Sema Çaglak  

 

ŞIRNEX - Koçerê ke germbîyayîşê hewayî dir wazenê şêrê wareyan; bi behaneyê operasyonê eskerî, hetê qorîcîyan û eskeran ra yenê manîkerdiş. 

 

Qezayê Silopî, Cizîr û Hezexê Şirnexî de, germbîyayîşê hewayî dir koçerî verê xo danê wareyan. Koçerê ke Cizîr, Mêrdîn û Êlih de yê vejîyayî rayîr û ameyê Şirnex, pabeyê ke vejîyê Wareyê Çemêkarî yê qezaya Berwarî ya Sêrtî û mintiqaya Besta ya Şirnexî de. La koçerî bi behaneyê operasyonî estê, manîyan dir rî bi rî manenê.

 

Sewbîna hema koçerêke verê xo danê wareyê Colemêrg û Wanî zî hetê qorîcîyan ra yenê vindarnayîş û yeno îdîa kerdiş ke seba derbasbîyayîşî, sereyê pesî 120 TL înan ra yeno waştiş. Koçerê ke nê waştişê esker û qorîcîyan qebûl nêkenê, nêeşkenê şêrê wareyan. 

'Esker û qorîcî nêverdenê ke ma çadiranê xo ronê' 

 

Koçere Sînem Ozalpe dîyar kerd ke, ê bi rojanê rayîr de yê ke do derbasê Koyê Katoyî bibê. Sîneme eşkera kerd ke esker û qorîcî nêverdenê ke, ê çadirê xo ronê û wina vat: "Ma nika Cizîrî ra yenê û ma do şêrê Wareyê Katoyî. Ma bi rojanê rayîr de yê û heta mengêke ancax bieşkê biresê cayo ke ma wazenê. Tîya de esker û qorîcî ma rê manîyan vejenê. Ma ra vanê 'ganî şima bêvindertiş derbas bibê'. Ne verdenê ma pesê xo bidê vindertiş û bidoşê, ne zî verdenê şiwaneyê ma werdê xo borê. Ne heywanê ma yê esparbîyayîşî û ne zî wesayîtêke ma esto ke ma barê xo şenikêr bikerê. Coka nê ganî ma heta Koyê Katoyî bêmabên pêwa pesê xo rayîr şêrê." 

 

'Ma rê zehmetî vejenê' 

 

Sîneme dîyar kerd ke, înan hewteyêke verî walîyî ra destûr waşto û seba şîyayîşê Bestayî, înan rê destûr ameyo dayîş. Sîneme qiseyê xo wina dewam kerdî: "Seba Bestayî vatbî şima eşkenê şêrê, la dima ra ma ameyî ma rê probleman vejenê. Bi xusûsî zî qorîcî ma rê manîyan vejenê. Metodê ciwîya ma zî xora zehmet o. Ser de zî qorîcî û eskerî zehmetîyan ma rê vejenê. Seba çerinayîşê pesî ware çinê bî. Pesê ma vêşano, ma ameyê nê cayî ke pesê xo biçerênê. Pesê ma nêweş kewt, coka ê zî ma erey mendî. Keyeyê ma ra nîme resayê cayo ke ma do şêrê, nîmeyê ma zî rayîr de mendê.”