan ê ke bi serranê pey caardişê edaletî de yê. Çalakîya 'Nobeta Edaletî' Amed, Wan,  Îzmîr û Stenbol de dayî destpêkerdiş. Bi çalakîyê xo bale ancenê serê polîtîkayê tecrîdî û venga caardişê edaletî kenê."

 

Keyeyê tepişteyan ra yew ci Cemîle Orûçe ya. Cemîle ya ke lajê aye Mehmet Salîh Orûç di serra 2016î de wextê qedexeyê vejîyayîşê kuçeyan emebî tepiştiş, 10 serrî û nîm ceza ci rê amebî birnayîş. Mehmet Salîh o ke 6 serrî yo tepişteyo, nika di Zîndanê Girewte yê Tîpê Eyî yê Bûrsayî de yeno girewtiş. Dadîya ey Cemîle, derheqê binpaykerdişê heqê tepişteyan de qisey kerd.

 

'Lajê mi 6 serrî yo tepişteyo'

 

Cemîle ard ziwan ke lajê aye di wextê qedexeyê vejîyayîşê kuçeyan de ameyo tepiştiş û dima ra şawito Zîndanê Mêrsînî û uca de 9 mengî mendo. Dimayê ke o tehlîye bî ame keye. Nizdîyê 20 rojî keye de mend û rojêke reyna eştî serê keyeyê ma û reyna o tepişt û o şawit Zîndanê Midyatî. Midyat de  2 serrî û nîm mend. Dima ra berdî Zîndanê Şirnexî û uca de zî rastê xeylêk îşkenceyî û tehdîdan ame. Verîyê 5 mengî verî zî lajê mi sirgûnê Zîndanê Bûrsayî ame kerdiş. Zîndanê Bûrsayî de o û 11 embazê xo qawuşêke de manenê."

 

'Erzenê serê qawusê înan û cigêrayîş kenê'

 

Cemîle, bale ante serê binpaykerdişê heqê tepişteyan û vat ke tehda û tehdîdê pîlî serê tepişteyan de yenê rayrayîş û wina dewam kerd: "Lajê mi bi telefonî wexto ma dir qisey keno, vano ke gardîyanî serê qawuşanê înan de gênê û cigêrayîş kenê. Heme çî-mî  yê înan vila kenê û şiknenê. Awa germine nêdanê tutanê ma, ceryanê înan birnenê. Werdê înan weş nîyo. 2 rojî verî zî îdareyê zîndanî destûr nêda ke lajê mi, ro ma bigêro. Lajê mi no 6 serrî yo di mabênê 4 dêsan de yeno tepiştiş.  Mi lajê xo tewr peynî wexto Zîndanê Şirnexî de bî di pêvînayîşê akerdeyî de vînabî. Dima ke ame sirgûnkerdiş, pey ra mi lajê xo nêvînayo. Lajê mi no 5 mengî yo Zîndanê Bûrsayî de yo û di nê wextî de mi bi tena 2 reyî ci dir qisey kerdo. Zilmêk pîl ro tutanê ma kenê. No çîyo ke yeno kerdiş qey edaleto? Destûr nêdanê ma bi rayîrê telefonî tutanê xo dir qisey bikerê. Zerra ma dadîyan veşena. Hewn nêkeweno çimê ma."

 

'8 reyî bi serê keyeyê ma de girewt'

 

Cemîle da zanayene ke vera rewşe ya înan ê ekonomî zêdeyêr xiraba, ê nêeşkenê şêrê Bûrsa seba pêvînayîşê lajê xo û qal kerd: "Zîndanê Bûrsayî dûrî yo vera rewşe ya ma ya ekonomî weşe nîya, ma nêeşkenê şêrê pêvînayîşî. Wexto ke Şirnex û Midyatî de bî ma şîne pêvînayîş. La nika îmkanê ma yê winayîn çinî yê. Erdogan zilmêk pîl ro ma Kurdan keno. Wazeno ma çinî bikero. Hukmat wazeno ma Kurdan vila bikero. La Kurdî nêqedênê. 7 mengî bî lajê mi amebî tepiştiş reyna polîsan seba ey eşt serê keyeyê ma.  Xo ra lajê mi di destê înan de tepişte bî. Senîn beno hewêna erzenê serê keyeyî? Bi pêroyî dimayê tepiştişê ey 8 reyî serê keyeyê mi de girewt."

 

'Sey zilmê derbeyê 12ê Êlûle yo'

 

Cemîle ramojnayîş kerd ke, ê vera rewşe ya  tutanê xo qaxû de yê û nêzanê çi bikerê û wina ci de şî: "Bi tewirêke keyfî cezaya qiseykerdişê telefonî yê aşmêk dayê lajê mi. Lajê mi çi kerdo ke na ceza ro ci birnaya? Heme tepişteyî binê tecrîdî de yê. Çîyêke nêmendo Erdoganî bi ma nêkerdo? No zilmo ke ewro serê zîndanan de yeno rayrayîş seki serranê 90yî yo. Zilmê derbeyê 12ê Êlûle ewro heme zîndanan de yeno rayrayîş."

 

'Xoverdayîşê zîndanan dewam keno'

 

Cemîle peynîyê qiseyanê xo de waştiş kerd ke, ganî lezkî peynî nê zilmî bêro û tutê înan bêrê veradayîş û wina peynî ro qiseyanê xo ard: "Wa Şarê Kurdî wayîr ro zîndanan vejîyo! Coka nê yewî zî wa wurzê serê payan! Tepişteyê ma ke zîndanan de binê zilmî de rî bi rî manenê zî xoverdayîşê xo domnenê. Sere verê zilmî de nêtewênenê. Wazenê tutanê ma nê rayîrî ra biaçarnê. Labelê tutê ma poşman nîyê ke serê na rayîrî de yê. Xoverdayîşê zîndanan dewam keno."