RIHA - Çalakîya "Nobeta Edaletî" ya keyeyê Şenyaşarî 441 rojî yo dewam kena. Keye çalakîya xo ya ewro Stenbol de dewam bikero. Sewbîna Odeya Tabîban ê Stenbolî do “Xelata Heqê Merdiman, Aştî û Demokrasî” bido Keyeyê Şenyaşarî. 

 

Nobeta Edaletî ya Emîne Şenyaşar û lajê ci Ferît Şenyaşar (Keyeyê Şenyaşar) ê verê Edliyeyê Rihayî de roja 441ine de dewam kena. Keye 9ê Adara 2021 de dest bi nobete kerdibi. 

 

Keye, do ewro nobeta xo Stenbol de dewam bikero. Keye, do di rojan Stenbol de bo û waştişê edaletî bikero. Keye do şan de beşdarê merasîmê xelatdayîşî yê Odaya Tabîban ê Stenbolî bibo. Odaya Tabîban emsar qerar girewt ke “Xelata Heqê Merdiman, Aştî û Demokrasî yê Dr. Sevînç Ozguner” bido Keyeyê Şenyaşarî. Keye, do şan de merasîm de amade bo û xelat diyarê înan bêro kerdiş.

 

Keye serê hesabê xo yê Twitterî de nê mesajî pare kerd: “Ma do ewro seba Xelata Heqê Merdiman, Aştî û Demokrasî Stenbol de bê. Heta ke edalet bi ca bêro, ma do her cayê Tirkîya de vajê seba keyeyê  Şenyaşarî edalet, #Şenyaşaailesiadalet, seba her kesî edalet.”