Şehrîban Aslan 

 

AMED - Mehmet Can Ayşîn 1994î de ame destbendkerdiş û reyêk bîn ci ra malûmat nêame girewtiş. Aynûr Ayşîne da zanayene ke ê do tu reyî dest cigêrayîş ra vera nêdê û wina vat: "Têkoşînê mi bêşik do babê mi apey nîyaro, la qe nêbo do qatilan vejo werte." 

 

Komeleya Heqê Merdiman (ÎHD) 1995î ra heta nika tarîxê mabênê 17 û 31ê Gulane  seke 'Hewteyê Têkoşîna Duştê Vindîyîyanê Nezaretî yê Mîyanneteweyî' bi name kena. Di Hewteyê Vindîyîyan de çalakî û programê cîyayî ameyî ca û aqûbetê kesê bi tewirêke kerdoxî eşkera nîyê ameyê vindîkerdiş, yenê persayîş û wazenê vergumanî bêrê muhakemekerdiş. Merdimê vindîyîyan û Dadîyê Şemîyî her roja şemîyî seba vindîyîyan têkoşîn kenê. 

 

Yew merdima vindîyîyan ra ke bi serran o meydanan de têkoşîn kena, kênaya Mehmet Can Ayşîn o ke 1994î de, di dewa Kiliçli (Mizagî) ya Licê ya, bi tewirêke kerdox eşkera nîyo ame vindîkerdiş û kênaya  ey Aynûr Ayşîne ma rê a rojan kerd.

 

'Dewa ma veşinayî' 

 

Aynûr Ayşîne da zanayene ke di serrê 90yî de dewa înan de operasyonî ameyêne kerdiş û kiştişî hetê kerdoxê eşkera nîyê ra ameyê kerdiş û wina dewam kerd: "Di dewa Mizagî(Kiliçli) ya Licê de, aşma Gulane ya serra 1994î de operasyon ame ca.  Heme mêrdeyî dewe ra vetî û destbenkerdî, berdî merkezê Licê û 4 rojî nezaret de mendî. O wext dewe zî veşinayî. Dima ra nizdîyê 80 merdimî vera dayî. La babê mi yanî Mehmet Can Ayşîn nêame veradayîş. Roşanê Qurbanî kewt mîyanber û coka destûrê persêrî vejîyabî vatî dima ra do bêro veradayîş. Roşan derbas bî la reyna veng nêvejîya. Ma waştişname da, la vatî kes nezaret de çinî yo." 

 

'Ma dejê pîlî antî' 

 

Aynûre qal kerd ke 9 wayî û birayê, wexto babê aye ameyo vindîkerdiş 27 serrî bîya û wina malûmat da: "Ma zor û zametîyî antî. Dewe amî veşinayîş. Babê mi ame qetilkerdiş. Ma hema fam nêkerdbî ke ma çi ciwîyenê, ma bêçare mendî koçê Amedî bîyî. Ma vêşanî û feqîrîya pîlî ciwîyayî. Ma bi rojan banî nêvînayêne. Ma kuçeyan de mendêne. Merdimêke hetkarî bido ma zî çinê bî. Dejo ke ma ant tu kesî nêant." 

 

'Ez dimayê babê xo wa' 

 

Aynûre dîyar kerd ke serê vindîkerdişê babê aye ra serrî derbas bîyê û têkoşîna xo her tim kerda û wina dergî da qiseyanê xo: "No 27 serrî yo ma dimayê babê xo yê. Ma nêvindertî û ma do nêvinderê zî. Ez dest dewaya babê xo ra vera nêdana. Ez o her tim di wareyan de bî. Ez her Şeme tewirê çalakîya Merdimê Vindîyîyan bena. Bêşik têkoşînê mi, do babê mi apey nîyaro, la do qatilî vejîyê  werte. Ez her Şeme şina Parka Koşûyolû. Ez esteyê babê xo persena. Karê mi bibo zî ez şina." Aynûre peynîyê qiseyanê xo de vat: "Seba babê xo mi sere ro sazgeyê dewlete zî dayî la tu netîce nêgirewt" û eşkera kerd ke heta netîceyêke nêgîro do têkoşînê aye zî bidomo.