Melîke Aydin 

 

ÎZMÎR - Cinîyê dewaya ke verguman Cemal Metîn û vergumanê bînî ke Pinar Gultekîne qetil kerdbi, teqîbkerdişî eşkera kerdî ke polîtîkayê bêcezaverdayîşî yê îqtîdarî tesîr ro hukmî kerdo û vatî do duştê nê polîtîkayan de di waştişê edaletî de bi israr bê. 

 

Wendekara unîversîte Pinar Gultekîne di 21 Temûza 2020î de hetê Cemal Metîn Avci ra bi îşkenceyî amîbî qetilkerdiş û derheqê vergumanî de û merdimê bînî yê bîyê hetkarî de sûcê 'bi çimsûrîyî ameya qetilkerdiş' û ' delîlî nimitê' de dewa amî akerdiş û 12in roniştena dewa di 16ê Gulane de 3yîn Dadgehe ya Cezaya Girane ya Muglayî de amî vînayîş. 

 

Di roniştene de mercîyê edlî mudaxaleyê xo de derheqê verguman Cemal Metîn Avci de sûcê 'Bi çimsûrîyî û plankerdişî qetilkerdişî' ra, derheqê birayê vergumanî Mertcan Avci de zî sûcê 'Hetkarîyî' ra cezaya muebetê giranî ameyî waştiş û derheqê dadîya vergumanî Ayten Avci,  babê vergumanî Selîm Avci, cinîya vergumanî ya kebvera dayo Eda Karagune û derheqê hemparê ey Şukru Gokhan Orhanî de zî sûcê 'delîlê nimitî' ra mabênê 2 û 5 serran de ceza amî waştiş. 

 

Cinîyî seba teqîbkerdişê dewa şîyî Edlîyeyê Muglayî derheqê dewa de serrêke yo ke dewam kena de qisey kerdî. 

 

'Roniştiş seba vergumanî yeno dergkerdiş' 

 

Pîrebokê Kampûsî ra Rozana Ûrkûn dîyar kerd ke amancê dergkerdişê dewa no yo ke dem seba vergumanî bêro qezenckerdiş û wina ci de şî: "Sebebê taloqkerdişê dewa, no yo ke delîlê seba başîya vergumanî bêrê vînayîş. Xo ra qeneatê hakimî roja ewilî ra eşkera bî. Herinda ke qatilî muhakeme bikero, ciwîya xusûsî ya Pinare cipersayîş kerd. Welat de polîtîkayê cinî hedef gênê, hukmî de zî bi tesîr bîyê. Sebebê dergkerdişê dewa no yo." 

 

'Wendekarê cinîyan kenê mîyanê lepê şîdetî' 

 

Rozana wina peyni ro qiseyanê xo ardî : "Qetilkerdiş semtê Kotekî de ameyo ca, semtêke yo wendekarî zêde ci de ciwîyenê û no qetilkerdişo yewin nîyo û nê zî peynî yo. Verîyê Pinare dewaya Zeynep Şenpinare bîbî. Seba aye zî cinî tîya de bî. Dima ra cinîyê bînî ameyî qetilkerdiş. Koteklî de wendekarê unîversîteyî bi tacîz û şîdetî dir yenê rî bi rî. Cinîyê ciwanan ra hetê dewlete û polîsan ra kewenê mîyanê lepê şîdetî. Hukm hetê vergumanan de ca gêno. Di dewaya Pinare de verguman vatbî 'Baş bî ke Pêkerdişê Stenbolî ameyo wedaritiş'. Nê polîtîkayê neyarê cinîyî, mojna ke senîn hetkarîyî danê vergumanan." 

 

'Ma seba dadîyê înan edalet wazenê' 

 

Vervatoxa Înîsîyatîfê Dadîyê Aştî yê Îzmîrî Behîye Yalçine zî qal kerd ke eke edalet bibîyêne do nika Pinar Gultekîne bişîne mektebê xo û wina reaksîyon ramojna: "Edalet nêame ca. Edalet seba heme merdimîyî yo. La merdimîyî  bêro do edalet zî bêro. Ma edalet hem seba cinîyan hem seba Kurdan û hem zî  seba heme dinya wazenê. Ma seba Emîne Şenyaşare,  seba Gulîstan Dokû edalet wazenê. Ma seba heme dadîyan edalet wazenê." 

 

'Hukm keyeyan muhakeme keno' 

 

Dadîya Denîz Poyraze ya di hêrişê hemverê HDPyî yê Îzmîrî de amî qetilkerdiş,  Fehîme Poyraze reaksîyon vera dewaya ro dadîya Pinar Gultekîne, Şefîka Gultekîne ameya akerdiş mojna û wina dergî da qiseyanê xo: " Kezeba dadîyî sojinayê la uca de hem yena tehdîdkerdiş hem zî dewa ro ci yena akerdiş. Eke heq û huqûq bibîyêne do nê nêamebîyêne kerdiş. Dadîyêka zerrîvêşaye beno ke her çîyî vajo. Babê Denîze rê zî dewa ame akerdiş. Hem kezeba ma vêşaya hem zî ceza ro ma birnenê. No yeno manaya pawitişê vergumanî. Di dewaya Denîze de vergumanî gîşta xo hakimî rê leqna û vat 'Ti do mi tehlîye bikerê, mi terorîste kişte,  şima ganî mi xelat  bikerê'. Persêrî vat 'veng nêame mi'.  Zaneno ke paşta ey xurt o wina vano. Ma seba dadîya Pinare edalet wazenê." 

 

Endame ya Komîteyê Îdarekarîyî ya HDPyî Belgîn Koçe zî dîyar kerd ke bi amanco ke aye mîyanê wextî de reaksîyonê cinîyan do kemî bibo dewayî yenê dergkerdiş û nê çîyî qal kerdî: "Ma zanenê ke bi qestî dewayî yenê dergkerdiş. Waştişê ma no yo ke vergumanî cezayê tewr giranî bigîrê. Polîtîkaya bêcezaverdayîşî vernîyê tacîz, tecawuz û şîdetî akenê. Ma do heta peynî dewa teqîb bikerê."