Gulşen Koçuk

 

MERKEZÊ XEBERAN - Goreyê çeteleyê ajansê ma arêdayê, menga nîsane de 31 cinî û 3 tutî ameyê qetilkerdiş û 12 cinî û tutêke zî bi guman dinyaya xo bedilnayê. Menga nîsane de zî gumanbar bê ceza ameyê verdayîş û lebatê xo yê qetilkerdişî dewam kerdê.

 

Hemkarîya îqtîdar-hukm- camêrd û vatiş û caardişê înan zemînê şîdetî awan kenê. Sey çeteleyê şîdetî yê mengê vîyarte de na menge zî şîdet zêde bi, no zî hemkarî ramojneno.

 

Xebera ‘polîso gumanbarê tecawuzî’ ameye astengkerdiş

 

Qezaya Cizîre ya Şirnexî de cinîya bi nameyê S.S. hetê polîs Enes Aydemîr ra ameye tecawuzkerdiş û 11ê Nîsane de ajansê ma derheqê serebûtî de xebere viraşte û dimayê nê sîteye ma ya ajansî ameye astengkerdiş. Astengkerdişê na rey çapemenîya dîjîtalî de ame kerdiş.

 

Dewaya padayîşê KCDPyî

 

Komeleya Platformê Ma do Kiştişê Cinîyan Vindarnê 2012 de bi keyeyê cinîyê ke ameyê qetilkerdiş ra ame akerdiş. La bi waştişê Walîtiyê Stenbol û Masaya Komeleyan hetê Serdozgerîya Komare ya Stenbolî ra bi bahaneyê gerrekerdişê camêrdê ‘mexdurê nefeqeyî’ dewaya feshkerdişî ameye akerdiş. Bahaneyê dewa zî oyo ke ‘komela yewîya keyeyî xera kena’. Hemverê dewa xeylêk sazgehê cinîyan û rêxistinê komela sivîl reaksîyon ramojnayî.

 

Pêkerdişê Stenbolî

 

Derheqê 10 dewayê seba betalkerdişê qerarê antişê Pêkerdişê Stenbolî ameyî akerdiş. 10in Daîreyê Dadgeha Berzî de ame vînayîş. Roniştiş salona konferansî ya bi kapasîteyê 550 kesî de ame vînayîş û her çar hetê Tirkîya avûkat û temsîlkarê sazgehî tewr bî. Seba dewa 70 ra zêdeyêr baroyî û xeylêk avûkatan seba tewrbîyayîşî belgeyê rayeyî pêşkêş kerdî. La bi bahaneyê salone pirra, avûkatê ke bajaranê cîya ra amebî, nêgirewtî zerre. Dimayê pawitişan Dozgerî Dadgeha Berzî mutala eşkera kerd û vat, ganî qerar bêro betalkerdiş. Serekê dadgehe vat, do qerarê xo dima ra bi nuşteyî teblîg bikerê.

 

31 cinî û 3 tutî ameyî qetilkerdiş

 

Goreyê çeteleyê menga adare ya Ajansê ma 26 cinî amebî qetilkerdiş. Menga Nîsane de zî 31 cinî ameyî qetilkerdiş, 12 cinîyan bi guman dinyaya xo bedilnayî. Menga nîsane de 3 ci ra tutî ameyî qetilkerdiş û yew zî bi guman dinyaya xo bedilna.

 

Di cinî hetê camêrdê ke bi destur vejîyayî, yew

 

hetê camêrdê ke qerarê ci yê durvistişî estbi ameyî qetilkerdiş. 16 cinî hetê camêrdê ke înan dir zewicnaye, 4 hebî hetê camêrdê ke dest ci ra vera dabî, 4 hebî hetê camêrdê ke merdimê înan bî, 2 hebî hetê camêrdan ke nas nêkerdêne ra, 2 hebî hetê camêrdê ke nas kerdêne, yewe hetê embazê xo ra ameye qetilkerdiş. Gumanbarê cinîyêke nîno zanayîş û yewe zî hema nêameyo vînayîş.

 

Goreyê bajaran dayeyî winayê; Stenbol de 7, Edene de 2, Îzmîr de 2, Elezîz de 2, Erzirom de yewe, Balikesîr de yewe, Aydin de yewe, Sînop de yewe,  Sakarya de yewe, Burdur de yewe, Çorum de yewe,  Gîresun de yewe, Şirnex de yewe, Trabzon de yewe,  Bolu de yewe, Dîlok de yewe, Tekîrdag de yewe,  Osmanîye de yewe, Mugla de zî yewe bi pêroyî 31 cinî ameyî qetilkerdiş.