Sema Çaglak/Zeynep Durgut

 

ŞİRNEX - Dadîya Hecî Lokman Bîrlîkî ke di serra 2015î de Şirnex de hetê polîsan ra ame birîndarkerdiş, dima ra ame qetilkerdiş û cenazeya ey dimayê wesayîtê zirxî dir ame kaşkerdiş, Nazîre Bîrlîk dîyar kerd ke PDK dewleta Tirkî dir hereket kena û hetkarîya PDKyî ke dewleta Tirkî dir a şermezar kerd. 

 

Hêrişê Tirkîya yê bi hetkarîya PDKyî ke 17ê Nîsane de duştê mintiqayê Zap, Avaşîn, Metînayî de serê herdê Mintiqaya Federe ya Kurdistanî de ameyî destpêkerdiş hem hewayî ra hem zî bejîyî ra dewam kenê. Reaksîyonê duştê nê hêrişê dewlete ya Tirkî de û hetkarîyê PDKyî yê bi na dewlete dir roj bi roje zêdeyêrî benê. 

 

Netîceyê polîtîkayê şerî yê AKP-MHPyî ke ameyî averfînayîşî de 3 yê Teşrîna Verîne ya 2015î de Şirnex de Hecî Lokman Bîrlîk ame birîndarkerdiş û dima ra zî ame qetilkerdiş cenazeya ey pey wesayîtê zirxî dir amebî kaşkerdiş. Dadîya Lokmanî Nazîre Bîrlîke hema dejê aye seki roja ewilî yo û şînê lajê xo kena. Nazîre ya ke bi hêrişê Tirkîya yê bi hetkarîya PDKyî serê Mintiqaya Federe ya Kurdistanî de dejê aye giranêr bîyo, reaksîyon mot hêrişan ser o û vat ke PDK qatilê lajê mi dir hetkarî keno. 

 

'Ez heqê xo Berzanî rê helal nêkena' 

 

Nazîre dîyar kerd ke xîyanetê PDKyî do nêro xo vîr ra kerdiş û wina dergî da qiseyanê xo: "Ez heqê xo Berzanî rê helal nêkena. Pêwa ke hende kêna û xortê Kurdan di nê rayîrê azadîyî de şehîd bîyê û xeylêk bedelê giranî dayê zî Berzanî  fedî nêkeno. O bîyo embaz û şirîgê dewlete ya Tirkî nizdê Kurdan beno. Neyarê Kurdan mirdê xo estê. La Berzanî Kurd o. Weyra de sey Serekê Hukmatê Federe ya Kurdistanî yeno vînayîş. Ma bawer nêkerdê ke Berzanî Kurdan bi destê Kurdan bido kiştiş. Neyarîya Kurdan ê duştê Kurdan de nîna qebûlkerdiş. La se rey heyf ke ma ewro nê munaqaşe kenê. Eke Berzanî pey dewaya Kurdistanî de bîyêne do ewilî ra Kurdê ke bedelê giranî danê û dadîyan ra fedî bikerdêne. Çîyê ma ci ra umîd kerdêne heme tal vejîyayî." 

 

'Ma şirîgîya serê gonîya şehîdan de qebûl nêkenê' 

 

Nazîre dîyar kerd ke, ganî Kurdî dimayê heq û dewaya xo de bê û duştê nê şerî de vindetişê xo bimojnê ra û vat: "Ma xîyanet û şirîgîya ke serê gonîya şehîdan de ameya kerdiş qebûl nêkenê û şermezar kenê. Wa Kurdêke nê qebûl nêkero û duşt de vejîyê. Wa yê ke xîyanet kenê ro xo agêrê û ro derûdora xo biewnê.  Kurdî zilmo ke bi serrano serê înan de ameyo kerdiş zenenê. Tarîxê xo zanenê û dinya qayît kenê. La çi heyf ke erey bi xo hesîyayê." 

 

'Mal û milk rûmetî ra başêr nîyo' 

 

Nazîre ard ziwan ke,  ganî Kurdî bîyayîş û nasnameyê xo bipawê û seba nê têkoşin bikerê. Nazîreye, wina dergî da qiseyanê xo: "Eke ez  bi aqilê ewro bîyêne, ez a bişîyêne dewan de xebate  bikerdêne, dewijê ke dewê înan ameyî talkerdişî ra bivatê terkê dewa xo mekerê, serê herdê xo de biciwîyê. Wa nêbîyêne koleyê Tirkan. O wext do nêameyê verdayîşî ke Tirkî herdê ma îşxal bikerê. Ewro herd û xozayê ma yeno rijnayîş. La çi heyf ke erey pê hesîyayî. Hema vanê wa çîyêk bi kênaya mi, lajê mi, keye û banê mi nêro. Qey mal û mil bîyayîş û rûmetî ra erjîyayêr o? Ganî verî ma îman û rûmetê xo bixelesnê!" 

 

'Wa xo duştê îşxalkerdişî de bimojnê ra' 

 

Nazîreye dewamîya qiseyanê xo de veng ro dadîyan kerd û vat: "Wa heme dadîyî ronişê û derdê xo vajê. Wa neheqîya ke Berzanî ro Kurdan keno bîyarê ziwan. Berzanî çirê beno embazê neyarî? Ez veng ro dadîyan kena; çi destê înan ra yeno, seba xatirê şehîdanê xo, gerîllayê xo û gonîya ke serê herdê Kurdistanî de yena rijnayîş wa heme dadîyî tevrê xo bimojnê ra. Wa ro tutanê xo wayîr vejîyê. Nika ez ewro tîya de ronişteya wijdanê mi rehet nîyo. Kamî ra çi yeno wa bêro  wa  ê  xo ver bidê. Verpersîyarîyê xo bîyarê ca." 

 

'PDK biyo şirîgê qatilê lajê mi' 

 

Nazîre dewamîyê qiseyanê dîyar kerd ke Berzanî ewro  qatilê Hecî Lokman Bîrlîkî dir bîyo şirîg û wina peynî ro qiseyanê xo ardî: "Gama ke lajê mi şehîd bi û o îşkenceyo ke ro ci ame kerdiş heme kesî pê hesîyayî. Qey Berzanî nêzano ke lajê mi bi destê dewlete ya Tirkî, bi îşkenceyî ameyo qetilkerdiş? Dewletê Neteweyî serê meselayê Hecî Lokmanî de qisey kerdî. Berzanî ewro neyarê Hecî Lokmanî dir şirîgîye keno. Çi sûcê Hecî bîbî ke o îşkence ro ci kerdî? Ez heqê xo senîn dewleta Tirkî rê helal nêkena, Berzanî rê zî helal nêkena. Seba mi ewro wurdî zî yew ê."