RIHA - Di roja 429î yê 'Nobeta Edaletî' de  Ferît Şenyaşarî da zanayene ke huqûq serdestan yeno pawitiş û vat: "Ma edalet wazenê. Eke ma hemwelatijê nê welatî bê, ma welatbîyayîşê seyyewbînî wazenê. Wa tena qanûnî de nêmanê, ma wazenê bêro teqibkerdiş. Ma wazenê ke no zilm lezkî bêro peynîkerdiş." 

 

Çalakîya Nobeta Edaletî ya Emîne û Ferît Şenyaşarî ke vernîya Edlîyeyê Rihayî de 9ê Adare ya 2021î de dabi destpêkerdiş, di roja 429î de dewam kena. Emîne û Ferît Şenyaşarî di seetê serê sibayî de keyeyê xo yê qezaya Pirsûsî ra ameyî verê Edlîyeyê Rihayî û çalakîya xo ya nobete dayî destpêkerdiş. Keyeyê Şenyaşarî derheqê têkoşînê xo welatijî û avûkatê yenê edlîyeyî hayîdar kerdî. 

 

'Huqûqê serdestan yeno pawitiş' 

 

Ferît Şenyaşar dadîya xo Emîne Şenyaşare dir cayo ke seke 'Quncikê edaletî yê Keyeyê Şenyaşarî' yeno namekerdiş, bi dowîzê 'Ma edalet wazenê' nobeta xo ya edaletî domnenê, têkildarê têkoşînê edaletî erjnayîş kerdî. Ferîtî, dîyar kerd ke Nobeta Edaletî pêwa heme manîyan 429 rojî yo domnena û da zanayene ke têkoşînê înan hetê heme şarê Tirkîya de ciwîyenê ra yeno Teqîbkerdiş. Ferîtî, vatişê serekkomarê AKPyî Tayyip Erdoganî ke 'Prensîbê dewlete ya huqûqî, şertê demokrasîyî nêbo ke, nêbeno yo' yê di Torenê Serewextê Awankerdişê 154ine ya Şûrayê Dewlete û Roja Hukmê Îdarî de kerdbi, vîr fîna û wina vat: "Merdimo serekê dewlete yo, qiseyanê xo de qalê dewlete ya huqûqî û hukmê xoserî keno. Ma nê vatişan qebûl nêkenê. Şarê Rihayî ê vatişan qebûl nêkenê. Vernîyê edlîyeyî de bi tewirêke eşkera huqûqê serdestan yeno pawitiş. Seba nê dadîya 66 serrî 429 rojî yo vernîyê edlîyeyî de ya. Yewin waştişê nê caardişî, qanûnê bîyayeyî yê." 

 

'Do nê çîyê ma ciwîyenê bi kamcîn prensîbê dewlete ya huqûqî îzah bikerê?' 

 

Ferîtî dîyar kerd ke dosyaya Nêweşxaneyê Dewlete ya Pirsûsî ke bi qeraro 'nimitkî' yena pawitiş, 4 serrî tena 4 merdimî ameyê tepiştiş û reaksîyonê xo yê duştê Erdoganî de dayî û wina domna: "Do nê çîyêke ma ciwîyenê bi kamcîn prensîbê dewlete ya huqûqî îzah bikerê? Eke sûcdarî eşkera bê, çirê 4 serrî yo tever de gêrenê? Birayêke mi 4 serrî yo bi tewirêke bêhuqûqî, bi fermanê serdestan tepişte yeno girewtiş. Ma edalet wazenê. Eke ma hemwelatijê nê welatî bê, ma welatbîyayîşo ke seyyewbînî wazenê. Wa tena qanûnan de nêmanê, ma wazenê bêro teqibkerdiş.  Ma wazenê ke no zilm lezkî bêro peynîkerdiş. "