AMED - Avûkate Asli Pasînlî dîyar kerd ke 28ê Nîsane ke roniştişê derheqê Pêkerdişê Stenbolî yê di roniştişê ke ameyo vînayîş de rojêke tarîxî bîyo û da zanayene ke do di Hezîrane de zî roniştişî  têdima bêrê vînayîşî, cinî do reyna vatişê xo vajê. 

 

Pêkerdişê Stenbolî 20ê Adare ya 2021î de bi qerarê serekkomarê AKPyî Tayyip Erdoganî ame feshkerdiş. Organîzeyê komele ya sivîlî, sendikayî û bi seyan cinîyî bi amanco qerar bêro vindarnayîş sere ro Şûrayê Dewlete dayî. Heyetê Daîreyê Dewaya Îdarîya Şurayê Dewlete (ÎDDK) bi behaneyê 'Goreyê destûrê asasî otorîterê rayîrberdişî, di destê serekkomarî de yo' di peynîkerdişê Pêkerdişê Mîyanneteweyî de îtîrazî red kerdî. 

 

Pêwa îtîrazê ÎDDKyî bi hezaran cinî sere ro Şûrayê Dewlete dayî. Serê nê ra 28ê Nîsane de waştişê 10 sazgeyan Şûrarê Dewlete de ameyî vînayîş. Her çar hetê Tirkîya ra avûkatî, komeleyê cinîyan, baroyî tewir bî û dîyar kerdî ke ganî Pêkerdişê Stenbolî bêro ca. Rojanê aver de do di 10in Daîreyê Şûrayê  Dewlete de bi komîyî bêrê vînayîş. Daîre 7-14 û 23 yê Hezîrane de do 3 ronistenê cîyayî bîyaro ca û yeno pawitiş ke derheqê Pêkerdişê Stenbolî de do qerarêke bêro dayîş. Yew avûkatanê Baroyê Amedî ra Asli Pasînlî di roniştena 28ê Nîsane de ca girewtbi, rihê paştdayîşê cinîyan vetbi werte erjna. 

 

'Roniştişêke tarîxî bî' 

 

Aslîye da zanayene ke dewaya derheqê Pêkerdişê Stenbolî de Şûrayê Dewlete de ameya vînayîş û vat  a rojêke ya nîna xo vîr ra kerdiş ke bî û wina vat: "Seke yeno zanayene ke pêkerdiş hetê serekkomarî ra ame feshkerdiş. Serê nê de, serê waştişê nizdîyê 200 sazgeyî dewa amî akerdiş. Sazgeyan îtîrazî kerdî û vatî, no duştê huqûqê neteweyî û mîyanneteweyî de yo. Nê dewan ra 10 hebî roniştena înan 28ê Nîsane de bî. Bi veng a EŞÎKî nizdîyê 1000 avûkatî tewir bîyî. Her hetê Tirkîya ra hereketê cinîyan, rêxistinî û sazgeyê cinîyan, baroyî û STKyî tewir bîyî." 

 

'Pêkerdişê bînî zî binê tehdîdî de yê' 

 

Aslîye dewamîya qiseyanê xo de wina vat: "Her rengî, vengî û erjnayîşê polîtîkî ra merdimî amebî û waştişê înan yew bî. A roje heme rayîrî vejîyayêne Pêkerdisê Stenbolî,  a roje bi yew vengî ame vatiş ke 'Feshkerdiş duştê huqûqî yo'  û vatî  'Qebûlkerdişê feshkerdişê nê pêkerdişî yeno manaya ke heme pêkerdişî binê tehdîdî de yê'. Na roniştene de wayîrvejîyayîşêke pîl bîbî." 

 

'Roniştişêke muhîm bî' 

 

Aslîye dîyar kerd ke vera cinîbîyayîşî nê, vera nê  cîyayîyan rastê şîdetî yenê û wina îzahat kerd: "Ma rey-rey vera Kurdbîyayîşî, Elewîyî,  Armenîyî, Misilmanî û rey-rey zî vera Lezbîyenîyî ûsn şîdet vînenê. Vera nê cîyayîyan şîdet ro cinîyan yeno kerdiş.  Vera nê zî tewirbîyayîş û wayîrvejîyayîşê ro pêkerdişî belkî zî vera nê qewimîyeno. A roje muşahîdê sazgeyan ê tewirê roniştene bî pawitişê xo kerdî. Roniştişêke zaf muhîm bî." 

 

'Do roniştenê newe bibê' 

 

Aslîye wina dergî da qiseyanê xo: "Qeraro bêro dayîş seba bawerîya bi hukmê Tirkîyayî xeylêk muhîm o.  Heyetî bi baleantişêke pîl pawiteyî goştarî kerdî. Dima ra Persêrê Şûrayê Dewlete mutala da. Mutalayê xo de dîyar kerd ke qerarê feshkerdişî eksê huqûqî yo ganî bêro betalkerdiş. Bêşik no nîyadîyayîş seba ma zaf muhîm bî. Tewr peynî roniştiş seba qerar bêro dayîş ame peynîkerdiş. Nika do 7ê Hezîrane de dewayê neweyî bêrê vînayîş. Cinîyî vatişanê xo do reyna vajê. Do reyna qerebalix bê." 

 

'Her hetî ra wayîrvejîyayîş bîbî' 

 

Aslîye peynîyê qiseyanê xo de behsê nê çîyî  kerdî: "Qeraro ke na roniştene ra vejîyo, xeylêk xeylêk muhîm o. La qerar çi beno wa bibo pratîkê wayîrvejîyayîşî ameyo mojnayîş, vet werte ke her hetî ra wayîrvejîyayîşêke pîl esto."