Derya Ren - Medya Uren 

 

AMED - Dîlok ra heta Şirnex û Mêrdînî dadîyan duştê şerê îxanetî yê Vaşurê Kurdistanî de ameyo destpêkerdiş de reaksîyonî motî ra û wina vatî: "Ma destê biratî dergê Berzanî kerd. La înan fek îxanetî ra vera nêda. Berzanî sey memûrê Erdoganî hereket keno.”

 

Dewlete ya Tirkî bi paştgirewtişê PDKyî kewto Vaşurê Kurdistanî û xeylêk şaristanan de hêzê xo kom kerdî. Netîceyê pêvînayîşê PDKyî û  îqtîdarê AKPyî wextêke derg bî hadrekerdişê hêrişan ameyêne kerdiş. 17ê Nîsane de  zî serê Mintiqayê Zap, Metîna û Avaşînî de hêrişê hewayî û bejîyî dayî destpêkerdiş. No şero ke bi tewirêke lîşin yeno rayrayîş xeylêk metodê ke sûcê merdimîyî yê ameyî xebetnayîş. Labelê vêşêrê delîlan zî veng Neteweyê Yewbîyayeyî (NY)ra nêvejîya. 

 

Têkilîya  hêrişê TSKyî û têkilîya PDKyî yê hêrişan dir  ma mîkrofonê xo dergê dadîyan kerd. 

 

'Rolê PDKyî pîl o' 

 

Endama Meclîsê Dadîyanê Aştîye yê Şirnexî ra Hîkmet Acare wexto qalê hêrişê Vaşurî de ameyê destpêkerdişî kerd, sere de  keyeyê Berzanî  şermezar kerd. Hîkmete wina dewam kerd: "Hêrişê yenê ca de rolê PDKyî pîl o. Eke Berzanî rayîr nêdayê ke do dewlete ya Tirkî nêeşkabiyêne bikewtêne mîyanê  yê herdî, nêeşkabiyê hêrişêke wina dewamkerde û xedar bîardêne ca. Şero uca de yeno kerdiş, şerê bîyayîş û çinîbîyayîşê Kurdan o. Ê kesê ke uca de şer kenê, seba heme perçeyê Kurdistanî bedel danê. Bîyayîşê gerîllayî bîyayîşê min o. Ganî heme Kurdî di na hişmendîyî de bê. Seba înan veng ê min o, ganî ma têreyde wurzê û bibê yew. Ganî heme Kurdî hemverê nê hêrişan de bibê qalxanê ganî. Coka ke gerîlla vindî bikero do heme Kurdî vindî bikerê. Ganî sere ra Berzanî nê yewî bizano." 

 

'Ganî ma yewbînan dir rast bê' 

 

Yildiz Basûtçû zî da zanayene ke şer rayîr verê probleman de pîl keno û wina ci de şî: "Wazenê bi metodê qirkerdişî Kurdan çinî bikerê, labelê ma Kurdî çinî nêbenê. Bi seserrano amancê înan no wo. La ê do nêeşkê nê amancê xo biser fînê. Her roja ke şinê ma zafêr vila benê û pîl benê. Ê ke ma çinî hesebnenê wa dîyayîşkîyê Newroze ya Amedî seyr bikerê. Bi xusûsî zî hêrişê Vaşurê Kurdistanî de ameyê rayrayîşî bi paştgirewtişê PDKyî yeno ca. Muhîm o ke sere de o(Berzanî) şerm bikero. Coka duştê îxanetî de muhîm bî ke wayan û biranê xo bipawitê. Ganî ma yewbînan dir rast bê. Yan zî ma do çinî bibê."

 

'Biciwîyo Kurdistan' 

 

Îdarekara HDPyî ya şaristanê Dîlokî  Zekîye Karabûlûte zî bi nê vatişan hêrişo bîyaye şermezar kerd û wina vat: "Hêrişo bîyaye tesîrê serê her qismî de keno. Ganî Organîzeyê Heqê Merdiman seba nê hêrişan çareserîyî bivînê. Ganî şer bêro vindarnayîş. Duştê şerî de ma do seke dadî her tim aştî bipawê. Bi umîdo ke şer bêro vindarnayîş û mergî peynî bêrê, ma do seba nê yewî zî bibê serek. 

 

Çirê Berzanî xo keno şirîgê nê hêrişan û qirkerdişê Kurdan? Ganî ma Kurdî bibê yew û duştê nê hêrişan de vejîyê meydanan. Ma bîbî, ma estê û ma do  bibê! Ma do tu reyî apey game nêerzê. Biciwîyo Kurdistan!" 

 

'Fek îxanetî ra vera nêda' 

 

Endama Meclîsê Dadîyanê Aştîye yê Mêrdînî Helîme Kaya, hêrişê Vaşurê Kurdistanî de yê, seke hêrişê îxanetî şîrove kerd û vat: "Ganî heme şarî duştê nê hêrişan de yew zerrî bê. Ma xeylêke veng ro  Berzanî kerd, la Berzanî nê îxanetî ra fek vera nêda. Berzanî seke memûrê Erdoganî hereket kerd. Do ewro ra pey senîn vajo ez  'Serekê Kurdan a'? Ma her tim destê xo dergê ey kerd, la ey neyarê ma dir serê nasa de ronişt."