Rozerîn Gultekîn 

 

STENBOL - Songul Îlkere ya hêrişê polîsan ke hemverê 'Nobeta Edaletî' de amî destbendkerdiş, eşkera kerd, îşkence û heqaretê ke di wesayîtî de kerdê, nêweşxane û qereqole de zî dewam kerdê. Songule vat ke, a têkoşînê xo de bi qerar a, do di derheqê hêrişê polîsan de muracatê sûcî bikero. 

 

Çalakîya 'Nobeta Edaletî' ke seba tepişteyê nêweşî domnenê, nê hewteyî çalakî verê Edlîyeyê Çaglayanê Stenbolî de dewam kerd û dadîya tepişteyo ke bi nameyê Yakûp Akmanî yo di Zîndanê Tîpê Fyî yê Humara 3yê Silîvrî de maneno Fînce Akman, waya tepişteyo ke bi nameyê Erdan Ozelî yo ke di Zîndanê Tîpê Fyî yê Humara 2yê Tekîrdagî de hucre de maneno Kûmrî Akgul, Dadîya Aştî Zeynep û dadîya tepişteyo ke bi nameyê Ekîm Can Polatî yo ke di Zîndanê Tîpê Tyî yê Denîzlî de tepişteyo Songul Îlkere bi îşkenceyî amîbî destbendkerdiş û heta ereyîyê şewe nezaret de mend ê. 

 

Dadîya tepişteyo ke bi nameyê Ekîm Can Polatî yo ke di Zîndanê Tîpê Tyî yê Denîzlî de tepişteyo, Songul Îlkere ke îşkenceyo nezaret de ro ci amebî kerdiş vat û eşkera kerd ke, seba ke dewlete teşhîr kerdê hedef ameyê girewtiş. 

 

'Îşkence ame kerdiş, heqaret kerdê' 

 

Songule dîyar kerd ke vernîya 'Nobeta Edaletî' verê edlîyeyî de roniştê û polîsî ameyê verê înan, înan ra vatê şima nêeşkenê malûmat bidê û nasname cînan ra waştê û vat: "Ma vat ma nasnameyê xo nêdanê. Hêrişê dadîya Fînce kerdî. Ma bi zor û bi îşkence destbend kerdî. Ma pirodayîş werd. Wesayîtî de da sereyê mi ro. Heta nêweşxaneyî îşkence, heqaret û nengî dewam kerdî. Vatî 'Tîya ra şêrê'. Vatî 'Welat terk bikerê'. Polîsan reyna hêrişê dadîya Fînce kerdî. Dadîya Fînce zî verpersê înan da. Komîserî ez tehdîd kerda." 

 

'Polîsan raporê nêweşxaneyî nêdayî' 

 

Songule da zanayene ke, ê berdê Nêweşxaneyê Şîşlî yê Etfalî û qiseyê xo wina dewam kerdî: "Ma şîyî nêweşxane ma rewşa tepişteyê nêweşê welatîyî zî uca de vatî û ma vat ma dadîyê tepişteyê nêweşan ê. Ma berdî Nêweşxaneyê Şîşlî yê Etfalî. Hekîmî ma derman kerd û dima ra zî rapor da ma. Hekîmêke baş bî. Dimayê dermankerdişî waştî mi binê kontrolî de bigîrê. La polîsan îtîraz kerd. Raporê nêweşxaneyî nêdayî ma kesêke zî. Ez dadîyan ra aqitnaya. Dadîyan nêwaştî mi verdê. Reyna îşkence kerdî." 

 

'Bê avûkatî waştî ke girewte bidê îmzakerdiş' 

 

Songule dewamîyî de çîyêke ameybî ciwîyayîş wina qal kerd: "Qereqole de girewteyo ke hadre kerdbî bi israr bi ma dayêne îmzakerdiş. Ma vat heta avûkat nêro ma qisey nêkenê. Waştî serê îşkenceyî zî padê. Di îfadeyî de ma îşkence ard ziwan la vatî ma nênusnenê. Ma vat embazanê şima îşkence ro ma kerdê.  Avûkatan vatî ganî îfadeyî bikewê girewteyî. Dima ra mi çi vat înan zî nuşt. Mi vat ez o gerre bikerî. Dimayê îfadeyî ma berdî Nêweşxaneyê Okmeydanî la bi hetkarîya hekîm û polîsan rapor nêame dayîş." 

 

'Ma do muracatê sûcî bikerê' 

 

Songule peynîyê qiseyanê xo de dîyar kerd ke do derheqê polîsê ke îşkence ro înan kerdê de, do muracatê sûcî bikerê û wina peynî ro ci ard: "Çîyê ke ameyê kerdiş do bê hesab nêmanê. Îşkenceyo ke ma vîna, vera yê ke tutê ma vînenê tu çîyêke nîyo. Çîyêke tepişteyî ciwîyenê ma nêvînenê. Coka nê ganî ma hema zafêr têkoşîne bikerê. Di hewteyê averî de ez o reyna di 'Nobeta Edaletî' de ca bigîrî. Ez sey dadîyêke  ganî uca de bî. Ma di 'Nobeta Edaletî' de bi qerar ê."