ŞIRNEX - Dewijê nizdîyê sînorê Mintiqaya Federe ya Kurdistanî de yê, reaksîyon mojnenê hêrişê dewlete ya Tirkî ke serê mintiqaya Kurdan de ya û  dewijan vat:" Ganî Kurdî wayîr ro herdê xo vejîyê." 

 

Bi hetkarîya AKP-PDKyî hêrişê serê mintiqayê; Zap,  Avaşîn û Metînayî yê Mintiqaya Federe ya Kurdistanî de yê, domnenê. Kurdî ke hetkarîya PDKyî seki 'Bêbextî' name kenê, seba qorîcîyê ke tewirê hêrişan benê zî veng kenê ke nêbê şirîgê nê sûcî. Welatijê qezaya Bêşebabê Şirnexî duştê hêrişan venga yewîyî û wayîrvejîyayîşê herdê xo kerdî. 

 

Dewanê Germavî ra Kazim Boranî dîyar kerd ke tehdayê dewlete serranê 1990yî ra domnenê û vat: "Ez 80 serrî yo na dewe de ya. 80 serrî yo tehda û zordestî esto. Serranê 90yî de dewa ma amî bombakerdiş. Ê serran de qorîcîyî amî ferzkerdiş. Kesêke qebûl nêkerdî hêrişanê xidaran dir rî bi rî mendî. Bi roketan hêrişî ardî serê keyeyê ma. Sewbîna eşîran zî zor dayêne ma. Hewl dayêne ke ma seba qorîcîyî îqna bikerê. La ma qebûl nêkerd." 

 

'Vera tehdayî dewa xo tereknaya' 

 

Dewa Karçînî ra Meryem Kaya (50) ard ziwan ke dewlete bi heme rayîr û metodan serê Kurdan de yena û wina qisey kerd: "Vera tehdayê serrê 90yî de 3 serrî ma nêeşkabî şêrê dewa xo. La axirî ma hewêna agêrayî ameyî. No zilm hema zî domneno. Seba peynîbîyayîşê nê tehdayî û zilmî ganî Kurdî bibê yew. Êdî wa tu kes nêro kiştiş! Wa dadî nêbermê êdî! La ê ke neheqîya pîle ro Kurdan kenê reyna Kurd ê. Ganî no zî peynî bibo!" 

 

'Wa Kurdî wayîr ro herdê xo vejîyê' 

 

Bahar Ûlaşe (42) zî reaksîyon mojna qorîcîyan ke tewirê hêrişê Mintiqaya Federe ya Kurdistanî bîyê û vat: "Verî merdim bi dara zorîyî bîne qorîcî. Nika qorîcî bêbextî ro herdê xo kenê. Kurdî ganî bêbextîyî nêkerê û herdê xo bipawê!"