STENBOL - Cinîyan reaksîyon mojnayî hêrişê hemverê Mintiqaya Federe ya Kurdistanî ra û vatî: "PDKyî Helepçe ra fam nêkerdo gelo? Gelo nêzano ke zirar dano xo û merdimîyî?" 

 

Hêrişê AKP-MHPyî yê bi paştgirewtişê PDKyî, di 17ê Nîsane de hemverê Mintiqaya Federe ya Kurdistanî de ameyê destpêkerdiş, dewam kenê. Hemverê Zap, Metîna û Avaşînî de bombevaranî dewam kenê. Her hetî ra zî reaksiyonî yenê mojnayîş û rayîrê çareserîyî zî yewîyîya Kurdan yena mojnayîş. 

 

Cinîyan reaksiyon mojnayî hêrişan û eşkera kerdî ke do sayîya melhefanê spîyan azadî bîyarê. 

 

'Berzanî seba menfîetê xo hereket keno' 

 

Dadîya Aştî Rahîme Tûrane da zanayene ke şer zirarêke pîl dano cinîyan, tutan û komele û wina vat: "Şer feqîrî zî xo dir ano. Gelo PDKyî hema fam nêkerdo ke şer zirar dano merdimîyî? Gelo Helepçeyî ra çîyêke fam nêkerdo? Ganî nê nêrê vîrîrakerdişî! Tirkîya heme sermayeyê xo şerî rê aqitnena. Şer şaran qedêneno. Feydeyê ey kesî rê çinî yo. Ma nêwazenê ne gerîlla, ne esker, ne zî polîsî bimrê. Wa kezeba dadîyan nêveşo! Berzanî tena seba menfîetê xo hereket keno." 

 

'Ma dest têkoşîne ra vera nêdanê' 

 

Dadîya Aştî Muhbet Dîşlî dîyar kerd ke hêrişê hemverê Kurdan de bi serran o dewam kenê û wina vat: "Ez û keyeyê xo zî hêrişan dir ameyî rî bi rî. Tehda û zordarî her tim bîbî. Bê esker û polîsî rojê ma derbas nêbenê. Ma sirgûnê Îzmîrî ameyî kerdiş, ma zilm vîna. La pêwa nînan ma dest têkoşînî ra vera nêda.  Ma xeylêke şehîdî dayî. Tepişteyê ma estê. La ma tu reyî dest têkoşînî ra vera nêda." 

 

'Şer  bi destê PDKyî yeno kerdiş" 

 

Îdarekarîya Komeleya Paştdayîş û Hetkarîya Keyeyê Merdimanê  Xo Vindîkerdê (ANYAKAY-DER) Sultan Yagmakane wina qal kerd: "Şerê dewlete ya Tirkî hemverê Vaşur, Rojawan û Şengalî de dayo destpêkerdiş bi destê Berzanî yeno kerdiş. Berzanî paştdayîş dano. Eke Berzanî wina hereket nêkerdêne do Tirkîya nêeşkayîne bikewênê Vaşur. Tevrê Berzanî şaş o. Ganî lezkî agêro! Ganî her kes duştê nê şerî de vindero!" 

 

'Wa dest herdê ma ra veradê' 

 

Hemsereke ya HDPyî yê Kuçukçekmeceyî Gulsum Ozturke zî reaksîyon nîşanê Berzanî da û nê erjnayîşî kerdî: "Wa Berzanî cilê eskerê Tirkî nêkero eskerê xo ra û tutanê ma şehîd nêkero. Êdî bes o, dalpeyêke gonîya ma bibo zî ma do verê şarê xo de bê! Wa tanq û topê xo serê herdê ma ra biancê!  Ez veng ro dadîyanê eskeran û qorîcîyan zî kena. Cenazeyê eskeran nimnenê û rastîyan nêmojnenê ra. Coka reaksîyonê keyeyan rastîya hûmare ya cenazeyan nêvanê. Wa heme dadî vera nê wurzê serê payan." 

 

'Do melhefê sipî azadî bîyarê' 

 

Aktivîsta TJAyî Sevda Cengîze zî dîyar kerd ke yê tewr zêde şerî ra zirar vînenê cinîyî û tutê û vat qirkerdişêk nika yenê kerdiş, bi amancê hewldayîşê çinîkerdişê Kurdan o, melhefê sipî yê dadîyan do azadî bîyarê." 

 

'Dadî do şer vindarnê' 

 

Merdima tepişteyî Kûmrî Akgule ya di Nobeta Edaletî de zî ca gêna, nê erjnayîşî kerdî: "Şerî û zîndanî yewbînan ra aqitnaye nîyê. Ma tena edalet wazenê. Wa tutê ma nêmrê! Ma Berzanî lenet kenê. Nobeta ma zî do bidomo. Ez venga dadîyanê tepişteyan kena. Wa heme kesê ke edalet wazenê destê xo bidê ma. Ma her pancşeme seete 13:00î de Çaglîyan de yê. Bêrê ma tutanê xo têreyde azad bikerê."