Oznur Deger

 

ANQARA - Vervatoxa Meclîsî ya Cinîyanê HDPyî, Ayşe Acar Başaran 4in Konferansê Cinîyanê HDPyî erjna û wina vat: "Ma do hewl bidê ke Meclîsêke Cinîyan ê HDPyî ke heme kesî xo ci de hîs kenê awan bikerê. Hemverê ma de îqtîdarîyêkê faşîst, cînsîyetperest û dînperest bibo zî ma eşkenê têreyde werte ra wedarê û yê newe awan bikerê. Rayîro hîrêyîn, bindestî û cinîyî eşkenê ameyox awan bikerê. Ganî cinîyî di HDP de ca bigîrê." 

 

Meclîsê Cinîyan ê HDPyî bi şîyarê 'Ma di azadî de bi israr ê, di têkoşîn de bi qerar ê’ di 21-22yî Gulane de bi tewirbîyayîşê 300 delegeyî 4in Konferansê Asayî yê Cinîyan Anqara de ard ca. Cinîyan di konferans de bale ante serê rayîro hîrêyîn û eşkera kerdî ke do di têkoşîn de israr bikerê. 

 

Vervatoxa Meclîsê Cinîyan ê HDPyî Ayşe Acar Başaran derheqê konferansî de erjnayîş kerd. 

 

'Prosesêko ke perspektîfê sîyasî vejeno werte' 

 

Ayşe vat di prosesêko muhîm de konferans ardê ca û nika hadreyîyê kongreyî kenê û wina vat: "Verîyê konferansî ma hewt mintiqan de konferansî û civatî ardî ca. Ma konferansan de embazanê xo yê cinîyan dir munaqeşe kerdî. Di 2 serrî û nîm de ma çi kerdo, kêmanî çîyê, ganî ma perspektîfê xo bidê ke, ameyî munaqaşekerdiş. Ma do wexto newe de perspektîfê xo ronê werte û prosesê averî sey prosesoke xerîteya rayîrî xo bimûnê, bigîrê dest." 

 

'Ma hetê şerî munaqaşe kerdî' 

 

Ayşe da zanayene ke konferansêko verhîra yê 2 rojî dewam kerdo ardê ca, di roja ewilî de prosesê sîyasî erjnayê û vat: "Rojhelato Mîyanîn de şerêko serê Kurdan de ameyo destpêkerdiş, esto. Îşxalkerdişê Rûsyayî yê Ûkraynayî, îşxalkerdişê Vaşur de yenê ca. Ma tesbîtê hetê şerî kerdî. Ma tesîrê şerî yê serê cinîyan de munaqaşe kerdî. Ma prosesê polîtîkî yê pêroyî munaqaşe kerd. Ma analîzê Rojhelato Mîyanîn, Kurdistan, dinya û Tirkîya kerd. Ma vindertişo xurto ke duştê sîstemê serdestîyê mêrdeyî yê cinîyan de reyêk bîn tesbît kerd." 

 

'Girankerdişê tecrîdî' 

 

Ayşe bale ante serê tehdayê serra 2015î ra heta nika giranêr bîyê û wina qal kerd: "2015î pey ra pêvînayîşê bi Birêz Ocalanî dir ameyê birnayîş û tecrîd giran bî. Problemê Kurdî adirek bîn fîna mîyanê lepê nêçareserîyî. Ma derheqê atmosferê Tirkîyayî de, hêrişê hemverê destqezencîyê cinîyan de munaqaşe kerdî. Cayê ke ci de şerî giran benê û mîlîtarîzm organîze bibo, bêşik cînsîyetperestîyê serdestî yê mêrdeyî zî organîze beno. Ma derheqê ke ma do ameyox senîn awan bikerê de munaqaşeyî kerdî." 

 

'HDP partîyêka cinîyan a' 

 

Ayşeye bale ante serê dewaya padayîşê HDPyî û ard ziwan ke HDP partîyêka cinîyan a û bi prensîbê hemserekîyî partîyêka ke bi bîyayîşê cinîyan ê di sîyaset de awan bîya. Ayşe beyanat kerd ke dewaya padayîşê HDPyî hêrişê hemverê destqezencîyan de yê û wina erjna: "Ma tesbîtê wareyê xoverdayîşê cinîyan zî kerdî. Ê ke keda înan yenê binpaykerdiş reyna tewr zêde cinîyê. Ma feqîrîya cinîyan û xoverdayîşê cinîyan ê duştê binpaykerdişê kesan de munaqaşe kerdî." 

 

'Hêrişê hemverê Mintiqaya Federalî ya Kurdistanî ame munaqaşekerdiş' 

 

Ayşe dewamîyî de wina vat: "Hêrişê hemverê Mintiqaya Federalî ya Kurdistanî zî ameyî munaqaşekerdiş. No yew rojeve ra tewr asas bî. Ma duştê nê de erjnayîş kerd ke ma senîn xo ver bidê û destqezencîyêke senîn bi dest fînê. Yew qeraro bîn ra yê bîn di konferans de ame girewtiş,  awankerdişê akademîyê sîyasetî yê cinîyan bîyî. Ma munaqaşe kerd ke cinî di sîyasetî de zêdeyêr bê û bi perspektîfê xo sîyaset de wayîrê vatişî bê. Yew rojevan ê bînî ra tewr muhîm polîtîkayê şerê xusûsîyê hemverê cinîyan de yenê ca bî. Hemverê HDPyî û cinîyan de polîtîkayêke şerê xusûsî yeno rayrayîş; demê aver de derheqê nê de, wareyê ke ma verê xo bidê û qeraran bigîrê, estê." 

 

'Ganî her kes HDPyî de ca bigîro' 

 

Ayşe peynîyê qiseyanê xo de dîyar kerd ke HDP partîyêka îtîfaqî ya û hem ê asasî yê rayîro hîrêyîn ke bawerî û nasnameyê cîyayî ra kesî ci de ca gênê ya. Ayşeye wina peynî ro ci ard: "Ma munaqaşe kerd ke HDPyî senîn xurt bikerê. Ma do hewl bidê ke Meclîsêke Cinîyan ê HDPyî heme kesî xo ci de hîs kenê, awan bikerê. Hemverê ma de îqtîdarêko faşîst, cînsîyetperest û dînperest bibo zî ma do bieşkê têreyde werte ra wedarê û yê newe awan bikerê. Rayîro hîrêyîn,  bindestî û cinîyî eşkenê ameyox awan bikerê. Ganî cinîyî di HDP de ca bigîrê!"