RIHA - Çalakîya 'Nobeta Edaletî' de Emîne Şenyaşare eşkera kerd ke çirê kesê tutê aye qetil kerdê serbest ê û wina vat: "Wa tutê mi veradê. Nê semedî ra no bî serrêke ke ma tîya der ronişenê. Hem Remezan û hem roşanê ma tîya de derbas bî. Ma wazenê ke heme kesê qayîtan de asayenê bêrê tepiştiş." 

 

Merdim û pawitoxê parlamenterê AKPyî Îbrahîm Halîl Yildiz, 14ê Hezîrane ya serra 2018î de di Pirsûsê Rihayî de hêrişê dikanê Keyeyê Şenyaşarî kerdbi. Hêriş de mêrde û 2 lajê Emîne Şenyaşare ameyî qetilkerdiş û lajê aye Ferît Şenyaşar zî bi birîndarî xelesîya bî. Bi amancê tepiştişê qatilan û muhakemekerdişê înan, Emîne û Ferît Şenyaşarî 9ê Adare ya serra 2021î de vernîyê Edlîyeyê Rihayî de dest bi çalakîya 'Nobeta Edaletî' kerdî. Çalakîya keyeyî di roja 438î de zî dewam kerd. Keyeyî, seetê rew ê sibayî de Pirsûs ra ameyî verê Edlîyeyê Rihayî û di cayo ke seke 'Quncikê Edaletî yê Keyeyê Şenyaşarî' yeno namekerdiş de, dest bi çalakîya xo kerdî. 

 

Çalakîyî de Emîne Şenyaşare qisey kerd û vat ke, tutê aye nêweşxane de verê çimanê aye de ameyê qetilkerdiş û wina dewam kerd: "Gelo çirê kesê ke tutê mi qetil kerdê nika serbest ê? Nê merdiman nêweşxane de merdimî qetil kerdî. Şima bi kamco wijdanî, ê kesê ke zilm ro ma kerdî vera danê? Ma wazenê nê merdimî bêrê tepiştiş." 

 

Dewamîya qiseyanê xo de Emîneye da zanayene ke, lajê aye Fadil Şenyaşar zêdeyêrî serrêke yo di hucreya yewkesî de yeno girewtiş û qiseyê xo wina dewam kerdî: "Wa tutê mi veradê! Nê semedî ra bî serrêke ke ma tîya der de ronişenê. Hem Remezan û hem zî roşanê ma tîya de derbas bî. Ma wazenê ke heme kesê qayîtan de asayenê bêrê tepiştiş."